Banki ya Kigali yijeje ubufatanye mu by’imari Abahinde bakorera mu Rwanda

00:00:00 IGIHE NETWORK

KINYARWANDA

ENGLISH

FRANCAIS

Banki ya Kigali yijeje ubufatanye mu by’imari Abahinde bakorera mu Rwanda

Yanditswe na Ntabareshya Jean de Dieu

Kuya 14 October 2025 saa 05:34

Yasuwe :

Yavuzweho:

Banki ya Kigali yifatanyije n’Abahinde baba mu Rwanda mu kwizihiza umunsi mukuru wa Diwali ufatwa nk’umunsi ukomeye mu mico yabo, yizeza ubufatanye mu by’imari abakorera ibikorwa by’ishoramari mu Rwanda.

Buri mwaka abizera bo mu madini ya Hindu, Sikh, Jain na Buddha barenga miliyari bose bafite inkomoko mu Buhinde baba babukereye mu kwizihiza umunsi bafata nk’udasanzwe mu migenzo yabo uzwi nka Diwali.

Uyu munsi wakomotse ku ijambo ‘Deepavali’ risobanuye uruhererekane rw’umucyo.

Ni ibirori byizihizwa mu minsi itanu, buri munsi ukagira umwihariko, uwa gatatu ukaba ari wo witirirwa Diwali nyayo.

Uyu uba ari umwanya wo gutanga impano, gufasha abababaye n’abatishoboye n’indi mirimo itishyurwa ariko igamije guteza imbere abaturage.

Uyu munsi mu Buhinde urubahwa cyane kuko imirimo yose iba yahagaze, hagatangwa ikiruhuko mu gihugu hose.

Kuri iyi nshuro imiryango irahura, ku bagiye guhahira mu mahanga ya kure, ukaba umwanya wo gusubira mu ngo zabo, bakishimana n’imiryango ndetse n’abafitanye amakimbirane bakongera kunga ubumwe.

Abayoboke b’ayo madini iyo bawizihiza basohokana imuri zitandukanye ariko zitangwa n’amatara gakondo akozwe mu ibumba na za buji zaka bakazikikiza ku nzu zabo.

Mu Mujyi wa Kigali, Abahinde bawutuyemo n’abawukoreramo imirimo y’ubushabitsi n’ishoramari rigari, ku wa 11 Ukwakira 2025, bahuriye hamwe mu kwizihiza uwo munsi, barishimana ndetse bongera gusabana kurushaho.

Ni ibirori byabereye mu Karere ka Gasabo mu Murenge wa Kimironko ahazwi nko MD Hill Garden ahari hahuriye Abahinde benshi baba mu Rwanda.

Muri ibyo birori kandi hari hatumiwe n’abahanzi batandukanye bo mu Buhinde barimo n’abagezweho bifatanya mu byishimo aho baririmbye indirimbo zinyuranye ziganjemo n’izizwi cyane muri filimi zo mu Buhinde nka Kuch Kuch Hota Hai n’izindi.

Abo ni abanyamuziki bakunzwe muri Bollywood nka Nitin Shankar umaze imyaka 47 mu muziki w’u Buhinde, Anup Shankar, Mayur Datta, Deepak Walke, Brijesh Shah, Ganesh Thorat, Arif Sheikh, Rupali Ghogare, Jyoti Shankar, Sanchari Sengupta na Ram Deshpande.

Umuyobozi Ushinzwe Imishinga Mito n’iciriritse muri Banki ya Kigali, Mukunzi Darius yavuze ko iyi banki yishimiye kwifatanya n’Abahinde mu kwizihiza uwo munsi kandi ko ishima uruhare bagira mu bucuruzi.

Ati “Twishimiye cyane kwizihiza umunsi mukuru wa Diwali hamwe n’Abahinde baba mu Rwanda, dushima uruhare rukomeye bagira mu bucuruzi cyane cyane mu nganda, mu buvuzi, ndetse no mu rwego rw’ibicuruzwa bikenerwa cyane.”

Yakomeje ashimangira ko iyi banki izakomeza ubufatanye bwa hafi n’Abahinde baba mu Rwanda binyuze mu bijyanye n’imari yo kurushaho kwagura no guteza imbere ubucuruzi bwabo.

Ati “Twemera ko turi umufatanyabikorwa ukwiye ku Bahinde bose mu bijyanye n’ibikenerwa mu rwego rw’imari, kandi dufite serivisi zihariye zibafasha mu byiciro byose birimo ibigo binini (Corporate), ubucuruzi buto n’ubuciriritse (SMEs) ndetse n’ubuhinzi n’ubworozi (Agribusiness) n’ibindi. Ku muryango wose w’Abahinde, tubifurije ko umunsi mukuru w’urumuri ubamurikira mu buzima bwanyu, ukabazanira ibyishimo, amahoro n’intsinzi.”

Raporo y’Urwego rw’Igihugu rw’Iterambere RDB, yerekanye ko mu 2024 rwakiriye ishoramari rinini riturutse mu Buhinde rigera kuri miliyoni 445,1$ yashyizwe mu mishinga 35.