Huye: Imiryango icumi y’abarokotse Jenoside yakorewe Abatutsi yahawe inzu zo kubamo

Yanditswe na Prudence Kwizera
Kuya 14 Mata 2021 saa 08:06
Yasuwe :
0 0

Imiryango icumi y’abarokotse Jenoside yakorewe Abatutsi yo mu Murenge wa Kigoma mu Karere ka Huye, yahawe inzu zo kubamo kuko yari imaze igihe itagira amacumbi meza yo guturamo.

Izo nzu bazihawe kuri uyu wa Kabiri tariki ya 13 Mata 2021 ubwo mu Murenge wa Kigoma hibukwaga Abatutsi bahiciwe ubwo bari bahahungiye muri Mata 1994. Muri icyo gikorwa hashyinguwe mu cyubahiro imibiri itatu iherutse kuboneka.

Bamwe mu barokotse Jenoside bahawe izo nzu zirimo n’ibikoresho by’ibanze nk’iby’isuku, ibyo mu gikoni, ibiryamirwa n’intebe, ameza n’akabati, bavuze ko imibereho yabo igiye guhinduka ikarushaho kuba myiza.

Mukarurinda Patricie yavuze ko inzu yari yarubakiwe mu 1999 yashaje bituma ajya gucumbika mu Burasirazuba aho yacaga inshuro kugira ngo abone amafaranga y’ubukode.

Ati “I Kibungo nagiyeyo mu 2017 mu kwezi kwa Cyenda, ni uko ejobundi mu kwa mbere ngiye kumva numva ngo batangiye kutwubakira. Ejobundi ngiye kumva numva umuyobozi w’umurenge arampamagaye ngo nze gutombora inzu.”

Uyu mubyeyi w’imyaka 51 ufite abana batatu, yashimiye ubuyobozi bwamuhaye inzu nziza yo kubamo avuga ko azayifata neza.

Ati “Nzayifata neza, niba ari n’ikirahure kimenetse nzashaka uko ngisubizamo ntiriwe mbahamagara.”

Perezida wa Ibuka mu karere ka Huye, Siboyintore Théodate, yavuze ko bimwe mu bikibangamiye imibereho y’abarokotse Jenoside harimo abatagira amacumbi ariko uko ubushobozi bubonetse bagenda bubakirwa.

Ati “Haracyari ibibazo bishingiye ku ngaruka za Jenoside nk’ihungabana ndetse n’ibikomere bidakira. Amacumbi adahagije nayo aracyari ikibazo ndetse n’inzu zishaje, ariko uko ubushobozi buboneka tugenda tububakira duhereye ku bababaye kurusha abandi.”

Iyo miryango 10 yahawe inzu eshanu kuko zubatswe mu buryo bw’ebyiri muri imwe. Buri muryango wahawe inzu ifite ubwiherero n’igikoni kandi hari n’ibigega bifata amazi. Izo nzu zose zuzuye zitwaye miliyoni 120 Frw.

Buri muryango wahawe inzu ifite ubwiherero n'igikoni ndetse n'ibigega bifata amazi
Abarokotse Jenoside bishimiye inzu bahawe, bavuga ko bazazifata neza
Inzu zose bahawe zuzuye zitwaya miliyoni 120 Frw

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .