Abarenga 90% mu bamaze guhitanwa na yo ni abo mu Ntara ya Hubei mu Bushinwa, aho icyo cyorezo cyatangiriye mu mpera z’umwaka ushize. Mu Bushinwa honyine hamaze kwandura 80.174, mu gihe hamaze gupfa 2.915. Abo biyongeraho abo mu bindi bihugu barimo abarenga 50 bo muri Iran n’abarenga 30 mu Butaliyani.

Mu gihe ikibazo cya coronavirus kigabanuka mu Bushinwa, mu bindi bihugu ubwandu bushya bukomeje kwiyongera mu buryo bwihuse cyane. Mu Butaliyani abanduye baherutse kwikuba kabiri mu masaha 48. Nibura 34 bamaze guhitanwa nayo, naho abandi 1694 bamaze kuyandura.

Ni mu gihe mu Bushinwa ho abarimo gukira iyi ndwara bamaze kuruta abayandura n’abapfa, ku buryo imibare y’abamaze gukira yageze ku 44.518.

Urubuga rukora ubucuruzi kuri internet rwa Amazon rwatangaje ko abakozi barwo babiri mu Butaliyani banduye coronavirus, ubu bari mu kato. Mu Bwongereza, Minisitiri w’Intebe Boris Johnson yahamagaje inama ya Guverinoma y’igitaraganya kubera abantu 36 bamaze kwandura.

Kuri uyu wa Mbere Korea y’Epfo - igihugu gifite abantu benshi banduye kurusha ibindi uvanyemo u Bushinwa - yatangaje ko hari abagera kuri 476 bahuye n’iyi virusi, batuma umubare w’abanduye ugera ku 4212 ndetse imaze guhitana 26.

OMS yatangaje ko Coronavirus iri kwibasira cyane abari mu myaka 60 y’amavuko n’abantu basanzwe barwaye. Yasabye ibihugu kongera umubare w’ibyuma byongerera abarwayi umwuka kuko abarembejwe na coronavirus bawukenera, cyane ko ifata imyanya y’ubuhumekero igateza umusonga.

Mu busesenguzi uwo muryango wakoze, wavuze ko mu bantu banduye mu Bushinwa, abo yishe bakuze bakubye inshuro 10 abakiri bato.

Coronavirus nshya ni icyorezo gihangayikishije Isi yose