Urugaga rw’Abikorera ku giti cyabo ruratangaza ko impinduka mu biciro bishya byo gusura ingagi zizagira ingaruka mbi ku bucuruzi bwabo.

Ikigo cy’Igihugu Gishinzwe iterambere (RDB) giherutse kuzamura ibiciro by’ ingagi ho 50% ugereranije n’ ibyari bisanzwe.

Raporo yashyizwe ahagaragara n’ Urugaga rw’Abikorera ivuga ko ibi bizagira ingaruka mbi ku bikorera ndetse no ku isura rusange y’ u Rwanda. Abikorera bagaragaje ko batishimiye iyi mpinduka mu itangazo ryashyizweho umukono n’ushinzwe ubukerarugendo mu rugaga, aho bagize bati:”Ishyirwa mu bikorwa ry’iri zamuka ry’ibiciro ryakozwe nta kwegera abarebwa n’ikibazo, kandi ntitwishimiye uburyo byakozwe n’ubwo bwose twagerageje kugira uruhare muri iyi gahunda.”

Bakomeza bagira bati:”Twamaze kumva icyo abafatanyabikorwa bacu babivugaho, kandi nta gushidikanya ko bizagira ingaruka mbi ku bucuruzi bwacu n’ubukerarugendo muri rusange.”

Nyuma y’izamuka ry’ibiciro, ubu umunyamahanga azajya yishura amadorali y’amerika 750 aho kwishyura 500; Umunyamahanga uba mu Rwanda yishyure 373$ mu mwanya wa 250$, naho Umunyarwanda yishyure 50$ mu mwanya wa 33$.

Mu itangazo rigenewe abanyamakuru yashyize ahagaragara ivuga ku izamuka ry’ ibi biciro, Umuyobozi mukuru wa RDB John Gara yagize ati:”Iri zamuka ry’ ibiciro rije mu gihe hari ukwiyongera kugaragara kw’ingagi ndetse n’ibikenerwa mu bukerarugendo bw’ingagi.”

Yongeyeho ko bazakora ibishoboka byose mu kurengera ingagi, ndetse n’urusobe rw’ibinyabuzima rugaragara muri parike z’u Rwanda.

Umubare w’ingagi wiyongereye ku kigereranyo cya 26,3% mu myaka irindwi ishize, aho ku mwaka ziyongeraho 3.7% , nk’uko byashyizwe ahagaragara mu bushakashatsi bwakozwe mu 2010.

Ingagi zifatiye runini ubukerarugendo mu Rwanda, dore ko 90% by’ umusaruro w’ ubukerarugendo bw’amaparike ariho uturuka.

Ishyirwa mu bikorwa ry’ibi biciro rizatangira ku itariki 1 Kamena 2012, mu rwego rwo kutabangamira abari baramaze kwishyura mbere.