Nk’indi mikino yose, Volleyball igira amategeko n’amabwiriza ayigenga ndetse ni umukino usaba imbaraga ku bawukina kinyamwuga. Ibi bituma hari abakeka ko umukobwa w’uburanga adashobora kuwukina, ariko si ko biri kuko uri muri siporo zibarizwamo abakobwa b’ikimero.
IGIHE yasakusanyije abakinnyi 20 b’uburanga bakina mu makipe atandukanye ku Isi. Uru rutonde rwiganjemo abakinnyi bagaragaje ko bakomeye ku rwego rw’Isi, ndetse baba ibyamamare kubera uko bakina Volleyball, imiterere y’imibiri yabo n’isura zabo zikurura abafana.
Sabina Altynbekova
Ni umukobwa w’uburanga butangarirwa na benshi. Uyu mukinnyi w’imyaka 26 wavukiye muri Kazakhstan, yamenyekanye cyane ubwo yajyaga muri Taiwan mu 2014 mu mikino y’abakiri bato.
Zehra Güneş
Ni Umunya-Türkiye w’imyaka 23 y’amavuko. Afite igihagararo gihamye kuko afite metero 1.97. Kugeza ubu akinira Ikipe ya Vakıfbank Istanbul, ndetse ari mu bakinnyi ngenderwaho mu Ikipe y’Igihugu.
Kelsey Robinson
Ni Umunyamerikakazi uzwi cyane kubera imiterere y’umubiri we n’isura ikundwa na benshi. Yatsindiye imidali itandukanye ndetse, yahagarariye igihugu cye inshuro nyinshi mu mikino Olempike.
Misty May-Treanor
Misty May-Treanor ni umwe mu bakinnyi banditse amateka yo gutwara umudali wa zahabu ku rwego rw’Isi inshuro nyinshi mu mikino Olempike muri Beach Volleyball. Ubuhanga bwe bwiyongera ku musatsi we ndetse n’amaso ye bigatuma agira igikundiro kiri hejuru.
Kerri Walsh Jennings
Ni undi mukinnyi w’ikimero muri Volleyball. Uyu Munyamerikakazi ari kumwe na Misty May-Treanor batsindiye imidali ya zahabu inshuro eshatu zikurikiranya, bituma baba ikipe ya mbere nziza mu mateka y’imikino Olempike.
Monika Bociek
Ni Umunya-Pologne w’imyaka 26, ukina Volleyball nk’uwabigize umwuga. Akinira Ikipe ya LTS Legionovia Legionowo y’iwabo, ndetse yakiniye Ikipe y’Igihugu y’Abatarengeje imyaka 23.
Stefana Veljković
Ni Umunya-Serbie wafatanyije n’ikipe ye gukina imikino Olempike mu 2008, 2012 na 2016, ari na wo mwaka yafashije ikipe ye kubona umudali wa Feza. Mu 2018 na bwo yafashije ikipe ye ya Srpskin gutwara Shampiyona y’Isi.
Laura Dijkema
Laura Chantal Dijkema ni Umuholandikazi ugejeje imyaka 33 akina Volleyball. Ni umwe mu bakinnyi ngenderwaho Ikipe y’Igihugu ifite. Anakinira kandi Leningradka Saint-Petersburg.
Louisa-Christin Lippmann
Louisa-Christin Lippmann ni umukinnyi w’Ikipe y’u Budage. Ku myaka 28 amaze kugaragara mu mikino 100. Ni umukinnyi uzwiho kutagira ubwoba nubwo afite uburanga. Kugeza ubu akinira Lokomotiv Kaliningrad yo mu Burusiya.
Mariana Costa
Mariana Andrade Costa umenyerewe ku mazina ya Mari Paraíba ni Umunya-Brésil wakiniye Ikipe y’Igihugu y’Abagore kugeza mu 2016. Amaze kunyura mu makipe agera kuri 15 yose nk’umukinnyi wabigize umwuga.
Maria Stenzel
Ni Umunya-Pologne uri mu bihe bye, kuko ku myaka 24 ari mu bakinnyi bakomeye Ikipe y’Igihugu igenderaho. Mu 2015 yayikiniye mu mikino ya Shampiyona y’Isi y’abatarengeje imyaka 18, no mu batarengeje imyaka 20 mu 2017. Ubusanzwe akina nka Libero mu Ikipe ya KPS Chemik Police y’iwabo.
Gabriela Braga
Gabriela Braga Guimarães uzwi nka Gabi, ni Umunya-Brésil ukina Volleyball yo mu nzu. Uyu mukinnyi w’imyaka 28 yifitemo ubushobozi bwo kugarura no gutanga imipira neza.
Klara Perić
Uyu Munya-Croatia w’imyaka 25 akinira HAOK Mladost Club. Usibye kuba uburanga afite budashidikanywaho, ni umukinnyi ufite ubuhanga mu kuyobora bagenzi be no gutanga imipira myiza.
Hanna Orthmann
Ni umukinnyi w’Ikipe y’Igihugu y’u Budage ndetse na Türk Hava Yolları SK yo muri Shampiyona ya Türkiye. Usibye gukina muri Shampiyona y’iwabo, yigeze no kuva mu gihugu cye ajya gukinira mu Mujyi wa Monza mu Butaliyani.
Samantha Bricio
Uyu mukobwa w’ikimero ni Umunya-Mexique ufite igikundiro cyane ndetse wagaragaje impano yo gukina Volleyball akiri muto. Uyu mukinnyi w’imyaka 28 ni we ufite amateka yo kugaragara mu Ikipe y’Igihugu akiri muto mu 2009, ubwo yitabiraga Shampiyona y’Isi yasoreje ku mwanya wa 12.
Jaqueline Carvalho
Jaqueline Maria Pereira de Carvalho Endres ni Umunya-Brésil ufite uburanga n’ubuhanga mu gukina Volleyball. Ku myaka 39 afite amateka ndetse yari mu ikipe yitwaye neza mu mikino Olempike yabereye i Beijing mu 2008 na Londres mu 2012.
Winifer Fernandez
Ni Umunya-Repubulika ya Dominican wahagarariye Ikipe y’Igihugu muri Shampiyona y’Isi mu 2015. Kubera we, igihugu cye cyamenyekanye kubera gutsindira umudali wa zahabu muri iri rushanwa.
Jordan Quinn Larson
Ni umukinnyi wa Volleyball ufite igikundiro kubera ubuhanga n’uburanga bwe. Yamenyekanye ubwo yabonaga ibihembo bitandukanye birimo umudali wa zahabu muri Shampiyona y’Isi mu 2014, uwa feza mu 2012 n’umuringa mu 2016 mu Mikino Olempike.
Tijana Bošković
Ni Umunya-Serbie ukinira Ikipe y’Igihugu y’Abagore mu 2022. Uyu mukinnyi w’imyaka 26 yabonye umudali we wa zahabu ku nshuro ya gatatu muri Shampiyona y’Isi n’izindi ebyiri mu mikino Olempike.
April Ross
April Elizabeth Ross ni umugore w’umunyembaraga mu mikino Olempike, kuko amaze kugira imyaka 40 agikina by’umwihariko Beach Volleyball.
Yegukanye imidali Olempike inshuro eshatu, ari kumwe na mugenzi we Jennifer Kessy nk’ikipe. Mu 2019 yabonye uwa feza ari kumwe na Kerri Walsh Jennings, mu 2020 abona uwa zahabu ari kumwe na Alix Klineman.
TANGA IGITEKEREZO
AMATEGEKO AGENGA IYANDIKA RY'IGITEKEREZO CYAWE
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni, Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe. Ibi bidakurikijwe igitekerezo cyanyu gishobora kutagaragara hano cyangwa kigasibwa.
Igitekerezo cyawe kigaragara nyuma y'isuzuma rikorwa na IGIHE.com , Murakoze!