Kuwa gatanu i Musanze habereye inama yo kwerekana amasomo yavuye mu mushinga wa Basoli (Bamboo promotion for Soil conservation and improved Livelihood) mu rwego rwo gutegura indi mishinga yo gutubura imigano hagamijwe kubungabunga Parike y’i Birunga no guteza imbere abaturage baturiye iyi parike kugira ngo batajya kuyangiza ahubwo bayirinde.

Guverineri w’Intara y’Amajyaruguru, Bosenibamwe Aime yasabye abitabiriye inama kurebera hamwe amasomo yavuye muri uyu mushinga kugira ngo bizabafashe no mu yindi mishinga iri mbere. Yanashimangiye ko gutubura imigano bifitiye akamaro kanini abaturiye parike y’ibirunga, kuko imigano ivamo ibikoresho byinshi ndetse mu bihugu bimwe na bimwe ikabavamo n’ibiribwa.

Uwari ahagarariye GVTC (Greater Virunga Transboundary Collaboration) bisobanuye gahunda y’ubufatanye bw’ibihugu (Rwanda, Uganda na Kongo) yo kwita ku ishyamba ry’ibirunga, bakaba aribo bateye inkunga uyu mushinga, yashimiye muri rusange uko umushinga wagenze kandi avuga ko biteguye gukomeza gukorana n’inzego zose bireba mu kubungabuga parike y’ibirunga hagamijwe guteza imbere abayituriye mu bikorwa bituma batajya kuyangiza.

Umuyobozi wa ARECO Rwanda nziza, Nsabimana Aloys, akaba yashimiye abantu bose bakoranye kugira ngo uyu mushinga ushyirwe mu bikorwa. Ibi bikaba byaratumwe handi undi mushinga watewe inkunga n’Umuryango w’Ibihugu by’Iburayi nawo wo gutubura imigano ku turere twegereye parike y’ibirunga.

Mukakamari Dancilla, umuhuzabikorwa ku rwego rw’igihugu wa ARECO akaba yarerekanye amasomo yavuye muri uyu mushinga cyane harimo uguteza imbere abari n’abategarugori bashyizwe mu mashyirahamwe.

Umushinga wa Basoli wakoreye mu turere tubiri aritwo Musanze na Burera, umara imwaka ibiri, ukaba barakozwe n’abaturage bari mu mashyirahamwe atandukanye harimo ayabari n’abategarugori ndetse n’ayabahoze ari ba rushimusi n’andi mashyirahamwe y’abantu bishyize hamwe ngo babungabunge parike y’ibirunga, ukaba wari ufite inkunga y’amafaranga yatanzwe na GVTC.