Icyo Musare Faustin avuga ku itariki ya 1 Ukwakira

Yanditswe na

Karirima A. Ngarambe

Kuya 2 Ukwakira 2012 saa 01:14
Yasuwe :
0 0

Tariki ya 1 Ukwakira IGIHE ishami ryo mu Bubiligi twagiranye ikiganiro na Musare Faustin umwe mu bakoranye mwikubitiro na FPR Inkotanyi kugeza ubu, maze atubwita icyo atekereza ku munsi wo gukunda igihugu.
Musare yakoze imirimo ya politiki itandukanye muri Biro Nkuru ya FPR Inkotanyi, nyuma y’urugamba rwo kwibohora yakomereje imirimo ye muri Misiteri y’Ubutegetsi bw’Igihugu yungirije Minisitiri icyo gihe, ahava ajya gukorera mu biro bikuru bya Perezida aho yari umujyanama wihariya wa (...)

Tariki ya 1 Ukwakira IGIHE ishami ryo mu Bubiligi twagiranye ikiganiro na Musare Faustin umwe mu bakoranye mwikubitiro na FPR Inkotanyi kugeza ubu, maze atubwita icyo atekereza ku munsi wo gukunda igihugu.

Musare yakoze imirimo ya politiki itandukanye muri Biro Nkuru ya FPR Inkotanyi, nyuma y’urugamba rwo kwibohora yakomereje imirimo ye muri Misiteri y’Ubutegetsi bw’Igihugu yungirije Minisitiri icyo gihe, ahava ajya gukorera mu biro bikuru bya Perezida aho yari umujyanama wihariya wa Perezida, ubu akaba ari umujyanama wa mbere w’Ambasade y’u Rwanda mu Bubiligi.

Dore ikiganiro yagiranye n’umunyamakuru wa IGIHE, Karirima A. Ngarambe uba mu Bubiligi.

IGIHE : Watubwira icyo iyi tariki ya mbere Ukwakira ivuze kuri wowe ?

Musare : Tariki ya 1 ukwakira ni umunsi Inkotanyi zatangije urugamba rw’amasasu, ikindi nakubwira kerekeranye n’iyi tariki, ni uko aribwo Abanyarwanda cyane cyane abari mahanga batekereje ukuntu bigobotora ingoma y’igitugu yari iriho, bakaba bari baragerageje inzira zisanzwe za politiki kugira ngo ibibazo byariho bibe byakemuka mu mahoro, ariko nyine byari byarananiranye, nibwo rero abana b’Abanyarwanda, bafashe intwaro biyemeza kuza kubohora u Rwanda.

Bari cyane cyane mu gihugu cya Uganda, barabaye mu gisirikare bamenyereye gukoresha intwaro, nibwo biyemeje rero gutera ngo barwanye Leta yari iriho icyo gihe mu Rwanda, kugirango Abanyarwanda babane mu mahoro.

Kubwanjye rero ni itariki yerekana ubwitange buhebuje umuntu ashobora kugira mu buzima bwe. Mfite icyo mparanira kuburyo bibaye na ngombwa ko mpasiga ubuzima nabikora, icyo nicyo kintu rwose iyi tariki imbwira, kandi inyibutsa mu buryo buhebuje.

IGIHE : Tariki ya Mbere Ukwakira wowe wari he icyo gihe ?

Musare: Jye ku giti cyanjye muri iyo myaka nari ndi mu Rwanda, aho nagarutse muri 1987 mvuye i Burundi no muri Congo. Nyuma ariko habaye impurirane z’ibintu kuko nari naraye mvuye mu Rwanda tariki 30 z’u kwa Cyenda ngana muri Togo i Lomé mu nama nari natumiwemo y’ibyumweru bibiri, nibwo namenye ko urugamba rwatangiye, ubwo mva muri Togo ngana muri Kenya i Nairobi, niho nahuriye n’abanyamuryango benshi abo tuziranye nabo tutaziranye, turamenyana duhita dutangira gukorana dukorera umuryango.

I Nairobi nahamaze igihe cy’umwaka umwe, muri 1991 nibwo nagiye ku rugamba, icyo gihe nari mu ishami ry’abanyapolitiki ariko dukorana na bagenzi bacu bari mu gisirikare. Iyi tariki rero yambereye imbarutso n’umurava, kuko numvaga natanzwe, ariko narinsanzwe ibyo bintu nzi ko birimo bitegurwa, kuko byakorwaga mu ibanga cyane, byari bizwi n’abantu bake abandi batazi igihe urugamba ruzatangirira, byagiye ku mugaragaro rero tariki ya 1 Ukwakira 1990.

IGIHE: Mu geze ku rugamba mwakiriwe mute? Mwasanzeyo bande mwahise mukorana?

Musare: Ubwo navuye Nairobi nca i Kampala naho twari tuhafite ibiro, ariko ndahakorera mu byukuri ibiro bikuru bya FPR Inkotanyi byari hano mu Bubiligi muri Komine ya Uccle, turakomeza tuza kugera ku Mulindi tuhashinga ibirindiro, haza kubaho imishyikirano ya Arusha twagizemo uruhare rukomeye, ni nabwo FPR yamenyekanye cyane muri politiki ubundi ryari ishami rya gisirikare.

Njye rero nakoze mu biro by’umukuru w’umuryango igihe kirekire ariko dutangiye imishyikirano ya Arusha njya mu ikipe yarishinzwe gushyikirana kuva ya tangira kugeza ishojwe, mu byukuri aho niho nakoze cyane ntagiye mu bindi birebire kuva 1991 kugeza twinjiye mu gihugu, aho nakoze akazi ka Leta muri Minisiteri y’Ubutegetsi bw’Igihugu, nyuma nza kujya muri Perezidansi ya Repubulika aho navuye nje gukorera muri Amabasade y’u Rwanda hano i Buruseli.

IGIHE: Ni gute abashinzwe politiki bakoranaga nabashinzwe ingabo?

Musare: Uko byagendaga ni uko umuryango wari umwe, ariko hakabamo ibyiciro bibiri nyine, ishami rya politiki n’irya gisirikare, ariko byose ari inzego z’umuryango umwe, kubya politiki habaga hari Umukuru w’Umuryango n’abamufasha, hakabamo na za komisiyo harimo abashinzwe ibyerekeye imari, politiki, abashinzwe imibanire myiza n’indi miryango irwanya ubutegetsi bw’igitugu tukabasobanurira ibyo tugamije.

Hanyuma ishami rya gisirikare naryo ryabaga rifite ubuyobozi bwihariye, ariko abakuru b’ingabo tugahurira mu nama kugirango twumvikane ku mikorere imwe, ariko ugasanga nyine igisirikare nicyo gifite uruhare runini, kuko ni cyo cyari gifite intwaro,aricyo kijya kurwanira ibyo twari twariyemeje byari bikubiye mu ngingo 8 umuryango wa FPR Inkotanyi wagenderagaho, kandi waharaniraga, ibyo byiciro byombi rero rwose byari bishyize hamwe.

IGIHE: Uva muri Togo wajyanye n’umuryango wawe?

Musare: Icyo gihe nari nkiri ingaragu ariko mfite umufiyanse waje kunsanga muri Kenya, kuko nabonaga ko mu Rwanda ibintu bitameze neza nibwo twakomeje i Bugande ahasanga abavandimwe, kuko yari ahafite umuryango, niho najyaga musanga mvuye nko ku rugamba tugiye nko mu butumwa, nguko uko byari bimeze.

IGIHE: Ni ikihe kintu cyakubayeho muri icyo gihe cy’urugamba udashobora kwibagirwa mu buzima bwawe?

Musare: Icyo gihe muri 1990 nari mfite imyaka 37 nari nkuze nararangije kaminuza naratangiye gukorera amafaranga, kandi nsobanukiwe n’ibya politiki, sinzi niba warigeze kumva abantu 33 bigeze kwandikira Perezida Habyarimana bavuga ko akwiye gufungura ibintu by’amashyaka menshi akorera muri demokarasi, abo bantu rero 33 nanjye nari ndimo, harimo nka ba Twagiramungu Faustin, Rugenera Mariko, Mugesera Antoine n’abandi.

Uretse ko bamwe bagiye batana bagahindura amatwara, ikintu rero cya mbere cyantangaje ari nacyo kitugejeje kuri uyu munsi ni ikintu cy’ubwitange, kubona abantu bafite ubushobozi wari ufite akazi keza bakorera amafaranga haba muri Leta ya Uganda cyangwa y’u Rwanda, Tanzaniya, Kenya, n’ahandi, abanyeshuri bo muri za kaminuza bafite ingo bafite imitungo, ariko umuntu akabisiga akajya ku urugamba aho bamwe basize ubuzima bwabo, bagakora ari ukwitanga nta gihembo bashyize imbere mu mpera z’ukwezi nk’uko bisanzwe, twakoraga kandi kurusha abakorera za Leta, ngicyo ikintu ntazibagirwa cyantangaje cyane no kuba naragize imana nkaba ntaracitse ukuguru cyangwa ukuboko, kuko hari abataragize ayo mahirwe kandi nta kindi umuntu aba yakoze kirenze iby’abandi.

Ntabwo bintangaza rero iyo ndebye ibyo FPR ikora nka moteri y’ubuyobozi buriho ubu, bifite inkomoko.

IGIHE: Mu mwaka wamaze uba hagati yo ku Murindi na Arusha mu mishyikirano, watubwira uko wabonaga perezida Habyarimana mwe mwabaga muri kumwe?

