Uyu mupasiteri w’inshuti y’u Rwanda, ni we washinze Itorero rya Saddleback Church rikomeye muri Leta Zunze Ubumwe za Amerika ndetse n’Umuryango Peace Plan.

Kuri uyu wa Gatanu tariki 1 Ukuboza 2023, yitabiriye amasengesho yo gusengera igihugu [Leaders Breakfast Fellowship] yateguwe n’Umuryango Rwanda Leaders Fellowship [RLF] , aho yari kumwe na Madamu Jeannette Kagame n’abandi bayobozi.

Pasiteri Rick Warren udahwema kugaragaza u Rwanda nk’igihugu cye kandi akunda, yavuze ko agiye kumara imyaka 20 amenyanye na Perezida Kagame.

Ati “Nahuguye abapasiteri benshi cyane ku Isi, kurenza undi muntu uwo ari we wese. Nahuguye abapasiteri barenga miliyoni barimo abarenga 3000 bo mu Rwanda. Niyo mpamvu nzi abantu bose hano, niyo mpamvu nkunda buri wese hano mu Rwanda.”

“Umwaka utaha, ndatekereza ko izaba ari imyaka 20 ishize, Perezida Kagame anyandikiye ibaruwa yatangiye umubano wacu. Ubucuti mfitanye na Perezida wanyu ntabwo busanzwe.”

Pasiteri Warren yavuze ko iyo ageze mu Rwanda abantu ba mbere aba ashaka kubona ari abana ba Ange Kagame na Bertrand Ndengeyingoma kuko abafata nk’abuzukuru be.

Ati “Ubwo nari ngeze hano, abantu ba mbere nashakaga kubona ni abuzukuru ba Madamu Jeannette Kagame kubera ko mba numva nanjye ari abuzukuru banjye.”

Pasiteri Rick Warren yavuze ko yishimiye guhura na bo ndetse ngo yavuyeyo abijeje ko azabigisha gusenga.

Yahishuye ko ubwo Ange Kagame na Bertrand Ndengeyingoma bakoraga ubukwe yari yabwitabiriye aho yari kumwe n’inshuti ye, Antoine Cardinal Kambanda.

Yahishuye uko Ange Kagame na Ndengeyingoma bamenyaniye muri Rwanda Day

Pasiteri Warren asanzwe ari mu bagize Inama Ngishwanama ya Perezida Kagame, PAC [Presidential Advisory Council], ndetse ni umwe mu bakunze kwitabira ibikorwa by’u Rwanda, byaba ibibera mu mahanga cyangwa imbere mu gihugu.

By’umwihariko mu 2016, yitabiriye Rwanda Day yabereye mu Mujyi wa San Francisco muri Leta ya California, ndetse anatanga ikiganiro cyagarutse ku mpamvu yaje kwisanga ari inshuti y’u Rwanda.

Aha niho yahise abwira abitabiriye amasengesho ya Leaders Breakfast Fellowship, ko umunsi umwe ubwo yari muri Rwanda Day, aho yavugiye ijambo ari ho Ange Kagame yaje kumenyanira na Ndengeyingoma.

Ati “Umunsi umwe nari nagiye kuvuga ijambo muri Rwanda Day muri San Francisco, umusore n’inkumi bitegura kubana barahura, amazina yabo ni Bertrand na Ange.”

Yakomeje agira ati “Ndi muganga w’urukundo! Kandi mpuza abantu, niba mugiye gukora Rwanda Day, hari undi muntu uzambikwa impeta. Niyo mpamvu mbazi [Ange na Bertrand] kuva na mbere y’uko bashyingiranwa.’’

Pasiteri Rick Warren yavuze ko hari indi mpamvu ikomeye ituma akunda Ange Kagame, kuko ngo ari umunyembaraga.

Ati ‘‘Nkunda abagore b’abanyembaraga, nashakanye n’umugore w’umunyembaraga, Mama wanjye na Nyogokuru bari abagore b’abanyembaraga, mfite abakobwa n’abuzukuru b’abanyembaraga.’’

Pasiteri Rick Warren yavuze ko afite inshuti nyinshi mu Rwanda

Past Warren yagaragaje uburyo ashimishwa n'aho u Rwanda rugeze rwiyubaka

Pasiteri Rick Warren aganira na rwiyemezamirimo Dr Francis Habumugisha

Pasiteri Rick Warren na Pasiteri Andy Wood uzamusimbura ku buyobozi bwa Saddleback Church

Pasiteri Rick Warren yashimye ubuyobozi bw'u Rwanda budahemwa gushakira ineza Abanyarwanda

Pasiteri Rick Warren yari yahuje urugwiro na Musenyeri Laurent Mbanda uyobora Itorero ry'Abangilikani mu Rwanda

Pasiteri Alain Numa na bagenzi be ubwo bari bitabiriye aya masengesho

Amafoto: Yuhi Augustin