Urukiko Mpuzamahanga Mpanabyaha rwashyiriweho u Rwanda ruri Arusha muri Tanzania, rwasubitse kohereza mu Rwanda Munyagishari Bernard wari Perezida w’Interahamwe muri Gisenyi, nyuma yo gusanga ko atazabona ubutabera busesuye nk’uko abamwunganira babitangarije urukiko.

Zimwe mu ngingo abunganira Munyagishari bashingiyeho basaba ko atakoherezwa mu Rwanda, zirimo ko Pasiteri Uwinkindi Jean ubu ufungiwe mu Rwanda yaba yarimwe uburenganzira bwo gushakirwa abakozi bamushakira abatangabuhamya be, bityo bo bakabona ko ibi bishobora no kuzagera ku mukiriya wabo kuko bose ngo bahuje dosiye imwe.

Aba bunganizi batangarije Urukiko rw’Iremezo ko Uwinkindi yabwiwe ko mu Rwanda nta tegeko ryemeza ko yagombaga kubona abantu bamushakira atangabuhamya.

Radio BBC dukesha iyi nkuru ivuga ko umucamanza Theodor Meron yahise asaba ko Munyagishari Bernard atakoherezwa mu Rwanda, nyamara mu mwaka ushize hari hemejwe ko yakoherezwa akaburanishwa n’inko z’u Rwanda.

Munyagishari yatawe muri yombi mu mwaka wa 2011 muri Congo- Kinshasa akaba aregwa kurema udutsiko tw’Interahamwe muri Gisenyi, mu bikorwa byo kwica Abatutsi, ndetse no kubafata ku ngufu akaba ari nawe usigaye muri uru rukiko ataraburanishwa.