Umuyobozi w’Inama y’Abaminisitiri akaba na Minisitiri w’u Burundi ushinzwe Ibikorwa bya EAC, Urubyiruko, Siporo n’Umuco, Amb. Dr Ezechiel Nibigira, yavuze ko iyi ngengo y’imari imuritswe mu gihe ubukungu bwa EAC bwahungabanyijwe n’intambara y’u Burusiya na Ukraine, ibibazo by’ubukungu ku rwego rw’Isi, ingaruka za Covid-19 n’iz’imihindagurikire y’ibihe.

Nubwo habayeho izi mbogamizi, izamuka ry’ubukungu mu Karere ryageze kuri 4,8 ku ijana mu 2022 rivuye kuri 3,5% mu 2021.

Izamuka mu Karere ryatewe n’imikorere myiza mu nzego z’inganda, serivisi, ubwubatsi, ubucukuzi bw’amabuye y’agaciro no gutunganya ibikoresho bikabyazwa ibindi.

Dr Nibigira yatanze icyizere cy’uko ubukungu bw’Akarere bushobora gukomeza kugenda neza, bitewe na politiki nziza z’ibihugu n’izamuka ry’ishoramari rya Leta n’iry’abikorera.

Dr Nibigira yavuze ko ubucuruzi bwa EAC bwazamutseho 13,4% bwinjiza miliyari 74 z’amadolari ya Amerika mu 2022 avuye kuri miliyari 65,2 mu mwaka wawubanjirije.

Ibicuruzwa uyu muryango wohereje mu bindi bice by’Isi mu 2022 byari bifite agaciro ka miliyari 20,139 z’amadolari ya Amerika, mu gihe ibyinjiye bibikubye inshuro zirenze ebyiri n’agaciro ka miliyari 53,8$.

Ubucuruzi hagati y’ibihugu bya EAC bwageze kuri 11,2% bwinjiza miliyari 10,9 z’amadolari mu 2022 avuye kuri miliyari 9,8 z’amadolari mu 2021.

Mu bicuruzwa ibihugu byo mu Karere bihererekanya hagati yabyo harimo ibinyampeke, isima, ibyuma bikoreshwa mu bwubatsi, amatungo mazima, ibikomoka kuri peteroli, isukari, ibiribwa n’ibinyobwa, bivuze ko ubukungu bwabyo bushingiye cyane cyane ku buhinzi.

Muri iyi ngengo y’imari ya 2023/2024, Ubunyamabanga bwa EAC bugenewe miliyoni zisaga 50,9$ mu gihe Urukiko rwagenewe 4,4 $.

Inteko Ishinga Amategeko (EALA) igenewe miliyoni zisaga 17$; Komisiyo ishinzwe kubungabunga Ikibaya cya Victoria yagenewe miliyoni 8,4 $ mu gihe Inama ishinzwe za kaminuza yagenewe miliyoni 12$.

Umuryango ushinzwe Uburobyi (miliyoni 2,8$); Komisiyo ishinzwe Siyansi n’Ikoranabuhanga (miliyoni 2,01$); Komisiyo ishinzwe Ururimi rw’Igiswahili ni miliyoni 1,5$. Izindi nzego ni Komisiyo ishinzwe Ubushakashatsi mu by’Ubuzima yagenewe miliyoni 2,1$ n’urwego rushinzwe Amarushanwa yagenewe miliyoni 1,3$.

Biteganyijwe ko miliyoni zisaga 59 $ azava mu misanzu y’ibihugu binyamuryango mu gihe miliyoni 44$ ategerejwe mu baterankunga b’uyu muryango.

Umuyobozi w’Inama y’Abaminisitiri akaba na Minisitiri w’u Burundi ushinzwe Ibikorwa bya EAC, Urubyiruko, Siporo n’Umuco, Amb. Dr Ezechiel Nibigira

EALA yamurikiwe ingengo y’imari ya EAC ya miliyoni zisaga 103 z'amadolari ya Amerika mu 2023/2024