Inkongi za hato na hato: Twibaze ku budahangarwa bw’imitungo yacu

Yanditswe na Mathias Hitimana
Kuya 9 Nzeri 2014 saa 01:02
Yasuwe :
0 0

Hirya no hino mu gihugu, hamaze iminsi hagaragara inkongi z’umuriro zikangiza imitungo y’Abaturage, ibikorwaremezeo ndetse hari n’aho abantu bapfuye abandi barakomereka. Izi nkongi zigenda ziba ku buryo bw’urukurikirane zatumye Abanyarwanda bibaza niba nta mpamvu yaba ibyihishe inyuma.
Impamvu z’izi nkongi za hato na hato ziratandukanye: Hari izatewe n’abantu, izindi zatewe n’amashanyarazi biturutse ku buryo insinga n’ibindi bikoresho bitwara amashanyarazi byashyizwe mu mazu, hari izatewe (...)

Hirya no hino mu gihugu, hamaze iminsi hagaragara inkongi z’umuriro zikangiza imitungo y’Abaturage, ibikorwaremezeo ndetse hari n’aho abantu bapfuye abandi barakomereka. Izi nkongi zigenda ziba ku buryo bw’urukurikirane zatumye Abanyarwanda bibaza niba nta mpamvu yaba ibyihishe inyuma.

Impamvu z’izi nkongi za hato na hato ziratandukanye: Hari izatewe n’abantu, izindi zatewe n’amashanyarazi biturutse ku buryo insinga n’ibindi bikoresho bitwara amashanyarazi byashyizwe mu mazu, hari izatewe n’uburangare nk’aho abantu basiga ibikoresho bicometse ku mashanyarazi cyangwa za buji zicanye bakigendera bikaza gutera inkongi, hari n’impavu zitaramenyekana zateye inkongi z’umuriro.

Inkongi yose ibaho ifite impamvu, ariko hari ikintu cy’ingenzi gikwiye : “Ubudahangarwa bw’imitungo yacu

Impamvu sinzigarukaho kuko nazivuze haruguru, ahubwo ndashaka ko abasomyi b’uru rubuga bibaza cyane ku budahangarwa bw’imitungo.

Iyo ugenzuye neza ahantu hamaze iminsi hibasirwa n’inkongi zikahayogoza, ni ahari inyubako zishaje cyangwa zubakishije ibikoresho bidakomeye ndetse inyubako zirimo ibikoresho cyangwa ibicuruzwa ubwabyo bishobora gukurura umuriro no gutuma igihe habaye inkongi, umuriro ugurumana byihuse.

Ingero nkeya natanga ni nk’umuriro wibasiye inzu zimwe mu gace k’ubucururzi mu mujyi wa Kigali kazwi nka “Quartier Matheus” ndetse n’inkongi yibasiye inganda mu gishanga cya Gikondo, inzu y’ubucuruiz muri Nyabugogo ndetse n’inkongi ikomeye iherutse kuyogoza byinshi mu nyubako iherereya ku Muhima imbere y’aho bakunze kwita “ Chez Venant”

Inzu z'ubucuruzi zo muri “Quartier Matheus” zahiye

Muri utwo duce twombi byagaragaye ko inzu zahiye zari zishaje cyane, zirimo ibicuruzwa cyangwa ibikoresho bikurura umuriro ubwabyo.

Urundi rugero ni amacumbi ya Gereza ya Rubavu, aho byagaragaye ko inkuta zayo zari zubakishije amabati kuva hasi kugera hejuru.

Izi ngero zirerekana ko nubwo hari impamvu zateye inkongi, ariko n’inyubako ubwazo nta budahangarwa zari zifite. Ibi birerekana ko Leta ndetse n’Abaturarwanda bagomba gufata ingamba zo kongera ubudahanga bw’imitungo yaba iy’abantu ku giti cyabo cyangwa iya Leta kugira ngo igihe habaye inkongi ibashe guhangana nayo.

Aho gufata umwanya munini hatekerezwa ku mpamvu zitera inkongi, Abaturarwanda bakwiye gutekereza cyane ku budahangarwa bw’imitungo yabo. Kuko impanuka y’inkongi ishobora kuba cyangwa umugizi wa nabi agatwika inzu y’umuturage cyangwa iya Leta, ariko igihe iyo nzu izaba ikomeye, yubakishishije ibikoresho bikomeye, ifite ibyangombwa byose bizimya umuriro ndetse binatanga impuruza igihe cyose byikanze umwotsi, umuriro ushobora kugira ingaruka nkeya cyangwa ukazimywa utarayogoza byinshi.

Kubakisha inyubako ibikoresho bikomeye, no gushyiraho ibikoresho bya ngombwa byo guhangana n’inkongi nka kizimyamwoto, imirindankuba, gukoresha ibikoresho byujuje ubuzirenenge mu gihe cyo gushyira amashanyarazi mu nyubako n’ibindi bishobora gutuma impamvu zose twavuze haruguru zidateza inkongi.