Musare: Ni ibintu birebire, amasezerano yamaze umwaka muzima, icyo navuga rero kuri Habyrimana na MRND n’amashyaka yandi yari mu Rwanda bakoranaga, twe twarababwiraga tuti turifuza ubumwe bw’Abanyarwanda nuko impunzi zataha, mbese imihindukire myiza y’imiyoborere, ibyo byose rero kuri Habyarimana nabo bari kumwe bashyiraga imbere ikintu bitaga Ubwinshi bw’Abahutu, bakavuga ko abantu bavuye hanze atari Abanyarwanda nk’abandi, babaga batsimbaraye ngo kumibereho yaranze Abanyarwanda kuva kera ko itagomba guhinduka, mbese muri make ntacyo bashakaga guhindura.

Iyo rero niyo ntambara ya mbere twarwanye kugirango tubumvishe ko tugomba guharanira ubumwe bw’Abanyarwanda.

IGIHE: Perezida Paul Kagame ni muntu ki nk’umuntu wakoranye nawe igihe kirekire na wa ukanamubera umujyanama wihariye?

Musare: Paul Kagame kumuvuga birakomeye kandi nti bikomeye, impamvu ni uko uko abantu benshi bamuvuga usanga ntaho bihuriye n’uko ateye, hari abamwandikaho cyangwa bakamuvugaho ko akoresha igitugu ko ari umuntu mubi, yewe icyo nakubwira ni uko ibyo nsanga bitandukanye na Paul Kagame nzi, kuko ni umugabo wiyoroshya uzi kuganira n’abandi atishyize hejuru, ufite ibitekerezo bigororotse, ashyira mu gaciro, uzi ubwenge kandi afasha mu gukemura ibibazo by’ingeri zinyuranye nguwo uwo nzi nka Paul Kagame, yanga umuntu ubeshya cyane. Rwose ibyo ni ibintu nahamya, kuko ni umuntu twabanye hafi twaganiriye twakoranye, haba tukiri ku rugamba haba se n’ubu muri Leta.

IGIHE: Ni iki ubona wanenga cyangwa se wakwishimira kuri FPR Inkotanyi yakera n’iya none?

Musare: Ni ikibazo kiruhije, ariko icyo navuga ni nk’uko umuntu avuka akagenda akura, FPR yatangiye ari bantu bakeya bakorana ubwitange kandi mu bihe bigoye, baza kugera kubintu bikomeye byiza ariko icyo gihe nti yayoboraga igihugu, nyuma aho urugamba rurangiriye isura yayo yarahindutse kimwe n’uko abanyamuryano benshi bari hanze, nyuma yaho igiriye ku buyobozi nyuma ya Jenoside yakorewe Abatutsi yashatse abayoboke bandi umubare uriyongera, birumvikana ko byatumye imikorere ihinduka hakurikijwe amategeko ya Leta ibereye ku isonga.

Uko rero abantu bajyenda biyongera ntihabura abakora nab,i ikaba ari nayo mpamvu ubona hari abayoboke bagenda bavamo bateshuka ku ntego z’umuryango, ariko ibyo bibaho kuko abantu bagenda bahinduka neza cyangwa nabi mu buzima.

IGIHE: Nihe mwakuraga imibanire myiza na disipiline mu gihe cy’urugamba?

Musare: Ishingiro ryayo ni ukugira intego, kugira umurongo ugenderaho, muri FPR kiriya gihe twari tuyifite nubu iracyaturanga.

IGIHE: Ni irihe banga wowe wagize kugeza ubu, kugirango ube ukiri umunyamuryango wa FPR wizewe wakoze mu nzego zo hejuru na n’ubu?

Musare: (aseka) Yenda umuntu yatandukanya ibintu bibiri, harimo imiterere y’umuntu na disipiline y’umuryango usabwa, kuko nti waba uvuga ibintu ngo unyuranye nabyo, iryo niryo banga ryanjye.

Uko narezwe uko nabayeho n’icyo gihango umuntu aba yarahanye n’umuryango, nta nubwo bigoye nicyo kintu cyoroshye, ariko uzi ko guhora ukosa uhuzagurika ukora hirya hino aribyo bivuna cyane.

IGIHE: Perezida Paul Kagame naramuka asomye iyi nkuru y’ikiganiro twagiranye, urumva wamuha ubuhe butumwa nk’umuntu mwabanye kandi mwakoranye hafi?

Musare: Nishimira ukuntu yatangiye, ukuntu yakoze kuva ari ku rugamba kugeza ubu, ndamushima rwose uburyo yitwaye bya kigabo, by’intangarugero kandi namubwira nti uzabikomeze.

IGIHE: Ni ubuhe butumwa waha urubyiruko rushaka, cyangwa rwamenye FPR Inkotanyi?

Musare Faustin mu kiganiro n'umunyamakuru wa IGIHE Karirima

Musare: Icyo nabwira urubyiruko ari abari mu Rwanda cyangwa mu mahanga, ni ugukunda igihugu n’ubwo iyo umuntu avuze “Gukunda igihugu” bisa nk’aho ari imvugo isanzwe, mu by’ukuri bivuga kugira ubwitanjye, gukundana, kwirinda kugundira ukagira na gahunda mubyo bakora byose

IGIHE: Ndabashimiye ndangije mbifuriza akazi keza

Musare: Karirima urakoze nawe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza