Ibyihariye kuri Dr Ock Park washinze International Youth Fellowship utegerejwe i Kigali

Yanditswe na Evariste Nsengimana
Kuya 16 Mutarama 2020 saa 06:04
Yasuwe :
0 0

Rev. Dr Ock Soo Park washinze Umuryango mpuzamahanga uharanira Iterambere ry’Urubyiruko IYF (International Youth Fellowship), akaba ari nawe muyobozi wawo ku rwego rw’Isi ategerejwe i Kigali ku wa 18 Mutarama 2020, mu ruzinduko rw’akazi.

Dr Ock Soo Park azaba aherekejwe na bamwe mu baririmbyi bagize itsinda rya Gracias Choir yashinze, aho byitezwe ko bazakora amahugurwa adasanzwe yiswe Special Conference on Mind Education, akazabera muri Kigali Marriott Hotel ku wa 18 Mutarama 2020, akazitabirwa n’abantu barenga 600 bazaba bavuye imihanda yose.

Uyu muryango wabayeho mu myaka 20 ishize, umaze kwaguka ku kigero cyo hejuru cyane ugereranyije n’indi kuko kuva washingwa muri Kamena 2001 kugera uyu munsi umaze gukwirakwiza ibikorwa byawo mu bihugu bigera ku 105.

Izina Ock Soo Park rishobora kuba atari rishya mu matwi ya benshi bitewe n’ubwamamare bw’uyu mugabo. Yavukiye mu gace ka Gumi gaherereye mu Ntara ya Gyeongsang –do muri Koreya y’Epfo ku wa 2 Kamena 1944.

Umuvugabutumwa

Dr Ock Soo Park usanzwe ari umuvugabutumwa wamamaye hirya no hino ku Isi, akiri muto yabayeho mu bukene bukabije bitewe n’intambara yari yarayogoje igihugu cyabo. Amaze gukura yagerageje gushaka akazi ahantu hatandukanye ariko ntiyakabona.

Ubuzima bwe bwatangiye gihinduka mu 1962 nyuma yo kubaho mu miruho myinshi yaterwaga no guhora yicira urubanza mu mutima kubera ibyaha yibonagaho ariko nyuma aza gutahura ibanga rikomeye ry’uko ibyaha bye byose byogejwe ku musaraba ubwo Yesu Kristo yapfaga.

Kuva icyo gihe yahise atangira kwigisha ubutumwa bubohora abantu mu byaha. Yashinze umuryango mpuzamahanga w’ivugabutumwa uzwi nka Good News Mission, wamamaye mu ivugabutumwa ukorerera mu bihugu birenga 90 ku isi.

Mu rugendo rwe rw’iyogezabutumwa yagiye ahura n’imbogamizi zitandukanye ariko avuga ko Imana itahwemye kumwigaragariza, inamuha gutera imbere mu murimo yakoraga.

Umwanditsi ukomeye

Mu buzima busanzwe Rev. Dr Ock Soo Park, ni umwanditsi w’ibitabo byinshi bya Gikristo n’ibivuga ku kugira imyumvire iganisha abantu ku iterambere, byamamaye henshi ku isi.

Muri ibyo harimo nka “The Secret of Forgiveness of Sin and Being Born Again’ cyangwa se ibanga ryo kubabarirwa ibyaha no kongera kuvuka ugenekereje mu Kinyarwanda, cyaciye agahigo ko kugurishwa amakopi menshi.

Hari kandi “The Mind Navigation” cyifashishwa n’abantu benshi mu gusobanukirwa imyumvire ya muntu no kuyobora intekerezo umuntu abana nazo mu mutima.

Inyigisho ze kandi zamamaye cyane muri Leta Zunze Ubumwe za Amerika, aho zasohokaga mu rukurikirane mu kinyamakuru cya The New York Times.

Dr. Ock Soo Park ni nawe washinze Korali Gracias Choir kuri ubu ifatwa nk’iya mbere ku Isi mu muziki. Iyi ni Korali yihariye ibihembo bya mbere ku rwego rw’Isi mu myaka irindwi ishize.

