Imbamutima za Miss Iradukunda Liliane mbere y’amasaha make ngo atange ikamba

Yanditswe na Muvunyi Arsène
Kuya 26 Mutarama 2019 saa 09:58
Yasuwe :
0 0

Habura amasaha make ngo hatorwe umukobwa uhiga abandi mu bwiza, ubwenge n’umuco, ahabwe ikamba rya Nyampinga w’u Rwanda w’umwaka wa 2019, asimbure Iradukunda Liliane watowe umwaka ushize.

Iradukunda yatorewe kuba Nyampinga w’u Rwanda 2018 mu muhango wabareye muri Kigali Convention Centre, ku wa 24 Gashyantare 2018.

Uyu mukobwa w’imyaka 19 wanatowe nk’uzi kwifotoza, agaragirwa na Umunyana Shanitah na Irebe Natacha Ursule. Yari yarahigiye guteza imbere ubukerarugendo bushingiye ku muco.

Iradukunda Liliane yanahagarariye u Rwanda mu irushanwa rya Miss World ryabereye mu Mujyi wa Sanya mu Bushinwa mu Ukwakira 2018, abasha kuza mu bakobwa 25 bafite ubwiza bufite intego.

Mbere y’uko atanga ikamba mu birori bigomba kubera muri Intare Conference Arena i Rusororo kuri uyu wa Gatandatu, Miss Iradukunda yaganiriye na IGIHE, avuga ku byaranze umwaka amaze nka Nyapinga w’u Rwanda n’urugendo rwe ruri imbere.

IGIHE: Urumva umeze ute mbere y’amasaha make ngo usimburwe ku mwanya wa Nyampinga w’u Rwanda?

Miss Iradukunda: Ndishimye cyane! Harabura amasaha make kugira ngo mpereze murumuna wanjye ikamba, Nyampinga w’u Rwanda 2019. Umwaka wa 2018 wangendekeye neza cyane waranzwe n’ibikorwa byiza bitandukanye kandi nafatanyije na bagenzi banjye twari turi kumwe, muri make wari umwaka nishimiye cyane.

IGIHE: Hari ibikorwa wari warahize. Wabigezeho?

Miss Iradukunda: Yego. Ubwo nari ndi mu mwiherero nahigiye abanyarwanda kuzakora imishinga itandukanye. Nakoze umushinga nari nshyize imbere igihe niyamamarizaga kuba nyampinga w’u Rwanda 2018, ubukerarugendo bushingiye ku muco.

Natangiye nkorana n’ibigo bitandukanye byo mu karere ka Ngororero, ntegura iserukiramuco, harimo amarushanwa yo kubyina imbyino za Kinyarwanda, kwivuga n’ibindi bitandukanye byerekeranye n’umuco wacu.

Nyuma yaho nakoranye n’abakobwa 19 twari turi kumwe mu mwiherero, twakoranye umushinga wo kurwanya imirire mibi n’igwingira ry’abana kuko twararebye dusanga ni cyo kibazo cyugarije u Rwanda, twishyira hamwe.

Twasuye uturere dutandukanye twugarijwe n’iki kibazo tukubakira abantu uturima tw’igikoni, tukabigisha indyo yuzuye kugira ngo icyo kibazo kibe cyagabanuka.

IGIHE: Hari icyo ubona utagezeho nk’uko wari wabishakaga?

Miss Iradukunda: Iyo uvuga ibyo bikorwa uba wumva umwaka ari munini cyane, uzaba warageze kuri ibyo bintu byose. Ariko ntabwo ari munini nk’uko umuntu aba abitekereza. Hari ibyo utangira ukabikora nk’uko nabikoze ariko ntabwo ndagera aho nshaka kandi ndumva ngifite urugendo runini kugira ngo ngere aho nshaka, n’ubwo ntanze ikamba imishinga yanjye iracyakomeje.

IGIHE: Ni izihe mbogamizi wahuye nazo muri uru rugendo?

Miss Iradukunda: Muri uru rugendo ntabwo navuga ko nahuye n’imbogamizi nyinshi kuko nka Nyampinga w’u Rwanda, abanyarwanda baranshyigikiye mu mishinga yose nari mfite, nagiye mbona ubufasha butandukanye. Ntabwo navuga ko nahuye n’imbogamizi ahubwo nahuye n’amahirwe menshi kubera iri kamba.

IGIHE: Inshingano za Nyampinga w’u Rwanda ziroroshye?

Miss Iradukunda: Inshingano za Nyampinga w’u Rwanda ntabwo zikomeye nk’uko benshi babitekereza, abantu benshi bumva ko ari inshingano zigoye ariko icya mbere ni uguha agaciro iryo kamba ufite kandi ukaba ufite intego. Iyo ibyo byose ubishyize ku murongo nizera neza ko bitakugora. Byaranyoroheye, byambereye byiza.

IGIHE: Ni iki wungukiye mu kuba Nyampinga w’u Rwanda?

Miss Iradukunda: Hari imiryango myinshi yafungutse bitewe n’uyu mwanya mfite, hari aho mbere nashoboraga kuba najya ariko simbe nakingurirwa nk’uko uyu munsi nkingurirwa. Ni amahirwe menshi ngenda mbona bitewe n’ikamba mfite…ni byinshi navuga.

IGIHE: Ni iki cyahindutse mu buzima bwawe nyuma kuba Nyampinga w’u Rwanda?

Miss Iradukunda: Icyambere ni ugukura. Hari ubundi buryo uhinduka mu mitekerereze bitewe n’izo nshingano uba ufite, hari ukuntu uhinduka ugatekereza imishinga wakabaye ukora, ni byinshi byahindutsee nkanjye ku giti cyanjye. Ntabwo navuga ko Liliane uko yari ameze ajya guhatanira ikamba ari nka Liliane utanze ikamba.

IGIHE: Ni irihe somo wize muri uyu mwaka wose ushize?

Miss Iradukunda: Isomo nakuye hano ni uko ngomba kugira uruhare mu iterambere ry’igihugu cyanjye nka Nyampinga w’u Rwanda 2018, ngomba gukora ikindi nzajya ndeba nka njye nkavuga nti ‘nakoze kino kintu, nagiriye abantu runaka akamaro,’ nkavuga ko iri kamba ntaripfushije ubusa.

IGIHE: Nyuma yo gutanga ikamba ufite iyihe mishinga?

Miss Iradukunda: Ngiye gutanga ikamba, ngiye kuriha murumuna wanjye, yego ndarimuhaye ariko ntabwo bivuze ngo kuba nditanze imishinga yanjye irarangiye, ndekeye kuba Nyampinga w’u Rwanda.

Nabaye Nyampinga w’u Rwanda 2018 kandi ndibaza ko nta wundi uzaba we. Ngomba gukomeza iryo kamba nkarigumana ku mutwe nkumva ko ntaritanze ngo ibintu bihagarare, ahubwo ko urugendo ubu rutangiye.

IGIHE: Ni ibiki uzibandaho?

Miss Iradukunda: Muri uyu mwaka ngiye gukomeza imishinga yanjye itandukanye natangiye, ikindi ni ugukomeza nkita cyane ku masomo n’ubuzima bwanjye bwite.

IGIHE: Uzatangira ryari? Uziga ibiki?

Miss Iradukunda: Nziga inaha, nzatangira muri uyu mwaka. Ndashaka kwiga ibijyanye n’Imicungire y’Ubucuruzi kuko ngereranyije muri uyu mwaka, nagiye niga kuba nakwihangira imirimo. Niyo mpamvu nashatse kwiga ibyerekeranye n’ubushoramari.

IGIHE: Ni iki Nyampinga uzagusimbura akwiye kwitega?

Miss Iradukunda: Kugeza ubu nta kintu navuga ko cyambereye imbogamizi ikomeye ku buryo navuga ngo acyitege, ariko ubutumwa namuha nka mukuru we, azanyegere nk’uko negereye bakuru banjye, nzaba mpari ku bwe, nzamufasha nk’umuntu wabiciyemo.

IGIHE: Ni iyihe nama wagira uzagusimbura?

Miss Iradukunda: Namusaba kuzitwara neza, agakorana na bagenzi be kuko simpamya ko kwikorana wenyine bifite imbaraga kuruta uko wakorana na bagenzi bawe, agakunda igihugu kandi agakomeza kugira indangagaciro z’umunyarwandakazi kuko azaduhagararira hanze y’igihugu. Ndamwifuriza amahirwe masa!

IGIHE: Ni uwuhe uha amahirwe yo kweguka ikamba rya Nyampinga w’u Rwanda 2019?

Miss Iradukunda: Kuba bose bageze aha uyu munsi ni uko bafite ubwo bushobozi bwo kwegukana ikamba rya Nyampinga w’u Rwanda. Rero mbona bose bashoboye kandi barabikwiriye.

Iradukunda Liliane amaze umwaka ari Nyampinga w'u Rwanda
Habura amasaha make ngo Miss Iradukunda atange ikamba
Miss Iradukunda Liliane yibanze ku kurwanya imirire mibi
Yafatanyije n'abandi kubakira umuryango utishoboye ku kirwa cya Nkombo
Iradukunda Liliane yahagarariye u Rwanda mu irushanwa rya Miss World 2018
Mu irushanwa rya Miss World riheruka, Iradukunda Liliane yaje mu bakobwa 25 mu cyiciro cy'abafite imishinga myiza
Impanuro yahawe na Sonia Roland wabaye Miss France 2000 zaramuherekeje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza