Dr Ock Park yakebuye urubyiruko rufata ibyemezo bihubukiwe

Yanditswe na Evariste Nsengimana
Kuya 19 Mutarama 2020 saa 09:23
Yasuwe :
0 0

Rev. Dr Ock Soo Park washinze Umuryango mpuzamahanga uharanira Iterambere ry’Urubyiruko IYF (International Youth Fellowship), akaba ari nawe muyobozi wawo ku rwego rw’Isi yasabye urubyiruk0 gutekereza kabiri mbere yo gushyira mu bikorwa imyanzuro rufata kuko akenshi iyahubukiwe ariyo irushora mu manga rutazikuramo.

Izi mpanuro Dr Park wamamaye mu nyigisho zizafasha urubyiruko kugira imitekerereze iruyobora mu nzira nyayo ‘Mind Education’ yazigarutseho kuri uyu wa 18 Mutarama 2020 ubwo yari mu ruzinduko mu Rwanda.

Uyu mugabo wari uherekejwe na bamwe mu baririmbyi bagize itsinda rya Gracias Choir yashinze, yavuze ko abaperezida benshi bo muri Afurika nta n’umwe udahangayikishijwe n’ikibazo cy’urubyiruko.

Ati “Rimwe hari uwambwiye ati ‘nta buryo buhari bwo kurufasha, igihugu cyacu kiri mu bibazo kandi dukoresha ingengo y’imari nyinshi mu gufasha urubyiruko ariko usanga buri gihe twitonganya.”

Ibihugu byinshi usanga urubyiruko arirwo rwihariye umubare munini w’abaturage. Urugero nko mu Rwanda usanga ruri hejuru ya 70% by’abaturage bose. Ni narwo rwihariye umubare munini w’abakozi, bisobanuye ko ikibazo kirwugarije kitarusubiza inyuma gusa ahubwo binagira ingaruka ku bukungu.

Ati “Urubyiruko rwo muri Afurika dukwiye kurutoza gutekereza, rugatekereza rukora kandi muri iki gihe dukomeje iterambere ry’ikoranabuhanga ryatumye bantu duta ubushobozi bwo gutekereza.”

Dr Park yavuze ko ibyo bikomeje kuganisha Isi mu manga bitewe n’ingaruka uko kudatekereza mu buryo buboneye ku bakiri bato, bibagiraho ingaruka no ku bihugu muri rusange.

Muri izo ngaruka harimo nko kwishora mu biyobyabwenge, kujyanwa mu mitwe yitwaje intwaro n’indi mico mibi ikunze kugaragara ku rubyiruko hirya no hino ku Isi.

Dr Park avuga ko umuryango yashinzwe uzakomeza ibikorwa watangije byo gufasha urubyiruko n’abatuye Isi gukomeza mu nzira iboneye binyuze mu nyigisho zo guhindura imyumvire.

Ati “Hari urubyiruko rwinshi muri Afurika rudatekereza byimbitse ariko igitekerezo cya mbere rugize rugahita rugishyira mu bikorwa nyamara igihe batekereje cyane, igitekerezo cya kabiri usanga aricyo cyiza kurusha icya mbere kandi mu gihe bagize imitekerereze nk’iyo bashobora gukora icyo aricyo cyose.”

Bamwe mu baganiriye na IGIHE bemeza ko muri iki gihe usanga urubyiruko ruhugiye mu bintu birusubiza inyuma, kurugira inama bigasa nk’ibigoye.

Uwitwa Muhire Faustin yagize ati “Muri iki gihe usanga urubyiruko rugendera mu kigare cy’abandi rukisanga mu ngeso mbi z’ubusinzi, gukoresha ibiyobyabwenge cyangwa kwirirwa ruzerera kandi mu by’uko ibyo nta nyungu birufitiye uretse kurwicira ahazaza.”

Muri Kamena 2001 nibwo Dr Park yashinze umuryango mpuzamahanga wita ku iterambere ry’urubyiruko ‘International Youth Fellowship, IYF, wibanda ku kuzamura ubushobozi bwarwo n’abantu b’ingeri zitandukanye binyuze ku guhindura imyumvire, bizwi nka Mind Education.

Aya masomo amaze imyaka umunani atangwa mu Rwanda hirya no hino mu mashuri. Muri rusange amaze guhabwa abanyarwanda basaga ibihumbi 30.

Dr Park yamamaye mu nyigisho zigamije guhundurira icyerekezo urubyiruko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza