Urugendo rwo kugira Kigali umujyi umaze guhamya ubukaka, ntirumaze igihe kirekire kuko rwatangiye mu myaka 26 ishize nyuma ya Jenoside yakorewe Abatutsi yahitanye abasaga miliyoni mu minsi 100.

Muri Jenoside, u Rwanda rwarasenywe hafi ya ha handi nta buye ryasigaye rigeretse ku rindi, rwabuze abantu n’ibintu ndetse nyuma yo kubohora igihugu byasabye gusana igihugu uhereye ku busa.

Nyuma ya Jenoside, abantu bari bihebye, igihugu cyuzuye impfubyi n’abapfakazi, badafite icyizere cy’ahazaza ariko ingabo za FPR Inkotanyi zagize uruhare ntayegayezwa mu kubaganisha mu nzira yo gukira ibikomere no kwiyubaka.

Ibikorwaremezo byari byarasenywe byarubatswe ndetse na Kigali ishyirwamo imbaraga mu kuyizamuramo inyubako n’ibindi bifitiye benshi akamaro.

Isuku muri Kigali iri mu biyihesha amanota meza ku ruhando mpuzamahanga. Ku Isi, Kigali izwi ku isuku, umutekano n’ituze bituma umuntu agenda ijoro ryose nta kintu na kimwe kimutangiriye cyangwa kirogoye gahunda ze.

Mu myaka 26 ishize, u Rwanda rwakomeye ku ntego yo kwiyubaka, ubu ibice byari ibihuru n’amatongo byuzuye imitamenwa n’inzu zigezweho, bivuye mu muhate n’ubushake by’Abanyarwanda baharanira kubaka u Rwanda rubabareye.

Iterambere ry’igihugu ryashingiye imizi mu Mujyi wa Kigali rishamikira no mu yindi igera kuri itandatu iwunganira irimo uwa Huye, Muhanga, Musanze, Nyagatare, Rubavu na Rusizi.

Mu myaka isaga 50, ibice byinshi bya Kigali byari ibihuru n’amashyamba adatuwemo n’abantu, nta bikorwaremezo bihambaye biyibarizwamo.

Mu myaka ishize, uwavugaga ko agiye i Kigali yabaga akeneye kureba inyubako yafatwaga nk’iruta izindi izwi nk’iya Kabuga ku Muhima cyangwa inyubako za Minisiteri ku Kacyiru akagenda anyuzwe. Iyo byarengaga aho yageraga kuri Stade Amahoro, umujyi akaba arawusoje, akagenda yirahira Umurwa w’u Rwanda.

Amahoteli akomeye nayo yari Sky Hotel, Umubano ku Kacyiru, Hôtel des Milles Collines, Hôtel des Diplomates na Rebero Horizon, ubu izo zose hari izazinyuzeho zirimo Marriott Hotel, Radisson Blu Hotel & Convention Centre n’izindi.

Imyaka 113 irashize Umujyi wa Kigali ushinzwe n’Umudage Richard Kandt, ni imyaka 58 utangiye kwitwa Umurwa Mukuru w’u Rwanda, muri yo igera hafi kuri 45 Kigali yayimaze itarafata umurongo w’impinduka, umwaka wa 2001 ni wo watangiranye n’inkundura yo kuwuteza imbere ngo ube icyitegererezo ku Isi.

IGIHE yakusanyije amafoto y’ingenzi yafashwe mu bihe bitandukanye agaragaza ibikorwaremezo byagutse birimo hoteli z’inyenyeri eshanu, imiturirwa ikomeye, inzu z’imikino n’imyidagaduro bituma Kigali iba indorerwamo yerekana uko ubukungu bw’igihugu buvuduka.

Kigali Arena ni inyubako ya mbere nini y’imikino yo mu nzu mu Karere ka Afurika y’Uburasirazuba ndetse iri mu icumi za mbere muri Afurika yose. Yubatswe mu buryo bumeze kimwe na Dakar Arena iherereye mu Mujyi mushya uri kubakwa muri Sénégal, Diamniadio, nayo yubatswe na Summa, Sosiyete y’Abanya-Turikiya yanakoze imirimo ya nyuma kuri Kigali Convention Centre

Agace ka Remera gafatwa nk'igicumbi cy'imikino kubera ibikorwaremezo bihabarizwa

Ifoto igaragaza imiterere ya Stade Amahoro na Kigali Arena yafatiwe mu kirere

Usibye kubaka ibikorwa remezo bishya, n'ibyari bisanzwe byaravuguruwe bijyanishwa n'igihe. Urugero ni nk'Ikibuga cy'Indege Mpuzamahanga cya Kigali

Kigali Arena, Stade ifite ubushobozi bwo kwakira abantu ibihumbi 10 bareba mikino yose y’intoki, ibitaramo n’inama

Inyubako nshya yubatswe ahakorerwa ubucuruzi hazwi nka Kigali Business Centre (KBC) iherereye imbere ya Kigali Heights

Inyubako ya Kigali Convention Centre (KCC) iri mu zakira inama zikomeye zibera ku butaka bw'u Rwanda

Ishusho ya Kigali Arena mu masaha y'ijoro

Imihanda yo mu Mujyi rwagati yararimbishijwe bidasanzwe

KCC yatashywe muri Nyakanga umwaka wa 2016, yuzuye itwaye miliyoni 300 z’amadolari ya Amerika

Imihanda ijya cyangwa iva Nyabugogo isigaye ari ibyerekezo bibiri mu gihe mbere yari mito cyane

Inyubako y'Inteko Ishinga Amategeko y'u Rwanda iherereye ku Kimihurura

Umuhanda ugana ku Muhima ni uku uteye

Urebeye mu kirere, agace ka Kimihurura kari ishyamba mu gihe gishize ubu hari imiturirwa irabaganirana

Uhagaze ku Gisozi, ni uku uba ureba mu mujyi rwagati

Byinshi muri ibi bice byari bikikijwe n'imiyenzi. Ubu hari inyubako zijyanye n'igihe

Imiturirwa muri Kigali izamuka amanywa n'ijoro

Muri Car Free Zone mu Mujyi rwagati, hahaye ubwinyagamburiro ababa bashaka kugenda n'amaguru bisanzuye

Imwe mu nyubako nshya iri ku muhanda ugana ku bitaro bya CHUK

Mu Rwanda hari imihanda ireshya n'ibilometero 2000 ya kaburimbo mu bice bitandukanye by'igihugu

Ku Muhima ahazwi nko kwa Kabuga werekeza i Nyabugogo ni uku hateye

Mu bice byinshi by'Umujyi wa Kigali, hasigaye hari imihanda myiza

Gare ya Nyabugogo ni uku iteye. Iyi foto yafashwe mu gihe nta ngendo zari ziri gukorwa kubera gahunda ya Guma mu Rugo

Ifoto yo mu kirere igaragaza imiterere ya Stade ya Kigali iri i Nyamirambo

Nyamirambo ni kamwe mu gace two muri Kigali kabamo ubuzima bworoshye mu ngeri zose

Kigali City Tower iri mu nyubako ndende ziri mu Mujyi wa Kigali, ifite amagorofa 17

Makuza Peace Plaza iri mu nyubako zigezweho mu Mujyi wa Kigali rwagati, hafi y'umuhanda wahariwe abanyamaguru, Car Free Zone

Ifoto yafatiwe mu nyubako ya La Bonne Adresse igaragaza Ubumwe Hotel ifite umwihariko wo kugira piscine mu bushorishori bwayo

Aha ni imbere y'Umujyi wa Kigali ubona imbere yawe icyicaro gikuru cya I&M Bank

Agace kahariwe abanyamaguru muri Kigali kazwi nka Car Free Zone

Inyubako y'Ibiro by'Umujyi wa Kigali

Banki ya Kigali iri mu zikomeye mu Rwanda ikorera mu nyubako ijyanye n'icyerekezo

Imihanda yose kuva ku migato iba isukuye cyane

Uwinjiye mu marembo y’igice cy’Umujyi wa Kigali cyahariwe imirimo yihariye mu by’ubukungu giherereye i Masoro mu Karere ka Gasabo, abona inyubako idasanzwe u Rwanda rwubakiye Carnegie Mellon University, yashowemo miliyoni hafi $10

Ishusho y'i Remera ahazwi nko mu Giporoso imbere ya gare

Umuhanda uva Nyabugogo, ugana mu Gatsata nawo waravuguruwe, hanubakwa ikiraro kigezweho

Kigali City Tower ni imwe mu nyubako ndende ziri muri uyu mujyi

Muri Gare ya Downtown iri mu Mujyi wa Kigali rwagati

Umuhanda uva mu Mujyi wa Kigali rwagati ugana Nyabugogo waraguwe ujyanishwa n'igihe. Iyi mihanda iri mu izifashishwa mu gihe bisi zizagenerwa amasaha yihariye

Isuku iri ku isonga muri Kigali. Uyu muhanda werekekeza kuri REG unyuze kuri T2000 no kwa Ndamage

Icyanya cyahariwe inganda mu Mujyi wa Kigali ahazwi nka 'Kigali Special Economic Zone' kibarizwamo izitandukanye

Umujyi wa Kigali uzamurwamo inyubako zitandukanye zituma iterambere ryawo ritangarirwa

Imihanda mishya irubakwa, iyashaje ikavugururwa

Imbere mu cyanya cyahariwe inganda mu Mujyi wa Kigali ahazwi nka 'Kigali Special Economic Zone',

Umujyi wa Kigali urara ushashagirana kubera amatara yashyizwe mu bice bitandukanye byawo

Kigali imaze kwambara isura nshya mu myaka 26 ishize u Rwanda rwibohoye

Ifoto igaragaza isura ya Kigali mu ijoro aho uba witegeye Nyabugogo n'imiturirwa miremire iri ruguru yayo

Kigali ikomeje gutera imbere ku muvuduko wo hejuru yaba mu isuku n'imyubakire

Iterambere rya Kigali ryirahirwa n'amahanga bitewe n'umuvuduko ririho

Imihanda minini yo muri Kigali irara icaniwe ijoro ryose

Inyubako ndende zigerekeranywa buri munsi

Ukigera mu Mujyi wa Kigali rwagati, usanganirwa n’inyubako ndende nshya

Ikibuga cya Cricket cyazanye isura nshya mu Karere ka Kicukiro

Muri Kigali hasigaye hari imidugudu myinshi ijyanye n'igihe ku buryo aho umuntu ashobora kuba ahabona buri kintu cyose nkenerwa mu buzima

Banki y'Abaturage isigaye ifite icyicaro gishya aho gukorera mu nzu itajyanye n'igihe

Ubwo Ubumwe Grande Hotel yatangiraga ibikorwa, yari imwe mu nyubako z'agatangaza muri Kigali ariko nyuma y'imyaka ine, hari izindi zayiciyeho

Kigali Marriott Hotel ni imwe muri hotel zahinduye ubuzima muri uyu mujyi

Urwego rw'amahoteli ni rumwe mu zagize uruhare mu iterambere ry'ubukungu bw'u Rwanda

Park Inn by Radisson Blu ni hotel iherereye ahazwi nko mu Kiyovu

Amafoto: Niyonzima Moïse