Amezi arindwi arashize urubyiruko rwarangije amashuri yisumbuye rutangiye urugerero, muri aya mezi , asize gahunda za Leta ziteza imbere abaturage inyinshi zishyizwe mu bikorwa, ndetse hanakemuka bimwe mu bibazo byari byarananiranye.

IGIHE cyasuye urubyiruko rusaga 1761 rwo mu karere ka Gasabo ruvuye ku rugerero rubagaragariza bimwe mu bikorwa babashije kugeraho.

Mu mezi arindwi ashize urubyiruko rwa Gasabo rwabashije gufasha akarere gukemura bimwe mu bibazo, nko gukwirakwiza inzitiramibu mu baturage, bafashije ikigo cy’imisoro n’amahoro mu Rwanda (RRA) batwara impapuro z’abasoreshwa bakazikwirakwiza mu bacuruzi ndetse bakanabakangurira gusora, gukwirakwiza ibyangombwa biba byaraheze ku biro by’Imirenge bigakwirakwizwa mu baturage bene byo, cyane cyane ibyangombwa by’ubutaka.

Uru rubyiruko rwari ku rugerero kandi rwashishikarije abaturage kugira ikaye y’imihigo mu muryango n’iy’umutekano ndetse banasaba banereka abaturage ibyiza byo kugira itara ry’umutekano.

Ku rugerero bafashe umwanya wo kwiga ku ndangagaciro z’Umunyarwanda

Izi ntore zavuye ku rugerero zafashe umwanya wo kwiga ku ndangagaciro z’Umunyarwanda. Umurungi Grace umaze amezi arindwi ku rugerero yavuze ko muri aya mezi arindwi ashize yabashije kumenya agaciro k’Umunyarwanda.
Umurungi yagize ati “Mu kwanga kwiha rubanda biha agaciro nta Munyarwanda wategaga amaboko ngo asabirize natwe ntabwo tuzasabiriza.”

Gakwaya Jean Pierre ushinzwe Itorero muri Gasabo yemeza ko rifite umumaro munini mu guhwitura urubyiruko kugira ngo amenye agaciro afite mu gihugu.

Munara Jean Claude umuyobozi w’akarere ka Gasabo wungirije ushinzwe ubukungu yatangarije IGIHE ko urubyiruko ari imbaraga z’igihugu ati “ Urubyiruko rw’u Rwanda ruri ku kigero cya 60% imbaraga u Rwanda rushyira mu kwigisha urubyiruko rw’u Rwanda, gukora n’amahoro bizatanga umusaruro.”

Umukuru w’Itorero Rucagu Boniface yagaragaje ko urugerero rufite uruhare runini mu kubaka igihugu ubwo hasozwaga icyiciro cya mbere cy’Intore ziri ku rugerero.
Gahunda y’itorero yatangiye mu mwaka 2010 yaje isimbuye ingando zakorwaga n’abanyeshuri babaga bagiye gutangira amashuri makuru na za Kaminuza.

Urubyiruko rwavuye ku rugerero