00:00:00 IGIHE NETWORK KN KINYARWANDA EN ENGLISH FR FRANCAIS

Byiringiro Lague yarongoye, Gen Kabarebe amwizeza kumushyigikira (Amafoto)

Yanditswe na Eric Tony Ukurikiyimfura
Kuya 8 Ukuboza 2021 saa 01:35
Yasuwe :

Umuyobozi w’Icyubahiro wa APR FC akaba n’Umujyanama wa Perezida Kagame mu by’Umutekano, Gen James Kabarebe, yemeye kubakira rutahizamu w’Ikipe y’Igihugu ‘Amavubi’ na APR FC, Byiringiro Lague warushinze na Uwase Kelia mu bukwe bwabaye ku wa Kabiri, tariki ya 7 Ukuboza 2021.

Byiringiro Lague na Uwase Kelia bagombaga gukora ubukwe ku wa 4 Ukuboza ariko bwimurirwa ku wa 7 Ukuboza 2021 kubera umukino APR FC yahuyemo na RS Berkane tariki ya 5 Ukuboza muri Maroc.

Ku wa Kabiri, ni bwo habaye umuhango wo gusaba no gukwa no gusezerana imbere y’Imana mu birori byabereye muri Luxury Palace iri ahazwi nka Norvège.

Ubukwe bw’aba bageni bwari bwitabiriwe n’abantu batandukanye barimo Umuyobozi w’Icyubahiro wa APR FC, Gen James Kabarebe; Perezida wa Police FC, ACP Rangira Bosco; Umunyamabanga Mukuru wa APR FC, Masabo Michel n’abandi bo muri iyi kipe barimo umutoza wayo mukuru, Mohamed Adil Erradi.

Byiringiro Lague yari agaragiwe na Butera Andrew nka ‘parrain’ mu gihe yari yambariwe n’abo bakinana barimo Nshuti Innocent, Rwabuhihi Aimé Placide, Ruboneka Jean Bosco, Mugunga Yves, Nsabimana Aimable na Buregeya Prince.

Umunyezamu wa AS Kigali, Ntwari Fiacre, Kapiteni wa Police FC, Nshuti Dominique Savio na mugenzi we, Nsabimana Eric ‘Zidane’ bari mu batashye ubukwe bwa Byiringiro Lague.

Gen James Kabarebe yashimiye Byiringiro na Uwase ku ntambwe bateye, avuga ko nubwo atabatwereye ariko azabubakira.

Ati “Uyu munsi naje kubashyigikira ku giti cyanjye, atari nk’Umuyobozi wa APR FC kuko barahibereye, ahubwo kuko muri abana banjye. Ntabwo nabatwerereye kuko iyo mbatwerera, byose byari gusigara muri ibi biri hano kandi ntabwo mubitahana. Nimutuza, muruhutse, nzabubakira kandi neza.”

Uretse ababyeyi n’inshuti z’umuryango wa Byiringiro Lague n’uwa Uwase Kelia bashimiye aba bageni bakanabagenera impano, mu bandi babagabiye harimo Team Manager wa APR FC, Maj Guillaume Rutayisire wabahaye inka.

Umunyamakuru wa siporo kuri RBA, Nkurunziza Ruvuyanga Emmanuel, na we yahaye Byiringiro Lague inka, avuga ko yayimwemereye bari muri Maroc ubwo yamusabaga gutsinda igitego. Uyu mukinnyi w’imyaka 21 ni we watsinze igitego APR FC yabonye imbere ya RS Berkane nubwo umukino yawutsinzwe ibitego 2-1 ntigere mu matsinda ya CAF Confederation Cup.

Munyaneza Jacques ‘Rujugiro’ ufana APR FC, yahaye Byiringiro Lague isake izajya imubyutsa akajya mu myitozo.

Mu mpera za Nzeri uyu mwaka ni bwo Byiringiro na Uwase Kelia basezeranye imbere y’amategeko mu Murenge wa Nyarugenge mu Karere ka Nyarugenge.

Byiringiro yazamuwe mu Ikipe Nkuru ya APR FC muri Mutarama 2018 avuye muri Intare FC yagezemo avuye muri Vision FC.

Yatsinze ibitego bitandatu muri Shampiyona ya 2019/20 n’ibitego bitandatu muri 2020/21.

Kuri ubu, akunze gukina yambaye ‘casque’ imurinda umutwe kuko igufa ryo mu gahanga ryangiritse ubwo yakubitwaga inkokora n’umukinnyi wa Kenya ubwo yakinaga n’Amavubi muri Nzeri, byatumye amara amezi abiri adakina.

Byiringiro Lague na Uwase Kelia basuhuza Gen James Kabarebe wari watashye ubukwe bwabo
Mupenzi Eto'o ushinzwe igura n'igurisha ry'abakinnyi muri APR FC na we yari muri ubu bukwe
Umuyobozi wa Police FC, ACP Rangira Bosco ari kumwe n'Umunyamabanga Mukuru wa APR FC, Masabo Michel
Butera Andrew ni we wari 'parrain' wa Byiringiro Lague
Byiringiro Lague na Uwase Kelia bitegura gukata umutsima
Byiringiro na Uwase basuhuza abantu batandukanye babatahiye ubukwe bwabereye muri Luxury Palace
Perezida w'Icyubahiro wa APR FC, Gen James Kabarebe yashimiye Byiringiro na Uwase Kelia ku ntambwe nshya bateye
Gen Kabarebe yabijeje kubashyigikira, avuga ko azabubakira
Umunyamakuru wa RBA, Nkurunziza Emmanuel 'Ruvuyanga' yahaye Lague inka
Abakinnyi ba APR FC bahaye impano Byiringiro Lague n'umufasha we
Buregeya Prince uri mu ba kapiteni ba APR FC, yavuze mu izina rya bagenzi be
Umutoza wa APR FC, Adil Erradi Mohammed, yashimiye Byiringiro Lague ku ntambwe yateye
Umutoza Adil Mohammed Erradi aganira na Mupenzi Eto'o
Umunyamakuru wa siporo, Nkusi Denis, na we yari muri ubu bukwe
Team Manager wa APR FC, Maj Rutayisire Guillaume, yahaye inka Byiringiro Lague na Uwase
Buteera Andrew n'umufasha we baha impano Byiringiro na Uwase Kelia
Munyaneza Jacques 'Rujugiro' yahaye Byiringiro isake izajya imubyutsa agiye mu myitozo
Byiringiro na Uwase Kelia bashimiye Gen James Kabarebe banamushyikiriza impano
Umutoza wungirije wa APR FC, Jamel Eddine Neffati, yitabiriye ubu bukwe ari kumwe n'umukunzi we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .