Inteko Nyarwanda y’Ururimi n’Umuco irasaba ko Ikinyarwanda, ururimi kavukire ruhuza Abanyarwanda bose barusigasira.

Niyomugabo Cyprien, intebe (umuyobozi) w’Inteko nyarwanda y’ururimi n’umuco, yabwiye Abanyamakuru ko hari gahunda z’ibikorwa bitegura umunsi mpuzamahanga w’ururimi kavukire uzizihizwa kuwa 21 Werurwe 2013, bigamije gusigasira ururimi rw’Ikinyarwanda ntiruhungabane.

Yagize ati "Ikinyarwanda ni ururimi rukize kandi rukomeye kuko ruhuza Abanyarwanda bose muri rusange, rukababera indangamuntu. Ururimi rw’Ikinyarwanda rubafasha mu mirimo yabo ya buri munsi. Niyo mpamvu twari dukwiye kurusigasira tukirinda icyatuma ruzimira cyangwa rutokorwa.”

Niyomugabo akomeza agaragaza ko ururimi rw’Ikinyarwanda rukomeje kugenda ruvangirwa n’abarukoresha bavangamo indimi z’amahanga.

Mu bikorwa biteganyijwe bijyana n’ururimi n’umuco, bizatangirira mu karere ka Gakenke kuwa 18 Werurwe 2013, bisorezwe kuri Sitade Nto I Remera kuwa 21 Werurwe 2013, haba imurikabikorwa ryerekeye ururimi kavukire, inama nyunguranabitekerezo ku rurimi kavukire, n’ibirori bitandukanye ku munsi wo gusoza no guhemba bamwe mu bagize uruhare rukomeye rwo guteza imbere no gusigasira umurimi rw’Ikinyarwanda.

Niyomugabo yatangaje ko hazamurikwa ibitabo byanditswe n’Abanyarwanda, ibihangano Nyarwanda nk’indirimbo n’ibindi.

Bimwe mu biganiro bizatangwa n’intiti ziturutse hirya no hino harimo Umunyamabanga Mukuru w’Akademi Nhyafurika y’indimi, Umuyobozi w’Ishuri ry’Igiswayile rya Tanzaniya n’Impuguke muri Gahunda y’umuco mu ishami rya UNESCO.

Insanganyamatsiko yo kuri uyu munsi ikaba izaba igira iti "Ururimi rw’Ikinyarwanda, isoko y’ubumwe n’iterambere."

Inteko Nyarwanda y’Ururimi n’Umuco ifatanyije na Minisiteri ya Siporo n’Umuco batumira abanyarwanda muri ibi bikorwa kugira ngo batekereze ku buryo Ururimi kavukire rwaba umusemburo w’iterambere.