Mu bushakashatsi bwa Loni bwasosohotse mu 2012 ku gushaka kw’abakobwa batarageza ku myaka y’ubukure, bwagaragaje ko iyo abana basobanukiwe n’ukuri ku buzima bw’imyororokere (nk’imikorere y’ibitsina) baba bashobora kwirinda gushaka badakuze kuko basobanukirwa n’ingorane zo kubyara ukiri muto.

Mu gihe kuri uyu wa 16 Kamena ari umunsi mpuzamahanga w’umwana w’Umunyafurika, ababyeyi bagomba kwitabira gusobanurira abana babo ibijyanye n’ubuzima ndetse n’imikorereshereze y’ibitsina kuko bigira uruhare mu kubarinda gushyingiranwa badakuze.

Uyu munsi wijihijwe ku rwego mpuzamahanga ufite nsanganyamatsiko igira iti, “ Ingaruka zo gushyingiranwa ukiri muto.”

Amakuru dukesha Allafrica ashimangira ko mu ngaruka zikunda kugaragara cyane muri Afurika ari impfu ziterwa no kubyara ukiri muto, umubare w’abana wiyongera, gutandukana kw’abashakanye batamaranye igihe, kwiyongera kw’agakoko gatera SIDA n’izindi nyinshi.

Izi ngaruka zikunda kwibasira abagavu bashyingiranwa bakiri hagati y’imyaka 13 na 19 y’amavuko.

Ubushakashatsi bwakozwe na Loni mu mwaka wa 2012, bugaragaza ko umubare w’abasaga miliyoni 14 z’abangavu bashaka bari munsi y’imyaka 18 uboneka muri Afurika bityo bikaba bisaba ingufu nyinshi ku bihugu by’Afurika mu guteza imbere uburenganzira bw’umukobwa.

Bityo umunsi w’umwana w’Afurika uratanga amahirwe ku bayobozi b’ibihugu by’Afurika yo gushyiraho gahunda nshya yo kugabanya ibitera abangavu gushaka bakiri bato birimo imigenzo gakondo, ubukene, n’ibindi.

Mu Rwanda uyu munsi wijihirijwe mu Murenge wa Mudende, Akarere ka Rubavu aho umuhango wibanze ku mirimo mibi igikoreshwa abana bakiri bato. Mu Rwanda ho imyaka yemewe n’amategeko ko umukobwa yashaka igera kuri 21 nubwo muri iyi minsi mu Nteko Ishinga Amategeko hatangiye kumvikana ibitekerezo by’uko yamanurwa ikagera kuri 18 mu mategeko agenga umuryango.