00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Yatewe inda afite imyaka 14 none ubuzima buramugoye

Yanditswe na Prudence Kwizera
Kuya 28 Gicurasi 2021 saa 08:35
Yasuwe :
0 0

Umukobwa w’imyaka 14 y’amavuko wo mu Murenge wa Kitabi mu Karere ka Nyamagabe atwite inda nkuru yatewe imburagihe none ubuzima buramugoye ndetse nta n’ubutabera yigeze ahabwa ngo uwamuhohoteye abiryozwe.

Uwo mukobwa twise Mbabazi kubera kwanga gushyira amazina ye mu itangazamakuru kuko akiri muto, asanzwe atuye mu Mudugudu wa Kintobo mu Kagari ka Kagano. Abana na nyina hamwe n’abandi bavandimwe bane, ni we mfura mu muryango wabo.

Yavuze ko yafashwe ku ngufu n’umugabo utuye hakurya y’iwabo mu Mudugudu wa Subukiniro, amutera inda muri Nzeri 2020 ubwo yari yagiye mu ishyamba kwahira ubwatsi bw’amatungo. Icyo gihe yari umunyeshuri yiga mu mwaka wa gatanu w’amashuri abanza.

Ati “Yansanze mu ishyamba aho nari ndi kwahira mbona ari kundebana umujinya arangije aramfata. Ni umugabo wari ushinzwe gucunga ibinyomoro ariko ndamuzi.”

Ibyo bikimara kuba yaratashye agira ubwoba bwo kubibwira ababyeyi be kuko ngo uwo mugabo wamusambanyije yari yamubwiye ko nabivuga azamwica.

Hashize igihe atibuka neza yabwiye nyina ibyamubayeho na we ahita amujyana kwa muganga bamupimye basanga atwite. Avuga ko muri Mutarama 2021 bagiye no ku rwego rw’Igihugu rw’Ubugenzacyaha, RIB, gutanga ikirego kuri ubu bakaba bagitegereje.

Ati “Twagezeyo bambaza amazina ye nyababwiye baravuga ngo ntabwo bari kumubona mu mashini, ngo tujye ku Mudugudu kuzana imyirondoro ye, ubwo ndagenda Umuyobozi w’Umudugudu arawumpa [umwirondoro] ndawujyana kuri RIB, ubu nari ngitegereje igisubizo.”

Uyu mwana w’umukobwa bigaragara ko ananiwe kubera ko inda isa n’iyamuguye nabi, avuga ko gutwita byamubujije gusubira mu ishuri kandi ubuzima abayemo bugoye kuko ababyeyi be bahora mu makimbirane.

Mbabazi avuga ko uwo mugabo wamusambanyije, nyuma yaho yakoze icyaha cyo kurwana arafungwa, kuri ubu akaba agifunze. Uwo mugabo ngo afite umugore n’umwana umwe.Avuga ko bagowe n’ubuzima kuko barya ari uko nyina avuye guca inshuro.

Mbabazi kimwe na bagenzi be bo mu Karere ka Nyamagabe batewe inda imburagihe bahurijwe hamwe n’Ikigo giharanira Uburenganzira no guteza imbere Ubuzima, Health Development Initiative (HDI), kugira ngo bagirwe inama y’uko bakwiye kwifata ndetse bafashwe no mu rwego rw’amategeko.

Mporanyi Théobald, Umujyanama muri HDI akaba yarigeze no kuba Depite mu Nteko Ishinga Amategeko y’u Rwanda mu gihe cy’imyaka 10, yavuze ko Leta y’u Rwanda yashyizeho ibihano bikakaye ku basambanya abangavu, ariko hakiri imbogamizi.

Ati “Kugira ngo ikibazo kiranduke ni uko ababyeyi babanza kujya ku isonga yo kudahishira abahohoteye abana babo, n’abana babikorewe bakigishwa bakaba ari bo berekana ababahohoteye. Birumivikana biragoye kuko muri abo ngabo hari abahohoterwa n’abarenze babiri cyangwa batatu bikagorana kumenya uwamuteye inda uwo ari we ariko ntekereza ko gutera inda atari byo byonyine bikwiye kugenderwaho kuko n’utayimuteye aba yamuhohoteye.”

Yavuze ko ubusanzwe amategeko ateganya ko inda Mbabazi yatewe agomba kuyikuramo kuko yafashwe ku ngufu kandi akiri umwana. Yavuze ko ariko kuri ubu bidashoboka kuko ibyumweru 22 byarenze.

Ati “Iteka rya Minisitiri w’Ubuzima risobanura uwemerewe gukuramo inda n’igihe bigomba gukorerwa, ni ukuvuga inda itarengeje ibyumweru 22 [amezi atanu n’igice] bigakorerwa ku bitaro bikuru by’Akarere byemewe bya Leta cyangwa ibyigenga biri ku rwego rw’ibitaro ibyo twita Polyclinic byemewe na Minisiteri ifite mu nshingano zayo ubuzima.”

Umuyobozi w’Akarere ka Nyamagabe, Uwamahoro Bonaventure, yavuze ko abangavu barenga 450 bataregeza ku myaka 18 y’amavuko bo muri Nyamagabe batewe inda imburagihe muri uyu mwaka wa 2020/21 ariko abagabo n’abasore babasambanyije bahahanwe bakiri bakeya.

Yasabye ababyeyi ubufatanye mu gukumira isambanywa ry’abangavu no kudahishira ababasambanya, asaba n’izindi nzego gukomeza kongera ingufu mu guhana abagabo n’abasore basambanya abangavu.

Yatewe inda imburagihe afite imyaka 14 y'amavuko none ubuzima buramugoye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .