Isuku nke ituma bamwe batinya kurya mu maresitora

Yanditswe na
Kuya 25 Gashyantare 2012 saa 07:53
Yasuwe :
0 0

Bamwe mu batuye mu Mujyi wa Muhanga batangaje ko akenshi hari abatinya kurya mu maresitora bitewe n’isuku nke y’aho batekera ibiryo.
Ibi bigatuma ndetse bamwe mu bakorera mu Mujyi batabasha kujya kurya mu ngo zabo saa sita, bahitamo gufata ibindi biribwa n’ibinyobwa byo muri za “Alimentation”, kuko batinya kuba bakwandura indwara zikomoka ku isuku nke y’ibiribwa.
Uwizeye Fidele ucuruza imyenda, yabwiye ikinyamakuru Izuba Rirashe ko ahenshi mu maresitora usanga aho barira hasa neza, ariko (...)

Bamwe mu batuye mu Mujyi wa Muhanga batangaje ko akenshi hari abatinya kurya mu maresitora bitewe n’isuku nke y’aho batekera ibiryo.

Ibi bigatuma ndetse bamwe mu bakorera mu Mujyi batabasha kujya kurya mu ngo zabo saa sita, bahitamo gufata ibindi biribwa n’ibinyobwa byo muri za “Alimentation”, kuko batinya kuba bakwandura indwara zikomoka ku isuku nke y’ibiribwa.

Uwizeye Fidele ucuruza imyenda, yabwiye ikinyamakuru Izuba Rirashe ko ahenshi mu maresitora usanga aho barira hasa neza, ariko wagera ahatekerwa ibiryo ukahasanga umwanda ukabije cyane ko usanga amazi akoreshwa inshuro nyinshi hozwa ibyombo, imyanda y’ibishishwa by’ibiribwa n’ibindi.

Izuba Rirashe rikaba ryagiye mu maresitora, umwe mu bakorera muri resitora utashatse ko amazina ye atangazwa, avuga ko ari gake wasanga isuku ihagije mu gikoni bitewe n’uko akenshi nta bakozi bahagije baba bahari kandi imirimo ari myinshi, ati: “Usanga koko amazi atubana make, aho dushyira imyanda naho hakaba hakuzura, bityo hakagaragara umwanda.”

Uyu yongeyeho ko kuva aho abashinzwe isuku mu Karere ka Muhanga batangiye ibikorwa byo kujya mu maresitora bagaca amande cyangwa se bagafunga ahadafite isuku, ngo usanga ba nyir’amaresitora bagerageza gusukura aho batekera n’ubwo bitaragera ku gipimo cyifuzwa.

Uwitwa Mugeni Fatumah, we akaba yabwiye iki kinyamakuru ko yahisemo kujya atumiza ibiryo bya saa sita mu rugo, bitewe n’uko ngo ibyo muri resitora bimugwa nabi, ati: “Birampenda ariko icy’ingenzi ni ubuzima”.

Abaganiriye n’ikinyamakuru Izuba Rirashe bakaba bavuga ko ahagerageza kurangwa isuku haba hahenze cyane, bityo ahaciriritse akaba ari ho usanga isuku nke.

Ku bijyanye n’ibiciro bavuga ko ibiryo bitarahenda cyane kuko muri rusange isahani uyibona ku mafaranga y’u Rwanda ari hagati ya 800 na 1200, bitewe na resitora baba bagiyemo.

Inkuru dukesha: Izuba Rirashe


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza