Ibi birori byakurikiye umukino Rayon Sports yatsinzemo Rwamagana City ibitego 2-0, byinjijwe na Musa Essenu na Paul Were. Wabereye kuri Stade ya Kigali i Nyamirambo.

Nyuma y’umukino bagiye gusuhuza abafana, abakinnyi n’abakunzi baririmbiye Onana na Rwaka indirimbo zo kwizihiza isabukuru y’amavuko. Nyuma y’indirimbo aba bombi bazherejwe umutsima bawusangira na bagenzi babo.

Byabereye imbere y’imbaga y’abakunzi ba Rayon Sports mbere y’uko abakinnyi bakomereza mu rwambariro.

Rutahizamu André Onana aganira n’itangazamakuru yanze gutangaza imyaka yujuje avuga ko ari ibanga rye bwite.

Yagize ati “Ntabwo imyaka nayivuga kuko ni ibanga ryanjye bwite. Ndashimira kandi abantu bose bagize uruhare mu kudutungura kuri iyi sabukuru.’’

Yavuze ko kuri uyu mukino yifuzaga gutsindamo igitego ku isabukuru ye y’amavuko nubwo yagitsinze ariko nticyemerwe.

Yakomeje ati “Kenshi mba ndi imbere ya ba myugariro, sinemera ko nari naraririye ariko umusifuzi yafashe umwanzuro nta kundi.”

Willy Esomba Onana yageze muri Rayon Sports mu mwaka mu 2021 ahagirira ibihe byiza kuko yigaruriye imitima ya benshi mu bakunzi b’iyi kipe.

Undi wifurijwe isabukuru nziza ni Umutoza wungirije muri Rayon Sports, Rwaka Claude, uyu yayigezemo mu mwaka ushize avuye muri Kiyovu Sports aho n’ubundi yari yungirije Umurundi Haringingo Francis.