Mu karere ka Gicumbi amakoperative icyenda y’ababana n’ubwandu bw’agakoko gatera SIDA hamwe n’abandi batishoboye yari yaragabiwe inka na Croix Rouge y’u Rwanda yakoze igikorwa cyo kuziturira bagenzi babo zitari zaragezeho mu cyiciro cya mbere.

Gahunda yo kuzitura izo nka yabaye mu mpeza z’icyumweru gishize, mu murenge wa Giti, Akarere ka Gicumbi mu Ntara y’Amajyaruguru. Abari barahawe inka mbere bishimiye kuziturira bagenzi babo zitari zaragezeho, bavuga ko babikoze bagendeye ku ndangagaciro z’urukundo z’umuryango utabara imbabare w’u Rwanda, bityo na bo bagize umutima utabara bituma baziturira bagenzi babo.

Umuhuzabikorwa wa Gahunda y’ubuzima muri Croix Rouge y’u Rwanda, Ruberwa Prosper, avuga ko uyu mushinga ukorera mu mirenge icyenda igize akarere ka Gicumbi, umaze kugeza kuri byinshi amakoperative bakorana na yo ndetse ko bazanakomeza kubafasha.

Uwari uhagarariye Ubuyobozi bw’umurenge wa Giti, Habineza Gabriel ashima ibikorwa by’indashyikirwa Croix Rouge y’u Rwanda imaze kugeza ku baturage b’umurenge wa Giti. Avuga ko uguhaye inka aba akurinze imirire mibi, abana bagakura batarwara bwaki. Bityo yaboneyeho gusaba Croix Rouge y’u Rwanda gukomeza gufasha uyu murenge, cyane cyane ko ari yo yonyine ikorera muri uwo murenge nk’umuterankunga. Yijeje ubufatanye mu gufasha ariya makoperative kubyaza umusaruro inkunga bahawe ku buryo izababera umusingi w’iterambere.

Mukangarambe Marie Claire, avuga ko yishimiye ko inka yahawe yororotse akaba abashije no guha mugenzi we, ndetse amaze kugera kuri byinshi abikesheje ibyo Croix Rouge imaze kubakorera harimo no kuba ari yo yabashije kubagira inama zo kwibumbira hamwe mu makoperative.

Ku bwa Croix Rouge y’u Rwanda, Nuwumugabo Antoine ukora mu biro by’ubukangurambaga n’ihererkanyamakuru avuga ko izi gahunda ziri mu nshingano za Croix Rouge y’u Rwanda, nko gufasha abatishoboye bahereye ku bababaye kurusha abandi. Muri uko kubafasha habamo no kubarinda imirirere mibi, ndetse no kubarinda indwara z’ibyorezo nka SIDA, Malariya n’izindi.

Uyu mushinga ufite abagenerwabikorwa b’imiryango 2025, buri murenge ukaba urimo ingo 225. Ufatiye hamwe inkunga Croix Rouge y’u Rwanda imaze gutanga muri iyi gahunda, igizwe n’inka 111, n’ingurube 78. Hateganyijwe kandi gutangwa izindi nka 90 n’ingurube 156.

Aborojwe na Croix Rouge y'u Rwanda bazituriye abaturage bo mu murenge wa Giti