Majyambere Silas arabivuga byose:Gutunga indege bwambere, kuba ingaragu ifite abana benshi

Yanditswe na

Jean d’Amour Nsabimana

Kuya 31 Mutarama 2012 saa 02:09
Yasuwe :
0 0

Umunyemari w’Umunyarwanda Majyambere Silas waje kwitwa Muhammed yamenyekanye kubera umutungo afite mu bihugu nk’u Rwanda, Djibouti, u Burundi ,ndetse na Uganda.
Nyuma y’uko we ubwe yiyita ingaragu akaba n’umunyemari ariko ushyira mu gaciro, aniyemerera ko muri ibyo bihugu byose afitemo abana benshi.
• Yatangiye ubucuruzi afite imyaka 8 gusa
• Afite imigabane mu makompanyi menshi
• Arateganya kuguma ari umuvugizi wa Djibouti mu by’ubucuruzi muri Uganda
• Ku myaka 65, ni ingaragu kandi (...)

Umunyemari w’Umunyarwanda Majyambere Silas waje kwitwa Muhammed yamenyekanye kubera umutungo afite mu bihugu nk’u Rwanda, Djibouti, u Burundi ,ndetse na Uganda.

Nyuma y’uko we ubwe yiyita ingaragu akaba n’umunyemari ariko ushyira mu gaciro, aniyemerera ko muri ibyo bihugu byose afitemo abana benshi.

• Yatangiye ubucuruzi afite imyaka 8 gusa

• Afite imigabane mu makompanyi menshi

• Arateganya kuguma ari umuvugizi wa Djibouti mu by’ubucuruzi muri Uganda

• Ku myaka 65, ni ingaragu kandi aranabyishimira.

Ibi ni bimwe mubyo Majyambere yaganiriye na Patrick Jaramogi, umunyamakuru wa New Vision dukesha iyi nkuru.

Majyambere Silas Muhammed ni muntu ki?

Ndi umugabo w’imyaka 65 nkaba naravukiye mu cyahoze ari Gitarama mu mwaka w’1945 n’ubwo itariki nyayo y’amavuko bigoye kuyimenya. Ababyeyi banjye bose ni Abanyarwanda bakaba barishwe muri Jenoside yakorewe abatutsi.

Papa yari umwarimu n’ubwo navuye mu ishuri mfite imyaka umunani, nagiye hanze mu gihe cy’imyivumbagatanyo njya mu Bubiligi hanyuma nza kubona n’ubwenegihugu bwa Djibouti aho nahise ngirwa umuvugizi wa Djibouti muri Uganda mu bijyanye n’ubucuruzi.

Waba waratangiye ubucuruzi ryari? Uhereye ku ki?

Natangiye ubucuruzi bwanjye mfite imyaka 8 aho natangiriye ku cyarahani. Ni kuri icyo cyarahani, nari ntunze njyenyine mu gace k’iwacu, nahereyeho nza kugura igare nkajya ntwaraho abantu kugeza n’ubwo nguze imodoka.

Iyo modoka nayikoreshaga njyana amashaza ku Kibuye nkagarura ibishyimbo. Nyuma y’ibyo natangiye gukora ubucuruzi bwo kuvana ibintu i Mombasa nkabizana mu Rwanda. Ni mu gihe igiciro cy’isukari n’umunyu byazamukaga cyane nyuma y’aho uwari umukuru w’igihugu Kayibanda yirukaniye Abarusiya mu 1973.

Igiciro cy’isukari cyavuye ku mafaranga 10 y’Amanyarwanda kigera kuri 400. Nyuma y’uko Habyarimana agiriye ku butegetsi, yamfashije mu bucuruzi bwanjye cyane cyane ubw’ibicuruzwa nakuraga hanze bitakundaga kuboneka.

Mu kumfasha mu bucuruzi bwajye, Leta yangurije ibihumbi magana atanu by’amadorali ($500.000) bituma mbasha kujya nkura hanze isukari, umunyu ndetse n’amasabune.

Nyuma y’aho nagiye mu kubaka imihanda nza kuba umuntu wa mbere watunze indege ikodeshwa mu Rwanda.

Mu by’ukuri, ni iki cyatumye udakomereza ubucuruzi bwawe mu Rwanda?

Ubutegetsi bumaze kuba bubi, bitoroshye kugira icyo wakorera mu Rwanda, ubutegetsi bwa Habyarimana ntibwari gutuma nguma mu Rwanda. Nyuma y’uko abavandimwe banjye batwikiwe mu nzu mu 1990 nahise mpunga jya mu Bubiligi aho nahawe n’ubudahangarwa bwo kutagarurwa mu Rwanda kugeza mu 1992 aho nagiye muri Uganda.

Muri iki gihe waba ushora imari yawe mu bintu ki?

Mfite imigabane mu makompanyi menshi muri Uganda, Resha Royal Hotel iri i Bujumbura mu Burundi nayo ni iyanjye, ndetse nkagira na Imperial Resort Hotel kimwe na Redsea ziri muri Djibouti. Mfite kandi n’ibindi bikorwa bitandukanye mu Rwanda no muri Eritrea.

Hari amakuru avugwa ko ngo waba warahunze kubera ko ushakishwa

Nari mpugiye ku bucuruzi bwanjye bigatuma ntakunda kugenda mu Rwanda n’ubwo benshi batekerezaga ibindi. Mu kwezi k’Ukuboza umwaka ushize nari ndi mu Rwanda mu nama ya cyenda y’umushyikirano ari nabwo Perezida Kagame yampaye umwanya ndavuga, kuki se batamfashe?

Majyambere Silas mu nama y'Umushyikirano 2011
Majyambere Silas

Ese ushyigikiye ko Kagame yiyamamariza indi manda nyuma ya 2017?

Kagame yabisobanuye neza ko atabyifuza; icyo nakwifuza ni ukuzabona umusimbura mwiza ushobora kugera ikirenge mu cye; uwo nzamushyigikira.

Ibintu 7 by’ingenzi kuri Majyambere

1. Gukorana umwete, kwitanga no gusenga

Ndifuza gukuraho imyumvire ko umuntu utarize ntacyo yageraho no kumva ko ibintu byizana nk’uko benshi babitekereza. Mu gihe cyashize nari nkize cyane ku buryo ntabashaga no kumenya amafaranga ntunze ubwo yageraga mu mamiliyari z’amadolari. Yego kuri ubu siko bikiri ariko sindi no mu bakene muri Afurika kandi sinigeze niga bihambaye.

2. Abantu b’intangarugero nakwigiraho

Hari abantu babiri muri politiki bambera intangarugero aribo Perezida Yoweli Museveni wa Uganda na Kagame Paul, Perezida w’u Rwanda. Aba bagabo mbakundira ko bazanye umutekano ahari akavuyo kandi nkomeje no gushima imibanire yabo. Abanezezwaga n’ubwicanyi ubu bafite ikimwaro, bazicuze hanyuma barihe n’ibyo bangije.

Nkunda kandi Umukuru wappolisi muri Uganda (Inspector General of police), Lt.Gen. Kale Kayihura. Iyo atabigiramo uruhare, Uganda iba yarabaye nka Somaliya ubwo abatavuga rumwe na Leta bashakaga kuzamura imvururu mu mihanda. Yahinduye isura ya polisi muri Uganda ubu bameze neza.

3. Akunda gusoma no gusura inshuti ze

Nkunda gufata igihe ndimo gusoma , nkakunda gufata ka cyayi ndetse nkasura n’inshuti zanjye.

4. Abagore benshi n’abana benshi

Sinigeze kandi sinzigera nshaka, cyane ko ndi umwe mu bemera kubana by’igihe runaka kizwi (contractual marriage).

Mfite imyaka 65, ndi ingaragu kandi ndabyishimira. Kuva abavandimwe banjye bicwa nshimishwa no kugira abagore ndetse n’abana benshi kandi ndabafite koko. Iyo ngenda i Kampala, Kigali, Bujumbura abana bakunda kunyita Papa, nkashaka kumenya neza ko ibyo nsanzwe nzi ari byo koko nkababaza ba nyina. Nemeza ko nzi abana banjye.

5. Ikintu gisekeje

Nasabye umukobwa wanjye kunshakira inshuti y’umukobwa igihe ndi i Kigali, na n’ubu aracyabimbereyemo.

6. Ibyo nteganya gukora

Ndateganya kuguma ndi umuvugizi wa Djibouti mu by’ubucuruzi muri Uganda, byashoboka bikaba burundu. Kuki se bitashoboka igihe naba mpawe iyo manda?

7. Imigambi muri politiki

Nta migambi mfite muri politiki. Oya, ku myaka 65 ndananiwe nkeneye kuruhuka no kwita ku mitungo yanjye.

Ngibi bimwe mubyo Majyambere yaganirite na Patrick Jaramogi, umunyamakuru wa New Vision.

uyu Munyemari witabiriye Inama y’igihugu y’Umushyikirano umwaka ushize, ndetse akaniyemeza gushora imari ya miliyoni 10 z’amadolari anafite ubwenegihugu bwa Djibouti, ndetse iki gihugu yagihagarariye muri Uganda no mu Rwanda nk’ushinzwe inyugu zacyo (Consul).

Azwi mu bihugu yagiye ashoramo imari harimo u Rwanda avukamo, Uganda, Kenya, ndetse no mu Burundi aho afite ibikorwa bitandukanye mu mahoteli n’ubukerarugendo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .