Hotel zitita ku buziranenge bw’amafunguro zahagurukiwe

Yanditswe na Ferdinand Maniraguha
Kuya 13 Nyakanga 2016 saa 10:00
Yasuwe : XX
0

U Rwanda rwatangiye gushyira abagenzuzi muri Hotel zigera kuri 80 zo mu Mujyi wa Kigali, hagamijwe gutanga serivisi nziza no kwirinda zimwe mu nenge zagiye zigaragazwa n’abashyitsi bakubutse mu nama zabereye mu Rwanda mu minsi ishize

Icyemezo cyo kugenzura amahoteli agera kuri 80 kirafasha mu guha serivisi nziza abasaga 3500 bitabiriye inama ya 27 y’umuryango wa Afurika Yunze ubumwe, yatangiye kuri uyu wa 10 Nyakanga ikazasozwa kuwa 18 Nyakanga 2016.

Ni umwanzuro witezweho kurandura burundu ibibazo byagaragaye mu nama ziheruka, aho bamwe mu bashyitsi babuze amafunguro, abandi bakinubira serivisi mbi bahawe.

Mu kiganiro umuyobozi mukuru w’ishami ry’ubukerarugendo mu Kigo cy’Igihugu cy’Iterambere (RDB), Belyse Kaliza yagiranye na IGIHE, yavuze ko kuri iyi nama ya AU hari umwihariko wo kugenzura ibikorerwa mu gikoni ku mahoteli ari kwakira abashyitsi bayitabiriye.

Yagize ati “ Ntabwo ari icyemezo kidasanzwe kuko bisanzwe bibaho, ariko ubu ni umwihariko muri iki gihe cyane kubera inama turi kugenda twakira, kuko turashaka gukora ku buryo hotel zigera ku rwego mpuzamahanga, cyane mu bijyanye n’isuku mu gikoni kuko niho twibanda.”

Nta kabuza ko mu gihe imwe muri izo hotel yagaragaza imyitwarire inyuranye n’ibisabwa yahita itakaza amahirwe yo kuzakira abashyitsi mu zindi nama zizakurikira.

Ku byerekeye abantu bahoraho bashinzwe kugenzura imikorere na serivisi z’ayo mahoteli, Kaliza avuga ko “abakozi bashyizwe mu mahoteli ari abo kwakira abashyitsi badufasha kureba niba nta kibazo gihari ubundi bakatumenyesha, ariko ntibahorayo kuko bagenda bazenguruka mu mahoteli atandukanye.”

Kaliza avuga ko hotel zigera kuri 53 arizo bari beretse abashyitsi ko baza bakajyamo, ariko ngo hari n’izindi zisaga 20, zifite abakiriya baje mu nama ya AU, zikaba zigomba gutanga serivisi z’ibanze zirimo amafunguro kuva mugitondo kugeza nimugoroba.

Hari hotel zatangaga serivisi mbi

Nyuma y’uko u Rwanda rwakiriye inama mpuzamahanga yiga ku bukungu bw’Isi, Perezida Kagame yanenze amahotel yatanze serivisi mbi ku bashyitsi, by’umwihariko anenga bikomeye aho abashyitsi bahabwaga amafunguro adahagije.

Nyamara hadashize n’icyumweru ikosa nk’iryo ryarongeye aho minisiteri y’ubuhinzi n’ubworozi yabisabye imbabazi nyuma yo kwemera amakosa y’imitegurire y’inama yigaga ku bushakashatsi ku buhinzi bwa Afurika (FARA) yabaye hagati ya tariki 13 na 16.

Kaliza avuga ko iki cyemezo cyo kugenzura ibikorerwa mu gikoni, gifitanye isano n’ibibazo byavuzwe mu minsi yashize aho amafunguro yabaye make mu bitabiriye inama ziheruka, bityo ngo guhoza ijisho ku mahoteli ni ukugira ngo “amafunguro atangwa abe akwiriye kandi afite ubuziranenge.”

Zahabu y’u Rwanda ni ukwakira inama zikomeye

Leta y’u Rwanda yiyemeje kubyaza umusaruro serivisi, binyuze mu kwakira inama mpuzamahanga, aho zigomba kugira uruhare mu iterambere ry’igihugu, aho mu mwaka hagomba kwinjira nibura miliyoni 150 z’amadorali ya Amerika.

Urwego rw’amahoteli ni nkarwo nkingi ikomeye igomba kugira uruhare rukomeye mu gutuma iyi ntego igerwaho.

Ni mu gihe muri Werurwe 2015 mu Rwanda habarirwaga ibyumba 8000, kuri ubu RDB ikaba ivuga ko bimaze kugera ku byumba ibihumbi 10.

Nta kabuza ko intego yo kongera ibyumba ku ijanisha rya 20% yagezweho, ndetse zimwe muri hotel z’inyenyeri eshanu zari zitegerejweho kongera umubare w’ibyumba nka Radisson Blue Hotel na Marriott Hotel zafunguwe mu cyumweru gishize, zombi zikaba zifite ibyumba 546.

Nubwo uyu mubare wiyongera ariko, haracyakenewe imbaraga zishyirwa muri uru rwego kuko intego ihari ari uko ibyumba by’amahoteli bigera ku 13800 mu mwaka wa 2017.

Kaliza Belyse ukuriye ubukerarugendo muri RDB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza