Abangirijwe n’inyamaswa zo mu maparike barasubijwe

Abangirijwe n’inyamaswa zo mu maparike barasubijwe


Yanditswe kuya 3-03-2012 - Saa 08:11'

Abangirizwaga bakanahohoterwa n’inyamaswa zo mu maparike noneho bagiye kujya bishyurwa mu buryo buhwitse, kuko ubu ibikorwa byo kubitaho byashyizwe mu maboko y’ikigega cya leta cyihariye cyo kurengera abadafite ubwishingizi, “Special Guarantee Fund.”

Ibi ni ibyatangarijwe mu kiganiro n’abanyamakuru cyabereye muri Telecom House, kuri uyu wa Gatanu tariki 02/03/2012. Iki kiganiro cyari cyiyobowe na Bernardin Ndashimye umuyobozi w’iki kigega, hamwe na Rica Rwigamba ushinzwe ubukerarugendo n’amaparike muri RDB, aho bahererekanyirije inyandiko zikubiyemo abagomba guhabwa indishyi ku bw’ibyagiye byangizwa n’inyamaswa, kuva mu myaka umunani ishize kugeza ubu.

Ndashimye ati : “N’ubwo kugeza ubu inyandiko ziri gukurikiranwa ngo zizahabwe indishyi ari 357 gusa, mugomba kumenya ko izi ndishyi zishobora no kugera ku bantu barenga igihumbi kuko mu gutanga indishyi harebwa byinshi birimo imiterere n’imibereho y’umuntu wahohotewe nk’iyo aramutse apfuye. Harebwa ubumuga yari afite, icyo yakoraga n’umushahara yahembwaga, n’umuryango asize.”

Ndashimye kandi akomeza avuga ko ubu hagiye gukurikizwa itegeko mu kwishyura abangirijwe ibikorwa byabo, cyangwa bagahohoterwa n’inyamaswa ziva mu maparike y’u Rwanda. Yanavuze ko mu minsi ya vuba aha bagiye gutangira gutanga indishyi bahereye ku bagera ku 133 bonewe n’inzovu ahitwa Rwimbogo.

Inyandiko RDB yashikirije ikigo cya Special Guarantee Fund ni 357, zose hamwe zigomba guhabwa indishyi, ni ukuvuga : inyandiko 306 z’abahohotewe muri Parike y’Akagera, 34 muri Nyungwe, na 17 zijyanye na Parike y’Ibirunga.

Umuyobozi w’ikigo gishinzwe kugoboka abononewe n’inyamaswa, Bernardin Ndashimye n’umuyobozi ushinzwe ubukerarugendo n'amaparike, Rica Rwigamba

Ubundi ibi byo guha indishyi abangiririzwa n’inyamaswa zo mu maparike bifite inkomoko ku kuba mu mwaka wa 2003, ubwo Perezida wa Repubulika yasuraga abaturage bu mu Mutara baramugejejeho ikibazo cy’uko bahohoterwa n’inyamaswa ndetse zikanabonera imyaka. Icyo gihe yabemereye ko icyo kibazo kigiye gucyemurwa kandi bagahabwa n’indishyi, ariko yasubirayo mu 2008 agasanga icyo kibazo nta kiragikorwaho, ahita asaba ko noneho hashyirwaho itegeko rirengera abaturiye amaparike.

Iryo tegeko rero ryizweho rinashyirwaho, kuko ubungubu ryatangiye gushyirwa mu bikorwa mu kwezi kwa Mbere kwa 2012, rikaba ari naryo rigena ko gutanga indishyi ku bangiririjwe bakanahohoterwa n’inyamaswa biva mu nshingano za RDB bikajya mu za Special Guarantee Fund.

Ingengo y’imari izajya ikoreshwa mu guha indishyi aba bahohoterwa n’inyamaswa ni 5% y’azajya ava mu bukerarugendo bw’u Rwanda ; nk’uko itegeko rya Minisitiri w’Intebe ryashyizeho iki kigega ribiteganya.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO