00:00:00 IGIHE NETWORK KN KINYARWANDA EN ENGLISH FR FRANCAIS

Abarwanyi 37 bahoze muri P5 na RUD Urunana batangiye kuburana mu mizi

Yanditswe na Ntabareshya Jean de Dieu
Kuya 4 Gicurasi 2021 saa 11:30
Yasuwe :
0 0

Urukiko rukuru rwa Gisirikari rwatangiye kuburanisha mu mizi abakurikiranyweho kuba mu mitwe yitwaje intwaro igamije guhungabanya umutekano w’u Rwanda bafashwe mu bihe bitandukanye muri 2019 nyuma y’ibitero byagiye bigabwa mu bice bitadukanye by’igihugu byiganjemo ibyo mu majyaruguru.

Abaregwa uko ari 37 bafatiwe mu bihugu bitandukanye aribyo Uganda, u Burundi, Malawi, Repubulika Iharanira Demokarasi ya Congo n’u Rwanda. Barimo barindwi bo mu mutwe wa RUD-URUNANA na 29 bo muri P5 washinzwe na Kayumba Nyamwasa.

Bimwe mu byaha baregwa ni ibyaha bifitanye isano n’iterabwoba aribyo kurema umutwe w’ingabo zitemewe no kuwujyamo, kugirira nabi ubutegetsi buriho, kugirana umubano na Leta z’amahanga, iterabwoba, ubufatanyacyaha mu bwicanyi n’ubujura, ndetse n’ubwinjiracyaha mu bwicanyi.

Ubushinjacyaha bwafashe umwanya wo gusobanura ibyaha abakurikiranwe baregwa, butanga n’ibimenyetso bigaragaza uruhare buri umwe yagiye agira muri byo. Haherewe kuri barindwi bari bari mu mutwe w’itererabwoba wa RUD Urunana.

Abo bose uko ari barindwi bahoze muri uyu mutwe bavuze ko bemera ibyaha baregwa ariko bose bahuriza ku guhakana icyaha cyo kugirana umubano na Leta z’amahanga, ndetse no kugirira nabi ubutegetsi buriho.

Ubushinjacyaha bwongeye gusobanura neza impamvu z’ibyo byaha abaregwa bahakana, bagaragaza ko nko ku cyaha cyo kugirana umubano na Leta z’amahanga bigaragarira mu bikorwa bitandukanye birimo nko kuba ibihugu nka Uganda n’u Burundi wasangaga bibafasha mu buryo bunyuranye burimo kubaha intwaro n’imyambaro ya gisirikari, kwisuganya ngo bahuze imbaraga n’indi mitwe igamije guhungabanya umutekano w’u Rwanda, kubakorera ibyangombwa by’inzira no kubahindurira amazina bikagaragaza umubano wari hagati yabo.

Kuri iki cyaha ariko ubushinjacyaha bwasobanuye ko kitareba abanyamahanga 10 bari mu baregwa bagizwe n’abarundi 8, umugande umwe n’umunye-Congo umwe kuko n’ubundi bagiye muri iyo mitwe basanzwe atari Abanyarwanda.

Mu gusobanura uburemere bw’ibyaha bakoze, ubushinjacyaha bwagaragaje ko abo bose bari mu mutwe wa RUD-Urunana bagize uruhare mu bikorwa by’iterabwoba byibasiye Intara y’Amajyaruguru mu karere ka Musanze mu 2019 aho abantu bagera kuri 15 bishwe naho 14 bagakomereka mu mirenge ya Musanze na Kinigi.

Si ubwambere bageze imbere y’ubutabera kuko no muri Nyakanga 2020 aba bose uko ari 37 bagejejwe imbere y’urukiko rwa gisirikari baburana ku ifungwa n’ifungurwa ry’agateganyo, aho baje gufungwa by’agateganyo kubera uburemere bw’ibyaha bakurikiranyweho.

Urukiko rukuru rwa Gisirikari rufite iminsi itatu humvwa uruhare rwa buri wese muri ibyo byaha bakurikiranyweho ndetse no guha umwanya abaregwa kugira ngo bose biregure.

Abaregwa baherukaga kwitaba urukiko muri Werurwe uyu mwaka ari nabwo bagombaga gutangira kuburana mu mizi ariko urubanza rurasubikwa nyuma y’inzitizi zatanzwe zirimo kuba Sergeant Ngirinshuti uregwa hamwe nabo yaratorotse akaba ataraboneka. Urukiko rwavuze ko abanza gutumizwaho gutumizwaho mu gihe cy’ukwezi [yaba ataraboneka akazaburana adahari].

Inkuru bijyanye:Abarwanyi 37 bahoze mu mitwe ya P5 na RUD Urunana bitabye urukiko (Amafoto)

Barindwi bahoze muri RUD Urunana bavuze ko bemera ibyaha baregwa ariko bagahakana icyaha cyo kugirana umubano na Leta z’amahanga no kugirira nabi ubutegetsi buriho
Abafashwe baregwa ibyaha bitandukanye bishingiye ku mitwe y'iterabwoba bahozemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .