Ku wa 23 Mutarama 2025, Perezida Kagame yakiriwe na mugenzi we, Recep Tayyip Erdoğan, babanza kugirana ibiganiro, nyuma baganira n’abanyamakuru ndetse banayobora isinywa ry’amasezerano y’ubufatanye hagati y’ibihugu byombi mu nzego zinyuranye.

U Rwanda na Turikiya byasinyanye amasezerano y’ubufatanye mu nzego enye, zirimo itangazamakuru n’itumanaho, iperereza ku mpanuka n’ibibazo bikomeye by’indege za gisivile, radiyo na televiziyo n’ikoranabuhanga mu gisirikare.

Perezida Kagame yavuze ko isinywa ry’ayo masezerano y’ubufatanye ryerekana ubushake bw’ibihugu byombi bwo kurushaho gufatanya.

Yagize ati "Ni ikimenyetso ko u Rwanda na Turikiya, byose birajwe ishinga no gushaka amahirwe y’ubufatanye. Isinywa ry’aya masezerano ni ikimenyetso cy’iyi ntumbero dusangiye mu kurushaho gufatanya."

Perezida Erdoğan yatangaje ko byari iby’agaciro gakomeye guhura n’inshuti ye Perezida Kagame.

Ati “Byari iby’agahebuzo kuri njye kwakira inshuti yanjye Perezida Paul Kagame, mu ruzinduko rwa mbere rw’akazi rw’Umukuru w’Igihugu uturutse mu Rwanda agiriye mu gihugu cyacu. Uruzinduko rw’uyu munsi turufata nk’indi ntambwe nshya mu guteza imbere ubufatanye bw’impande zombi.”

Perezida Erdoğan yavuze ko nyuma y’ifungurwa rya za Ambasade z’ibihugu byombi muri buri gihugu, ni ukuvuga gufungura iya Turikiya mu Rwanda n’iy’u Rwanda muri Turikiya, bikozwe mu 2013 no mu 2014, umubano w’ibihugu byombi wakomeje gutera imbere umunsi ku wundi

Muri uru ruzinduko Perezida Kagame na Madamu Jeannette Kagame basuye ahantu hatandukanye, aho basuye banashyira indabo ku mva ya Mustafa Kemal Atatürk ufatwa nk’uwashinze Turikiya, akaba ari na we wayibereye Perezida wayo wa mbere nyuma yo kubona ubwigenge. Yayoboye Turikiya kuva mu 1923 kugeza igihe yapfiriye mu 1938.

Mustafa Kemal Atatürk wamenyekanye ku izina rya Mustafa Kemal Pasha kugeza mu 1921, ni we musirikare wari ufite ipeti ryo hejuru mu banyapolitike n’abasirikare bayoboye impinduramatwara yagejeje ku ihangwa n’ubwigenge bya Turikiya nk’igihugu kikiriho n’ubu.

Anitkabir ni inyubako y’amateka ishyinguyemo Mustafa Kemal Atatürk yubatswe mu 1944, yuzura mu 1953. Iherereye mu Karere ka Çankaya mu Murwa Mukuru wa Turikiya, Ankara.

Ku wa 23 Mutarama 2025 kandi, Madamu Jeannette Kagame ari kumwe na Madamu wa Perezida wa Turikiya, Emine Erdoğan, basuye inzu ikorerwamo ubukorikori ikanerekanirwamo umuco nyafurika muri Turikiya, ndetse banasura isomero ry’igihugu.

Ubwo Perezida Kagame yageraga muri Turukiya ku wa 22 Mutarama 2025.

Ubwo Perezida Kagame na Madamu Jeannette Kagame bageraga i Ankara ku wa 22 Mutarama 2025

Perezida Erdoğan asuhuza bamwe mu baherekeje Perezida Kagame

Ku wa 23 Mutarama 2025, Perezida Kagame yakiriwe na mugenzi we, Recep Tayyip Erdoğan

Perezida Recep Tayyip Erdoğan yavuze ko yishimiye kwakira inshuti ye Perezida Kagame

Ubwo Perezida Recep Tayyip Erdoğan na yakiraga mugenzi we w'u Rwanda, Paul Kagame

Umubano w’u Rwanda na Turikiya wateye imbere byihuse kuva ubwo u Rwanda rwafunguraga Ambasade i Ankara mu 2013. Mu mwaka wakurikiyeho, iki gihugu na cyo cyafunguye Ambasade i Kigali

Perezida Kagame yakiriwe na Erdoğan mu cyubahiro kigenerwa abakuru b'ibihugu

Ikirere cya Turikiya cyari gikonje, ubwo Perezida Kagame yakirwaga na mugenzi we Erdoğan

Itsinda ryo mu Ngabo za Turikiya rishinzwe kwakira abashyitsi bakomeye ni ryo ryakiriye Perezida Kagame

Perezida Kagame yageze muri Turikiya ku wa 22 Mutarama 2025

Perezida Kagame yaganiriye na mugenzi we Erdoğan, nyuma banagirana ikiganiro n'abanyamakuru

Perezida Kagame na Erdoğan binjira ahabereye ibiganiro

Mu biganiro by'aba bakuru b'ibihugu bombi, bagarutse no ku bibazo by'umutekano muke mu Burasirazuba bwa RDC, Erdoğan avuga ko ashyigikiye ibiganiro bya Luanda

Turikiya n'u Rwanda bisanzwe bifitanye umubano ukomeye ndetse Sosiyete zo muri Turikiya zashoye imari mu Rwanda

Perezida Erdoğan yishimiye kwakira Perezida Kagame yise inshuti ye

Impande zombi ziyemeje gushimangira umubano mwiza zisanzwe zifitanye

Habayeho ibiganiro byanahuriyemo abari baherekeje Perezida Kagame n'abayobozi batandukanye ba Turikiya, byemerejwemo amasezerano y'ubufatanye mu nzego zitandukanye

Perezida Erdoğan yavuze ko yishimira uko umubano w'u Rwanda na Turikiya ugenda utera imbere

Perezida Kagame akurikiye ibiganiro byahuje impande zombi

Umunyamabanga wa Leta muri Minisiteri y'Ububanyi n'Amahanga, Gen (Rtd) Kabarebe, yasinye amwe mu masezerano ku ruhande rw'u Rwanda

Minisitiri w'Ingabo, Juvénal Marizamunda, yashyize umukono ku masezerano y'ubufatanye bw'ibihugu byombi, mu bijyanye n'ikoranabuhanga mu gisirikare

Perezida Kagame na Erdoğan ubwo basubizaga ibibazo by'abanyamakuru

Hasinywe amasezerano y'ubufatanye mu nzego zirimo itangazamakuru n’itumanaho, iperereza ku mpanuka n’ibibazo bikomeye by’indege za gisivile, radiyo na televiziyo n’ikoranabuhanga mu gisirikare

Perezida Kagame na Recep Tayyip Erdoğan wa Turukiya, biyemeje gukomeza gushimangira umubano w'ibihugu byombi

Aba bakuru b'ibihugu byombi bagiranye ikiganiro n'itangazamakuru cyagarutse ku ngingo zinyuranye

Perezida Recep Tayyip Erdoğan yavuze ko igihugu cye kizashyigikira ibiganiro byatuma hagaruka umwuka mwiza mu Karere k'Ibiyaga bigari

Muri uru ruzinduko, Perezida Kagame na Madamu Jeannette Kagame basuye imva ya Mustafa Kemal Atatürk ufatwa nk’uwashinze Turikiya

Madamu Jeannette Kagame ubwo yerekezaga ahari imva ya Mustafa Kemal Atatürk

Ubwo Perezida Kagame na Madamu Jeannette Kagame bageraga ku mva ya Mustafa Kemal Atatürk

Ubwo berekezaga ku mva ya Mustafa Kemal Atatürk kugira ngo bamwunamire

Ibitonyanga by'imvura ntibyabujije Perezida Kagame na Madamu Jeannette Kagame kujya kunamira Mustafa Kemal Atatürk

Anitkabir ni inyubako y’amateka ishyinguyemo Mustafa Kemal Atatürk yubatswe mu 1944, yuzura mu 1953. Iherereye mu Karere ka Çankaya mu Murwa Mukuru wa Turikiya, Ankara

Perezida Kagame na Madamu Jeannette Kagame bunamiye Mustafa Kemal Atatürk

Perezida Kagame yashyize indabo ku mva ya Mustafa Kemal Atatürk

Perezida Kagame yanditse mu gitabo cy'urwibutso ku mva ya Mustafa Kemal Atatürk

Perezida Erdoğan ubwo yari ategereje kwakira Perezida Kagame

Mustafa Kemal Atatürk yapfuye mu 1938

Madamu Jeannette Kagame ari kumwe na Madamu wa Perezida wa Turikiya, Emine Erdoğan, basuye inzu ikorerwamo ubukorikori ikanerekanirwamo umuco nyafurika muri Turikiya

Madamu Jeannette Kagame ari kumwe na Madamu wa Perezida wa Turikiya, Emine Erdoğan basuye n'isomero ry'igihugu

Madamu Jeannette Kagame yafatanye ifoto y'urwibutso n'abana

Amafoto: Village Urugwiro