Ashyize imbere uburezi n’itangazamakuru

Uyu mugabo uretse kwamamara mu bwanditsi no mu ivugabutumwa, azwi cyane mu rwego rw’uburezi n’itangazamakuru hirya no hino ku Isi. Yashoboye gushinga amashuri makuru na za Kaminuza hirya no hino ku Isi, mu bihugu nka Koreya y’Epfo, u Bushinwa, Kenya no muri Amerika.

Yanashinze kandi ibigo by’itangazamakuru ryandika na Televiziyo, harimo nka GBS TV ikorera muri Kenya.

Gufasha urubyiruko guhindura imyumvire

Muri Kamena 2001 nibwo yashinze umuryango mpuzamahanga wita ku iterambere ry’urubyiruko ‘International Youth Fellowship, IYF, wibanda ku kuzamura ubushobozi bwarwo n’abantu b’ingeri zitandukanye binyuze ku guhindura imyumvire, bizwi nka Mind Education.

Aya masomo amaze imyaka umunani atangwa mu Rwanda hirya no hino mu mashuri, ku barokotse Jenoside yakorewe abatutsi n’izindi ngeri z’abantu. Muri rusange amaze guhabwa abanyarwanda basaga ibihumbi 30

Nyuma Dr. Ock Soo Park yaje gushinga ikigo cy’ubushakashatsi ku bijyanye n’uburezi bw’imyumvire cyitwa International Mind Education Institute (IMEI). Abantu benshi batandukanye ku Isi, bashoboye kwigobotora ibibazo byari bibugarije ku bwo gutahura Isi y’imyumvire no guhindura intekerezo ziganisha mu gutsindwa.

Mu butumwa agenda atanga, avuga ko umuntu adakwiye guhunga ibibazo ahura na byo kuko bimutera kugira umutima woroshye cyane ushobora gushegeshwa n’akantu gato koroheje ahubwo akavuga ko ikiremwamuntu cyifitemo ubushobozi bwo guhangana na buri cyago cyose igihe atahuye uko yagira imyumvire myiza.

Mu bihe bishize Perezida w’igihugu cya Philipines, Rodrigo Duterte, yasabye Dr. Ock Soo Park ko umuryango ahagarariye wamufasha gukemura ikibazo cy’urubyiruko rwo mu gihugu cye rwabaswe n’ikoreshwa ry’ibiyobyabwenge n’urugomo.

Umuryango wa IYF, ugenda utegura amahugurwa hirya no hino ku Isi aho Leta nyinshi n’abakuru b’ibihugu usanga basaba ko we n’umuryango we bakorana mu gufasha urubyiruko n’abandi bantu gukemura ibibazo bibugarije.

Uyu mugabo yabashije kwegukana ibihembo mpuzamahanga n’amashimwe atandukanye bitewe n’ibikorwa by’indashyikirwa yashoboye gukora. Hari nk’icyo yahawe mu 2005 cyiswe New Korean Grand Prize na Africa Leadership Excellence Award, yaherewe muri Kenya mu 2017 n’ibindi.

Umuryango IYF, Dr. Ock Soo Park ahagarariye ni nawo utegura inama mpuzamahanga ngarukamwaka ihuza ba Minisitiri bafite urubyiruko, umuco n’uburezi mu nshingano n’abayobozi b’amashuri makuru na za Kaminuza bavuye impande zose z’Isi mu cyitwa World Youth Minister’s Forum na World Education Leaders Forum.

Ibi byombi bigamije kwigira hamwe uko hafatwa ingamba zigamije gufasha abantu guhindura imyumvire kugira ngo babashe guhangana n’imbogamizi zibugarije mu mibereho yabo.

Dr Ock Soo Park ategerejwe mu Rwanda ku wa 18 Mutarama
Gracias Choir yashinze yahawe ibihembo bitandukanye
Ministers of Youth World Forum niwe wayitangije
Ubwo yahuraga na Perezida Duterte

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .