Minisiteri ya Siporo n’Umuco ifatanyije n’inzego ziyishamikiyeho yateguye imikino itandukanye mu rwego rwo kwibuka abagize uruhare mu guteza imbere Siporo n’Umuco bishwe muri Jenoside yakorewe Abatutsi mu 1994.

Igihe cyo kwibuka cyahariwe ibyumweru bibiri, byatangijwe ku mugaragaro ku itariki ya 01 Kamena 2013 bikazasozwa tariki ya 15 Kamena 2013 kuri Petit Stade i Remera guhera saa kumi n’imwe z’umugoroba.

Nk’uko tubikesha Guillaume Serge Nzabonimana Umuhuzabikorwa wa Gahunda yo kwibuka muri Minisiteri ya Siporo n’Umuco, uretse imikino yatangiye tariki ya mbere ikaba igikomeza, hateganyijwe n’ibindi bikorwa bitandukanye birimo igitaramo kizaba ku wa gatanu tariki ya 14 Kamena 2013 guhera saa kumi n’imwe ku Gicumbi cy’Umuco (Ihema rinini ryera riri inyuma ya Stade Amahoro), aho abahanzi banyuranye bazaririmba indirimbo za bamwe mu bo twibuka nka Sebanani Andereya, Karemera Rodrigue, Roti Bizimana, Bizimungu Dieudonne, Amasimbi n’amakombe n’abandi benshi.

Tariki ya 12 Kamena 2013 MINISPOC n’ibigo biyishamikiyeho bazasura abarokotse Jenoside bo mu Mudugudu wa Rwezamenyo, Akagari ka Kibibi, Umurenge wa Kibumbwe, Akarere ka Nyamagabe, Intara y’Amajyepfo bari mu mashyirahamwe: ABISHYIZEHAMWE, TWISUNGANE n’urwibutso rwa Murambi ruri muri ako Karere.

Tariki ya 15 Kamena 2013 hazaba ikiganiro kizibanda ku ngingo eshatu, ireba Siporo, Umuco n’iy’imiyoborere myiza. Biteganijwe ko icyo kiganiro kizabera kuri Lemigo Hotel guhera saa mbiri za mugitondo kugeza saa sita n’igice z’amanywa.

Muri iki cyumweru cyo kuva tariki ya 10 kugeza kuya 15 hazaba n’ibiganiro ku maradiyo. Ibyo biganiro bizatangwa n’abanditse ibitabo kuri Jenoside yakorewe Abatutsi barimo Kayijamahe Venuste, Bampoliki Edouard, John Rusimbi, Munyaburanga Basengo, Jacques Buhigiro, Omar Manzi n’abandi. Hari n’ibindi biteganyijwe birimo na Filime.