Imperuka y’ikinyoma Apôtre Gitwaza yahanuye

Yanditswe na Philbert Girinema
Kuya 7 Nzeri 2015 saa 05:05
Yasuwe :
0 0

Ubwanditsi: Nyuma y’uko Intumwa y’Imana Paul Gitwaza avuze ko ukwezi kwa Nzeli 2015 kuzagaragaramo ikimenyetso cy’impera y’Isi,benshi batanze ibitekerezo binyuranya ndetse binashidikanya kuri aya magambo.

Apôtre Paul Gitwaza ukuriye itorero rya Zion Temple mu mezi make ashize ari mu rusengero abwiriza, yavuze ko muri Nzeli uyu mwaka aribwo hategerejwe ikimenyetso cya nyuma cy’irangira ry’Isi.

Icyo giye yavuze ko ijuru rizerekana ikimenyetso cya kane aho izuba rizahinduka umwijima n’ukwezi kugahinduka amaraso, ngo byuzuza ibyo Yesu yavuze ko iki gisekuru cy’abantu bariho muri iki gihe ari cyo cya nyuma ku Isi, nta kindi kizigera kigisimbura bibaho.

Gasasira Mathew, umusomyi w’umusesenguzi utemeranya n’ibyo Intumwa y’Imana Paul Gitwaza yahanuye yavuye imuzi ibyo ashingiraho ahakana.

Inyandiko iri hasi ni igitekerezo bwite cy’uwayanditse

Imperuka y’ikinyoma Apôtre Gitwaza yahanuye

Yicaye ku musozi wa Elayono, abigishwa baza aho ari biherereye baramubaza bati “Tubwire, ibyo bizaba ryari, n’ikimenyetso cyo kuza kwawe n’icy’imperuka y’Isi ni ikihe? Arabasubiza ati “Mwirinde hatagira umuntu ubayobya, […] Muzumva iby’intambara n’impuha, mwirinde mudahagarika umutima kuko bitazabura kubaho, ariko imperuka izaba itaraza.”

Ku bemera Imana na Bibiliya yo jambo ryayo, aya ni amagambo afatwa nk’ukuri gusumba ukundi kugahinyuza ikinyoma cyose cya muntu n’izindi mpuha z’abiyita abahanuzi ku byo (Imana) yahanze.

Hashize imyaka n’imyaniko isanzure, Isi n’ibiyigize bibayeho. Abahanga mu mateka n’ubumenyi bw’Isi bagaragaza ko imaze imyaka isaga miliyari 4.54 ( inzobere mu mibare babibara gutya: 4.54 × 109 ± 1%), bashingiye ku bimenyetso bimwe na bimwe byagiye bigaragara ku Isi birimo ibisigazwa by’ibyaremwe.

Hashize imyaka ibihumbi hahanurwa imperuka

Mu myaka isaga ibihumbi bibiri ishize, hagiye hatangazwa ubuhanuzi bushingiye ku ijambo ry’Imana ku iherezo ry’Isi ariko byose ntibyasohoye.

Hafi aha, mu mwaka wa 2000, byavuzwe ndetse binigishwa n’abakozi b’Imana ko imperuka yegereje. Abemera Imana basabwa kwitwararika ku bikorwa byabo byatuma batazajya mu ijuru.

Mu Rwanda, abantu batangiye gusenga ubudacogora, biyiriza ndetse bafata ibihe by’amasengesho akomeye. Abari baraguye (batagisenga), bagarukiye Imana ngo hato itazabasiga igarutse gutwara abakoze neza ubwo Isi izaba irangiye.

Ugereranyije wasanga nta gihe insengero zitabiriwe cyane mu Rwanda, cyaruta mu bihe biganisha mu ntangiriro z’umwaka wa 2000.

Mu mwaka wa 2006, abiyita abahanuzi bongeye gutangaza ko impera y’Isi yegereje, gusa ntibyasohora. Mu 2012 nabwo birahanurwa ko ikibuye kizahanuka mu kirere kikagwa ku Isi abantu bose bagashira, abakurikiye Imana bakajya mu ijuru abandi bakajya ikuzimu, ariko biba ikinyoma gipfubana abahanuzi.

Gasasira Mathew avuga ko imperuka Gitwaza ari ikinyoma

Abahanuzi banyuranya indimi ku gihe Isi izarangirira

Abahanuzi bamwe bati ‘umwaka wa 2000 ntuzasiga Isi itarangiye abandi bati 2006, 2012 n’indi myaka.’

Ubu ikigezweho ni kuwa Gatatu tariki ya 23 Nzeli 2015 mu gihe hari n’abavuga ko ibyo bizaba tariki ya 28 Nzeli 2015.

Hari abagendera ku mahame y’Idini ya Islam batangaje ko Isi izarangira mu mwaka wa 2280.

Iby’impera y’Isi byakajije umurego mu kuvugwa n’aba biyita abavugabutumwa bamwe banabisanisha n’imyemerere ishingiye kuri Bibiliya, mu ntangiriro z’umwaka wa 2000.

Nyuma yo kubona ko icyo kinyoma cyo mu ntangiriro z’umwaka wa 2000 cyapfubye, mu mwaka wa 2006, ku itariki ya 6 Kamena (6-06-206), uwitwa intumwa y’Imana Gitwaza yari yatangaje impera y’isi ashingira ku gitabo gitagatifu cya Bibiliya, nabwo ikinyoma kirapfuba.

Apôtre Paul Gitwaza aherutse kubwira imbaga y’abakirisitu bari bateraniye mu rusengero rwa Zion Temple ko tariki 28 Nzeli 2015 hazagaragara ikimenyetso cy’impera y’Isi, ati “ Ijuru rizerekana ikimenyetso cya kane aho izuba rizahinduka umwijima n’ukwezi kugahinduka amaraso...”

Ubu buhanuzi butuma benshi barya utwabo bacuranwa

Mu mwaka wa 2000, Abanyarwanda bamwe bari basigaye bararetse akazi, batagihinga, batakijya ku isoko gucuruza, abandi bararetse amashuri,bamwe baragurishije ibyabo barara bacanye buji hato ngo Imana itazabagenderera igasanga mu ngo zabo haracuze umwijima.

Ubuhanuzi ku mperuka butuma nk’abagore bajya mu nsengero bagatura imodoka baguriwe n’abagabo babo, abandi bagatura amafaranga yo kurya basigiwe n’abagabo babo bagiye ku rugendo rwa kure, bagaruka (abagabo) bigatera umwiryane mu muryango.

Abandi bafite imitungo bayigabiza amasoko, bakinezeza kakahava ngo ibyo baruhiye bitazabanyura mu myanya y’intoki, bikayonga nk’isabune.

Guhinyuza Imana yaba ari amaco y’inda?

Bibiliya iti ‘ Nta muntu uzi umunsi n’isaha’ bityo ko ntawe ukwiye gukurwa umutima n’ubuhanuzi bw’ibinyoma n’izindi mpuha zinyuranya n’ibyanditswe byera cyangwa bitagatifu.

Gushaka indonke, kwemeza abakirisitu n’abayoboke ko bafite ubushobozi n’ubudahangarwa bwo gukorana no kuvugana n’Imana ni byo bituma abiyita abahanuzi barenga ku ijambo ry’Imana bakayihinyuza maze bakishyiriraho ibyabo.

Ibi bigaragazwa n’imyaka ibihumbi ishize, bahanura ko ejo, ejo bundi na bucyeye bwaho Isi izarangira, ubu izangira ryari? Ejo, ntihabaho hahora ari ejo…

Ntawe ukwiye kwizera umwana w’umuntu

Aho u Rwanda rwari rugeze, ni heza kandi hakomoka mu kwihesha agaciro ndetse no mu mirimo y’amaboko y’abana barwo, ndetse no ku bufasha bw’Imana rurema, ya Mana ya nyayo ifasha uwifashije, bityo rero ntawe ukwiye kwizera umwana w’umuntu ‘kuko hari Imana yo kwizerwa.’

Ntibikwiye ko abantu biyita intumwa cyangwa abakozi b’Imana bagerageza kwitwaza Imana, bagandisha abantu, bababeshya ko impera y’Isi iri hafi, ahubwo abanyarwanda bakwiye guhaguruka bagasenyera umugozi umwe , ndetse bakamagana abahanuzi b’ibinyoma.

Muri Bibiliya Yesu ati “Ariko uwo munsi n’icyo gihe nta we ubizi, naho baba abamarayika bo mu ijuru cyangwa Umwana, keretse Data wenyine.”

Iki gitabo gitagatifu kandi cyera gikomeza kigira kiti “Nuko mube maso, kuko mutazi umunsi cyangwa igihe.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244