Zimwe muri izi nyubako zo ku migabane itandukanye, zitwezweho gufungura imiryango nyuma yo kurenza igihe abazikoragaho babaga bihaye yo kuba zatangiye gukorerwamo.

Centro Botin; ni inyubako yitezweho gufungura imiryango muri uyu mwaka, aho iherereye muri Espagne, ikazakorerwamo ibikorwa bijyanye n’umuco, uburezi, ahantu ho kuruhukira, akarusho kayo ni uko igice kimwe cyayo cyubatse hejuru y’amazi.

520 West 28th Street, ni inyubako y’amagorofa 11 yo gucumbikamo iherereye mu Mujyi wa New York muri Leta Zunze Ubumwe za Amerika, nayo iri mu zitezwe kuzafungura imiryango ku mugaragaro muri uyu mwaka, nyuma yo gutangira kubakwa mu 2013. Izaba irimo inzu zo kubamo 39. Nayo yari gufungurwa mu mwaka ushize ariko biza kwigizwa inyuma bishyirwa mu 2017.

Louvre Abu Dhabi, izaba yubatse i Abu Dhabi muri Leta Zunze Ubumwe z’Abarabu, na yo yitezweho gufungura imiryango muri uyu mwaka nyuma y’imyaka myinshi bihindurwa. Izaba ari inzu ndangamurage irimo ibintu bijyanye n’umuco n’ubukerarugendo byo muri iki gihugu. Yuzuye itwaye akayabo ka miliyoni ziri hagati ya 83 na 108 z’ama-Euro.

Lego House Ni inyubako yubatse mu Mujyi wa Billund muri Denmark, izajya yakira abantu mu bikorwa byo kwidagadura no gusangira ku nshuti n’abavandimwe n’ibindi bikorwa bitandukanye. Yo yatangiye kubakwa mu 2014.

Huangshan Mountain Village, yo yubatse mu Ntara ya Anhui mu Bushinwa, aho izafungurwa muri uyu mwaka; irimo ibice bitandukanye birimo hotel, ahantu ho kwidagadurira n’inzu zo guturamo. Akarusho ikaba yubatswe ku ngerero z’amazi bizafasha abazayigana kwidagadura no kumva akayaga kava kuri ayo mazi.

Zhangjiajie Glass Bridge, ni ikiraro cyo mu kirere giherereye mu gace ka Zhangjiajie mu Bushinwa, gihuza imisozi ibiri iri muri pariki ya Zhangjiajie. Iki kiraro kihariye kuba gikozwe mu buryo bubonerana nk’ibirahuri ku buryo byibura gishobora kwakira ba mukerarugendo 800 icya rimwe. Cyari cyarafunguwe muri Kanama 2016, ariko gihita cyongera gufungwa bitewe n’ibyo bagikoragaho ku buryo byitezwe ko kizongera gufungurwa muri uyu mwaka.

Yves saint Laurent Marrakech, ni inzu ndangamurage yubatswe muri Maroc i Marrakech, nayo iri mu zizafungura imiryango muri uyu mwaka, ndetse ikaba ifite indi byitiranwa ariko yo iherereye i Paris mu Bufaransa.