Ibi ariko birasaba n’abantu kugira umwete wo kujijuka bakamenya gukoresha ibikoresho bizimya umuriro biba mu mazu bakoreramo cyangwa bacumbitsemo.
Biratangaje kubona iyo habaye inkongi idakabije ku nyubako, abantu barenga ibihumbi bashobora gusohoka biruka ntihagire n’uwibuka gufata kizimyamoto ngo agerageze kuzimya.

Akenshi abantu bitwaza ko batazi gukoresha ibyo bikoresho nyamara bidasaba ubumenyi buhambaye. Ariko, muri iki gihe cy’ikoranabuhanga nta bumenyi buhishe. Abakozi benshi aho bakorera bafite murandasi (Internet) abandi bayigendana muri telefoni zabo.

Iyi murandasi ubwayo ni umwarimu ushobora kwigisha buri wese uburyo bakoresha ibikoresho bizimya umuriro, hatagombye gutegerezwa impuguke zizaza gutanga amahugurwa rimwe na rimwe bikanatwara umutongo w’igihugu wagakwiye kugoboba abaturage no gukoreshwa mu iterambere ry’igihugu.

Gushyira ahabugenewe ububiko bw’ibikoresho bikurura umuriro nabyo ni ngombwa mu gukumira inkongi.

Ibyabaye bikwiye kudusigira isomo

Abanyarwanda kandi bakwiye gukura amasomo mu mpanuka nk’izi ziterwa n’inkongi zimaze iminsi ziba zigateza igihombo kinini abatari bake.

Inkongi y’umuriro ni kimwe mu biza bishobora gutuma umutungo w’umuntu wose urangira agasigara iheruheru bikaba byagira ingaruka ku muryango we wose. Ibi bigaragara nk’igihe inkongi iyogoje iduka ry’umuntu kandi nta n’ubwishingizi afite. Ibi bishobora kumuviramo guhahamuka ndetse no guhagarika icyerekezo cy’umuryango we wose.

Shingana ibyawe

Ibiza ntibiteguza, ndetse nubwo hafatwa ingamba ntibishobora guhagarikwa burundu. Ku bw’ibyo buri muturanrwanda akwiye kumva ko gufata ubwishingizi bw’imitungo ye ari ikintu cy’ingenzi kuri we.

Ubwishingizi bw’umutungo ku nkongi y’umuriro ndetse no ku bindi biza, si ikintu umuntu yagombye guhatirwa gukora, ahubwo buri wese uha agaciro umutungo we akwiye kubyibwiriza. Ariko mu rwego rwo kurengera ubuzima bw’abantu n’imitungo yabo, nk’uko Leta ishyira ingufu mu kubahiriza amategeko y’umuhanda, imisoro n’andi mabwiriza, bizaba ngombwa ko ubwishingizi cyane cyane ku nyubako rusange zihurirwamo n’abantu benshi cyangwa zibitse imitungo ya rubanda buba itegeko.

Tariki 11 Nyakanga 2014, Guverinoma y’u Rwanda yasohoye amabwiriza ya Nyakubahwa Minisitiri w’Intebe yerekeye gukumira inkongi z’umuriro mu Rwanda.
Aya mabwiriza agamije gukumira inkongi mu nyubako zihurirwamo n’abantu benshi nk’inyubako za Leta, amasoko n’amaguriro, insengero, amashuri, ibitaro n’ahandi hantu hahururwa n’abantu benshi.

Aya mabwiriza kandi agamije gukumira inkongi mu byanya b’inyamaswa n’amashyamba, mu gutwara abantu n’ibintu, mu bubiko ndetse no ku mitungo y’abantu ku giti cyabo.

Akenshi iyo hasohotse amabwiriza, abantu bakunze gutekereza ko aje kubakandamiza, kubera bimwe mu byo aba asaba ko byubahirizwa, ariko bakirengagiza inyungu abafitiye.

Leta ibereyeho kurengera inyungu z’abaturage no kureba icyabagirira akamaro. Niyo mpamvu amabwiriza n’amategeko byose bishyirwaho biba bigamije iterambere ry’Umuturarwanda.

Ni muri urwo rwego nakangurira Abanyarwanda n’Abaturarwanda gusoma amabwiriza yerekeye gukumira inkongi z’Umuriro mu Rwanda, ndetse ibyo basabwa bagatangira kubikora kuko bigamije kurengera ubuzima bwabo n’imitungo yabo.

Amabwiriza ajyanye no gukumira inkongi z’umuriro azakomeza gusobanurwa n’inzego zitandukanye. Hazashyirwaho kandi n’abashinzwe kugenzura uburyo ashyirwa mu bikorwa ndetse n’ingamba zishobora gufatirwa abatayubahiriza.

Gusa uruhare rwa buri wese rurakenewe kugira mu gukumira inkongi z’umuriro kugira ngo turusheho gukomeza no gushimangira iterambere igihugu cyacu kimaze kugeraho ndetse no kugera ku cyerekezo igihugu cyihaye.

N.B: Iki ni igitekerezo bwite cya Minisitiri w’Imicungire y’Ibiza n’Impunzi, Mukantabana Seraphine

Minisitiri w’Imicungire y’Ibiza n’Impunzi, Mukantabana Seraphine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244