Ibi birori byo kwizihiza isabukuru y’imyaka 50 Perezida Museveni amaranye n’umugore we, byaranzwe n’umuhango wo kuvugurura isezerano ry’ugushyingirwa hagati y’aba bombi.

Muri uyu muhango wabereye mu Majyepfo ashyira Uburengerazuba bwa Uganda mu gace ka Ntungamo aho Perezida Museveni n’umugore we bakomoka, Gen Muhoozi Kainerugaba usanzwe ari n’umuhungu wa Museveni ni we wari wabaye ‘Parrain’, mu gihe umugore we, Charlotte Kuteesa yari agaragiye nyirabukwe.

Janet Museveni yavuze ko guhitamo Ntungamo nk’agace we n’umugabo we bakwiriye kuvuguriramo isezerano ry’ugushyingirwa bifite byinshi bivuze.

Ati “Akarere ka Ntungamo, ni ho njye n’umugabo wanjye dukomoka, ni ho soko y’inzozi zo mu bwana bwanjye, hakaba n’inkomoko y’urukundo mfitiye igihugu cyacu, nta handi hantu muri Uganda hashoboraga kuruta aha.”

Yakomeje avuga ko we na Perezida Museveni “Imana yabakuye kure kandi kuba bamaranye imyaka 50 ari ikimenyetso cy’uburyo babashije guhuza mu buzima. Uko twagiye dukura ubuzima bw’umwe bwagiye bwubakira cyane ku bw’undi cyane cyane ubwanjye bwubakiye ku bwe.”

Uyu muhango wo kuvugurura isezerano ry’ugushyingirwa hagati y’aba bombi wari witabiriwe n’abana babo barimo Patience Museveni Rwabwogo, Natasha Museveni Karugire, Diana Museveni Kamuntu, abakwe babo ndetse n’abuzukura babo.

Museveni na Janet basezeranye kubana nk’umugabo n’umugore muri Kanama mu 1973 i Londres mu Bwongereza.