Abagabo baganiriye na IGIHE bavuga ko banga imico imwe igaragara ku bagore irimo kutishimira umuryango washatsemo, no kwishyira hejuru, uburaya n’ubusinzi, kutagira isuku n’ibindi.

Abagabo benshi banatangarije IGIHE ko umugore wiha gusumbya amategeko umugabo ateza ibibazo mu mibanire. Bagize bati” Umugore wumva ko ari we uhagarariye urugo akenshi ateza ibibazo mu muryango. Usanga bagenzura abagabo babo,uburyo bakoresha umutungo ”.

Nsanzabaganywa yabwiye IGIHE ko abagore bakunda imitungo bateza inkeke, kuko hari abanga kuba hafi y’imiryango bashatsemo kubera ukwikunda no gukunda ibintu.Yagize ati”Abagore bamwe bakunda abagabo bakurikiye umutungo kuruta uko bakunze umuryango, nibo biganjeho muri iyi minsi, ibi bituma umugabo yumva atanezerewe mu gihe umugore atishimiye umuryango we”.

N’ubwo gusinda atari byiza kuri bose, benshi bakunze kuvuga ko abagore bari mu bataberwa no gusinda. Ibi bakunze kuvuga y’uko ubusinzi bushobora gutera abagore kujya mu busambanyi.

Umwe mu baganiriye na IGIHE, yatangaje ko yigeze kubona umugore umwe wari wishwe n’inzoga mu gace bita Camp Zaire, mu nzira zigana i Gikondo. Uwo mugore yageze aho yiyambura imyambaro yose yo hejuru kugeza ubwo aryamye mu miyoboro itwara amazi. Benshi mu bitegerezaga uwo mugore bavugaga ko mayibobo ziri bumurareho.

Kutanyurwa n’umutungo w’urugo ndetse no kwifuza kubaho nk’abandi bagore bose,biri mubyo abagabo benshi banenga abagore.

Bamwe mu baganiriye na IGIHE, bavuze ko abagore benshi mu badafite akazi batungwa n’abagabo babo, igihe kinini bakimara bitegereza ibigezweho. Aho umugabo azinduka ajya ku kazi, yavayo agasanga umugore aramumenyesha ibyo bagenzi be bambara byiza, ndetse atabimuha bikaba intandaro y’intonganya, agashinjwa kuyajyana mu bandi bagore.

Benshi mu bagabo baganiriye na IGIHE bo mu mujyi wa Kigali bavuze ko n’umuco wo kuvuga menshi utanyura abagabo bamwe. Bagize bati” Umugore uvuga menshi aba ni urukozasoni, yanagukoza isoni mu bantu, ariko iyo atuje akagira amagambo ari ku murongo birakubahisha ndetse nawe bikamwubahisha”.

Tuyisenge umwe mu bagabo baganiriye na IGIHE yagize at:” Nkirambagiza umukobwa yarankunze ariko akunda kuvuga cyane, yanteye ubwoba kuko kuri we ibanga ni icyo atazi, umugore utiha akabanga yari kuzamena amabanga y’urugo bityo mukaba mwanabipfa”.

Umwe mu bagabo utashatse ko izina rye ritangazwa yagize ati:”
Umuntu ashobora kuba ari mubi, ateye nabi ariko akagerageza kwiyitaho, umwe mwiza ugasanga ntiyita ku isuku ntiyiyuhagira, ntiyoza amenyo, n’ibindi. Uzarebe abakobwa beza ntibiyitaho pe hari imico mibi baba bafite”.

Si iyi mico yonyine abagabo bangira abagore, bavuze ko umugore unegurana, wiyorobeka, akavuga ateruye, wa mugore usanga akunda kugenzura umugabo,no kumuca inyuma ntagire urugwiro, nayo iri mu mico idashimwa n’abagabo.