Ibyo wagenderaho uhitamo umuntu mwiza uzagusigaranira abana umaze gupfa

Yanditswe na Iradukunda Serge
Kuya 10 Kanama 2019 saa 08:49
Yasuwe :
0 0

Kuba umubyeyi n’inshingano zijyana no guhangayika ndetse no guhorana ubwoba bikarushaho kugorana iyo bije ku gufata umwanzuro ku warera abana bawe igihe wowe n’uwo mwashakanye mwahura n’ikibazo cyatuma mutabasha kwikorera izo nshingano, nk’urupfu.

Ibyiyumviro ko umunsi umwe ushobora kwitaba Imana ugasiga utareze abana bawe nk’uko wabishakaga, cyane mu gihe waba ubasize bakiri bato birababaza, gusa n’iby’ingenzi ko wakora inyandiko yemeza umuntu wifuza ko yazarera abana bawe mu gihe wowe n’uwo mwashakanye mutakiriho kuruta ko urukiko ari rwo rwazagena ubarera.

Hifashishijwe ibitekerezo by’abanyamategeko batandukanye bagejeje ku kinyamakuru Huffpost, ibi ni bimwe mu bibazo ukwiye kwibaza mu gihe urimo gufata umwanzuro ku uzarera abana bawe udahari.

Ese abana bazimurwa?

Ushobora kuba ufite inshuti n’abavandimwe hafi mu gihugu hose ndetse no ku Isi muri rusange, ibi bishobora kukubera ikibazo mu gihe uri guhitamo uzabana n’abana bawe mu gihe udahari.

Umunyamategeko witwa Ann Margaret Carozza yavuze ko biba byiza igihe uhisemo umuntu uzakomeza kurerera abana bawe aho babaga.

Ati “Nagira inama ababyeyi b’abana bakiri mu mashuri guhitamo umuntu utazahindura aho abana babaga, sosiyete babagamo ndetse n’amashuli bigagamo”.

Ibi bizatuma bakomeza kubana n’inshuti bamenyereye n’ahantu bamenyereye bityo bibafashe.

Bafite imyaka ingahe?

Ni byiza ko utekereza ku myaka y’uwo uhisemo gusigira abana bawe ugendeye kuyo nabo bafite.

Umunyamategeko Laurie Giles avuga ko imyaka ari ingenzi mu guhitamo uzarera abana bawe.

Ati “Hitamo uzaba umubyeyi mwiza ku mwana wawe, niba ubu afite imyaka 65 akaba ari umubyeyi ushoboye mu gihe umwana wawe akiri muto, ibaze niba igihe azaba afite imyaka 78 azaba akiri umubyeyi ushoboye kurera ingimbi cyangwa umwangavu”.

Ese duhuje indangagaciro?

Ikintu gihangayikisha ababyeyi benshi ni ukumenya niba abo bazasigira abana babo bazakomeza kubarera mu murongo w’indangagaciro babatoje.

Carozza avuga ko ari ingenzi guhitamo umuntu ubona mujya guhuza indangagaciro ngo azabe ari we usigarana abana bawe.

Ati “Ushobora kumva utanejejwe n’uko uzasigarana abana bawe mudahuje imyemerere n’indangagaciro niyo mpamvu ukwiye kureba niba muhuje uburyo bwo kurera”.

Ese bazi gucunga amafaranga?

Ni byiza kureba niba umuntu wemeje ko azasigarana abana bawe afite ubushobozi bwo gucunga amafaranga neza, cyane cyane mu gihe waba hari ayo ubasigiye ngo azabafashe.

Umunyamategeko Carrozza ati “Urugero umuvandimwe wanjye ni umuntu wujuje ibindi byose ariko iyo bije ku mafaranga biba ikibazo, nshobora ku mugira uzasigarana abana banjye ariko ngahitamo undi uzagena uko amafaranga yabo akoreshwa”.

Ese babanye gute n’abana ?

Ni byiza ko uhitamo umuntu usanzwe afite uburyo bwiza abanyemo n’abana bawe ndetse bamwishyikiraho.

Iyi ngingo yemezwa n’amagambo yavuzwe n’umunyamategeko Katie De Leon wagize ati “Ababyeyi b’umugabo wanjye ntibakunze gushyikirana n’umuhungu wacu, niyo mpamvu ababyeyi banjye ari bo bazamusigarana kuko bo babanye neza nawe”.

Ese ni ngombwa ko aba uwo mu muryango?

Ababyeyi benshi bumva ko ari ngombwa ko abana bazasigaranwa n’umuntu wa hafi mu muryango gusa ibi si ngombwa cyane buri gihe.

Ashley Robinett yemeza ko buri gihe umuryango atari abo muhuje amaraso cyane ko we yahisemo ko inshuti y’umugabo we n’umugore we ari bo bamurera abana igihe yaba atagihari kubera ubushobozi ababonamo mu kurera, urukundo ndetse n’ubushobozi bafite mu gukoresha amafaranga.

Ese arabishaka?

Iyi n’ingingo y’ingenzi kuko n’ingombwa ko uwo ushaka gusigira izo nshingano nawe aba abishaka nk’uko Giles yabivuze.

Ati“Si ngombwa ko uhitamo mushiki wawe kuko ari umubyeyi mwiza ku bana be bamaze gukura, kuko ushobora gusanga atagishaka kurera akeneye umwanya wo kujya kwibera ku mucanga”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza