00:00:00 IGIHE NETWORK KN KINYARWANDA EN ENGLISH FR FRANCAIS

Ibyo kwitega kuri Coventry University mu Rwanda: Ikiganiro na Prof Lwakabamba

Yanditswe na Rabbi Malo Umucunguzi
Kuya 30 June 2022 saa 07:42
Yasuwe :

Mu gihe u Rwanda rwakiraga inama y’abakuru b’ibihugu na za Guverinoma bagize Commonwealth, CHOGM, wabaye umwanya ukomeye wo gufungura mu Rwanda Coventry University Africa Hub, yiyongereye ku mahirwe abanyarwanda bashobora kubyaza umusaruro mu bijyanye n’uburezi.

Ni ikigo kizaba gishinzwe guhuza ibikorwa bya Coventry University muri Afurika yo munsi y’Ubutayu bwa Sahara, kiyoborwa na Prof Silas Lwakabamba.

Ni umugabo ufite izina rikomeye mu bijyanye n’uburezi muri iki gihugu, kuko abumazemo imyaka myinshi nk’umwalimu ndetse n’umuyobozi.

Mu kiganiro na IGIHE, Prof Lwakabamba yasobanuye umusanzu iyi kaminuza ikwiye kwitegwaho n’imikorere yayo mu buryo bw’umwihariko.

IGIHE: Mwakiriye mute kuba iki kigo gifunguwe muri CHOGM?

Prof Lwakabamba: Ndishimye cyane, kubera ko umwanya nk’uyu twari tuwutegereje igihe kirekire. Turashimira Guverinoma y’u Rwanda na Commonwealth Enterprise Business Council yateguye iyi nama ya Commonwealth, tukagira amahirwe yo gutangiza ikigo cyacu.

Iki kigo cyafunguwe muri Mata umwaka ushize, bifuzaga kugifungura mbere yaho ariko ntibyakunze kubera icyorezo cya COVID-19, mu mwaka ushize babasha kugifungura, none tugitashye ku mugaragaro.

Dufite amahirwe kuko twabashije no gusinyana amasezerano n’abafatanyabikorwa mu nzego za leta barimo Urwego rushinzwe iterambere (RDB), Minisiteri y’Ubuzima, Kaminuza y’u Rwanda, ATL ishinzwe iby’indege, n’Ikigo gishinzwe Ingufu mu Rwanda (REG).

Ibi bigo byose hari ibyo tumaze gukorana ariko dushaka kubigeza ku rundi rwego, tugakorana nabo mu kunoza ibyo bakora haba mu kubaka ubushobozi, guhanga ibishya cyangwa mu bijyanye n’ubushakashatsi.

Coventry University yanasinyanye amasezerano na Minisiteri y'Ubuzima

Byagenze bite ngo iki kigo gishyirwe mu Rwanda?

Urugendo rwabaye rurerure kubera ko cyashoboraga gushyirwa n’ahandi muri Afurika, ariko baje guhitamo u Rwanda kubera ko ari ahantu heza ho gukorera.

Banifashishije ibigo bikomeye mu kugenzura, baza muri Afurika bareba igihugu cyaba cyiza gutangizwamo iki kigo, baza kwemeza u Rwanda.

Imikorere yanyu izaba itaniye he n’iy’izindi kaminuza ziri mu Rwanda?

Twebwe ntabwo tuzaba twigisha, nta n’ubushakashatsi tuzaba dukora. Ahubwo bizaba ari uguhuza za Guverinoma, inganda, za kaminuza, ibigo by’ubushakashatsi n’abikorera, mu kubafasha mu buryo butandukanye.

Nka za kaminuza, twubaka ubufatanye mu burezi, aho nk’abanyeshuri bashobora kwigira aho bari cyangwa bakajya muri Coventry cyangwa bagahabwa andi mahugurwa.

Nk’urugero, ubu turashaka gukorana na Kaminuza y’u Rwanda, aho tuzatangiza porogaramu zitandukanye cyane cyane mu buzima na engineering.

Abanyeshuri nibarangiza bazaba bafite impamyabumenyi ebyiri, iya Kaminuza y’u Rwanda n’iya Kaminuza ya Coventry.

Icya kabiri ni ikijyanye n’ubushakashatsi. Kaminuza ya Coventry iri ku rwego rwo hejuru mu bijyanye n’ubushakashatsi kandi buzana impinduka mu mibereho y’abaturage.

Icyo dukora, dushaka abafatanyabikorwa ku mishinga nk’iyo mu nzego zaba ubuvuzi, ibidukikije, ubuhinzi cyangwa ubumenyi n’ikoranabuhanga, tukabahuza n’abahanga bo muri Coventry University.

Icya gatatu ni ugufasha inganda. Tuzobereye mu gufasha inganda mu guhanga ibishya, tukareba ibikorwa mu nganda, tukaba twabafasha kuzamura imikorere yabo, mu gukora neza kurushaho.

Icya kane ni ugufasha abanyeshuri bacu. Iyo urebye Coventry University, abanyeshuri bayo bose, kubera ko ikora ibishoboka byose ngo bahure n’inganda, bakore mu nganda, kugeza ku mwaka umwe uzasanga 97% by’abanyeshuri bacu bahita babona akazi mu nganda.

Iryo ni ijanisha riri hejuru utapfa kubona ahandi kubera uburyo twigishamo. Ni ibyo tugiye gukora muri ibi bihugu tuzaba dukoreramo.

Mubigenza gute ngo abanyeshuri babone ubumenyi bujyanye n’ibikenewe ku isoko?

Dukorana n’inganda, tukazibaza icyo bashaka ko dukora, ibintu tudakora muri kaminuza zo muri Afurika ngo tubaze ngo abanyeshuri mushaka bakwiye kuba bameze bate, tukabona abakora mu nganda bakaza kwigisha aba banyeshuri, ndetse bakajya kuzikoramo.

Iyo basoje amasomo baba bazi ibyo bagomba gukora, bagahita babona akazi. Izo ni zimwe mu ngero dushaka kugerageza hamwe n’abafatanyabikorwa bacu.

Kaminuza y’u Rwanda muzakorana mute?

Kaminuza y’u Rwanda yadusabye ko twakorana mu bijyanye n’ubuvuzi ndetse na engineering.

Ariko bishobora no kuba mu bindi, mu bucuruzi, icungamutungo, amahoro n’umutekano, amazi, ubutaka n’izindi nzego z’ubuhinzi, izo zose tuzibamo haba mu bushakashatsi, gutanga amahugurwa, guhanga ibishya…

Coventry University ishaka kuba umufatanyabikorwa mu iterambere ku bafatanyabikorwa bacu bose muri Afurika.

Mufite intego y’abanyeshuri mwifuza gufasha mu Rwanda?

Nk’urugero Coventry University ifite abanyeshuri basaga 50.000 ku isi hose, u Rwanda ruzongera iyo mibare.

Twifuza gufasha benshi bashoboka igihe cyose ari abafatanyabikorwa bifuza ko dukorana.

Wenda reka tuvuge nk’abanyeshuri barangiza kaminuza hano ku mwaka ni nka 60.000, birashoboka cyane kugira ijanisha rinini muri uyu mubare.

Ni gute ubunararibonye ufite mu burezi buzafasha muri uru rugendo?

Natangiye nk’umwarimu muri Kaminuza guhera mu 1971, ni mu myaka 51 ishize, kandi nishimiye gukora mu nzego n’ibihugu bitandukanye, muri Tanzania, Nigeria, mu Rwanda cyabaye igihe kirekire kurushaho.

Kimwe mu bintera ishema kurusha ibindi ni ugutangirana n’ibigo bikubaka ubushobozi mu nzego zitandukanye, mu bihugu byinshi.

Muri Tanzania, muri Afurika - ubwo nari muri Nigeria twakoraga ku rwego rwa Afurika - ndetse no mu Rwanda nk’urugero, abanyeshuri benshi bize muri KIST na NUR, ubu bari mu myanya ikomeye, iyo hejuru, iho hagati n’indi, barimo kuzana impinduka mu Rwanda.

Ibyo bintera ishema ko natanze umusanzu wanjye muto, natangije inzego nka KIST ubu ni Ishuri ry’Ubumenyi n’Ikoranabuhanga hano mu Rwanda, nagize uruhare mu kuvugurura Kaminuza y‘u Rwanda n’ibindi.

Nabaye muri Minisiteri, ubu ndi mu rwego rw’abikorera, ntekereza ko ibi bintera ishema kubona ko urimo gutanga umusanzu mu kuzana impinduka no guha abantu ubushobozi bakigirira icyizere, bakazana impinduka kuri bo ubwabo, imiryango yabo n’igihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .