Itangazamakuru ry’u Rwanda riragana he? - Ikiganiro na Peacemaker Mbungiramihigo

Yanditswe na Ferdinand Maniraguha
Kuya 9 Ukwakira 2019 saa 04:11
Yasuwe :
0 0

Imyaka ibaye hafi irindwi mu itangazamakuru ry’u Rwanda hakozwe amavugurura yatanze uburenganzira havuka ibitangazamakuru byinshi bitandukanye, hajyaho amategeko yorohereza abanyamakuru kubona amakuru, hashyirwaho urwego rw’abanyamakuru bigenzura n’ibindi.

Icyo gihe nibwo Inama Nkuru y’Itangazamakuru (Media High Council, MHC) yahinduriwe inshingano, ziva ku kugenzura ibitangazwa n’ibinyamakuru gusa aho ziyongeraho guhugura no kubakira ubushobozi abanyamakuru ndetse n’ibinyamakuru ngo ibitangazwa bibe binoze n’imicungire y’ibitangazamakuru inoge.

Nubwo yabaye imyaka yo kwiyubaka no guhugurwa dore ko MHC ivuga ko imaze guhugura abanyamakuru basaga igihumbi, ibinyamakuru bikaba byariyongereye, imyaka irindwi ishize yaranzwe n’ibindi bibazo byanakunze kuvugwaho gusubiza inyuma itangazamakuru ry’u Rwanda.

Ibinyamakuru byinshi byaravutse ariko binengwa kuba bidatangaza amakuru acukumbuye ababikurikira bakeneye, amikoro yagiye aba make bimwe bigenda bifunga imiryango, bamwe mu banyamakuru bamaze kugira ubunararibonye bagiye basezera bakigira mu bindi, imvange y’ibinyuzwa ku mbuga nkoranyambaga n’ibindi.

IGIHE yagiranye ikiganiro n’Umunyamabanga Nshingwabikorwa w’Inama Nkuru y’Itangazamakuru, Peacemaker Mbungiramihigo, asobanura ibyagezweho muri iyi myaka yose, intandaro y’ibibazo bikivugwa mu itangazamakuru n’ingamba zihari.

IGIHE: Kuva mwahabwa inshingano nshya, ni uwuhe musaruro byatanze ku itangazamakuru?

Mbungiramihigo: Twabonye impinduka kuko ubwo twahabwaga inshingano, ubunyamwuga mu itangazamakuru bwari kuri 51.9 %, mu 2018 byatugaragarije ko biri kuri 68.4 %.

Ubu icyo dushaka gushyira imbere cyane ni ukugira impuguke z’abanyamakuru bashobora kudufasha mu guherekeza gahunda zitandukanye za Leta. Tukagira impuguke z’abanyamakuru mu by’imari n’ubukungu, ubuzima, ibidukikije, ubutabera. Badafite gusa ubumenyi bwo gutara no gutangaza amakuru gusa ahubwo no kuba inzobere ngo bafashe Leta n’abanyarwanda.

IGIHE: Ni ayahe makosa yakorwaga n’abanyamakuru ubu atagikorwa?

Mbungiramihigo: Hari amakosa yagiye akorwa n’abanyamakuru mu gihe twiyubakaga ugasanga umwuga urakorwa n’abantu badafite ubumenyi buhagije mu itangazamakuru. Ugasanga inkuru yakoze nticukumbuye, ntabwo yahaye umwanya ukwiriye buri muntu urebwa n’iyo nkuru. Ugasanga inkuru ntiha impande zitandukanye zirebwa nayo, ikaba nk’ibogama.

Hari ugukora inkuru zishingiye cyane ku bitekerezo, ugasanga ni ibitekerezo by’umunyamakuru ariko ntubone iby’abandi barebwa nayo. Hakabaho no gusebanya.

Ubu abakora umwuga w’itangazamakuru abenshi barawize, n’abatarawize amahugurwa tubaha yabashyize ku rwego rwisumbuye ku buryo ubu nta wakabaye yitwaza ko nta bumenyi afite.

IGIHE: Itangazamakuru ryakunze gutaka ubukene, iki cyo kizakemurwa n’iki?

Mbungiramihigo: Ni ikibazo kijyana n’ubushobozi muri rusange igihugu gifite. Nyuma ya Jenoside yakorewe Abatutsi, igihugu cyacu cyariyubatse mu nzego zitandukanye. Nta byera ngo de! Hari byinshi bikwiriye gushyirwamo imbaraga ngo itangazamakuru rikorwe mu buryo burambye.

Muri 2013, ibitangazamakuru byiyongeraga ku gipimo cya hafi 50% ariko uko tureba ubwiyongere bwabyo bigeze hafi kuri 66%, uko byiyongera ni uko hari amahirwe yo kuba byabyazwa umusaruro.

Kugira ngo itangazamakuru rirusheho gutanga umusanzu waryo ni uko ritagomba gukora nka nyamwigendaho, abantu bashyire hamwe. Ni nacyo tubakangurira. Ikindi bagomba guhorana udushya, ni isoko rito rikeneye udushya bityo n’abifuza gukorana n’igitangazamakuru baze babagana.

Ikindi ni ugukora n’imishinga. Igitangazamakuru nticyatera imbere kigendera gusa ku nkunga cyahawe. Hari imishinga myinshi igitangazamakuru cyakora gifatanyije n’abafatanyabikorwa kuko abifuza guteza imbere itangazamakuru bagaragaza ibyo bakora.

Bagomba no guhindura imikorere kuko uko itangazamakuru ryakorwaga mu myaka itandatu ishize, siko ubu ryakabaye rikora kuko isi irihuta, birabasaba guhora bihugura haba mu micungire y’ibitangazamakuru, mu bucuruzi n’ibindi.

IGIHE: Mu minsi ishize hari radiyo na televiziyo zagiye zifunga imiryango ndetse n’ibinyamakuru, mubona ari ibisanzwe?

Mbungiramihigo: Mu mboni yanjye, mbibonamo ibibazo bitandukanye. Biterwa n’impinduka iba yabaye mu isoko umuntu aba yashoyemo imari noneho agasanga gukomeza gukora atunguka ibyiza ari uko yafata umwanzuro wo gufunga imiryango agashora imari mu bindi byamugirira akamaro.

Ikindi rimwe na rimwe ni ukwinjira mu isoko umuntu atabanje gukora ubushakashatsi bwimbitse ngo amenye isoko amahirwe rimuha arebe ibibazo bimwe ashobora guhura nabyo, no kureba icyo aje atanga kuri iryo soko, ese ibyo abamukurikira bakeneye bimeze bite? Iyo udushya tutabonetse niho usanga rimwe na rimwe ishoramari washyize mu gitangazamakuru cyawe ritaguha inyungu.

Ikindi hari ubwo umuntu afata icyerecyezo kirekire, agatanga amafaranga menshi noneho yashaka inyungu agasanga ntizihuye n’igishoro yashyizemo, yaba ku bakozi ahemba cyane, yaba ubundi buryo yashyize mu mushinga, bimwe byo kwiha [umupira] muremure.

Umunyamabanga Nshingwabikorwa w’Inama Nkuru y’Itangazamakuru, Peacemaker Mbungiramihigo, asobanura ibyagezweho n'ibiteganywa ngo itangazamakuru ritere imbere

IGIHE: Ni gake usanga abanyamakuru bamaze igihe mu mwuga bakomeza kuwurambamo, byo biterwa n’iki?

Mbungiramihigo: Icyo ni ikibazo gituruka ku muntu uba ushaka guhora atera imbere. Uko umuntu atera imbere ashaka ikirenze ibyo yari afite. Ni ikibazo kidashobora guhita kirangira , icyaba ikibazo cyane ni uko abantu bava mu itangazamakuru , rigasigaramo abadafite ubushobozi ariko iyo ava mu gitangazamakuru kimwe ajya mu kindi byo si ikibazo.

Kujya hanze y’umwuga byo ni ikibazo ariko mu bushakashatsi dufite, ntabwo turabona abo bantu benshi cyane gusa turifuza ko n’abawurimo bashikama bagatera imbere.

IGIHE: Havuzwe kenshi ikigega cy’abanyamakuru kizabafasha kwiteza imbere, bizashoboka?

Mbungiramihigo : Kirashoboka kuko nyuma y’ibyiciro bitatu by’itorero ry’abanyamakuru , 354 [Baryitabiriye] bafashe ingamba zo gushyiraho ikigega kigamije kwizigamira no guteza imbere imishinga y’abakora itangazamakuru.

Bamaze gushyiraho ubuyobozi n’amategeko akigenga, inama rusange iheruka yateganyije amafaranga shingiro buri munyamuryango yajya atanga, Urwego rw’igihugu rushinzwe imiyoborere (RGB) rwemeye miliyoni eshanu zo kugishyigikira kandi n’abandi bafatanyabikorwa bariteguye.

IGIHE: Ubwiyongere bw’imbuga nkoranyamba, zifatwa nk’igitero cyagabwe ku itangazamakuru gakondo, niko mubibona?

Mbungiramihigo: Simbibona nk’igitero, mbibona nk’amahirwe itangazamakutru rigenda rigira ngo rigere kuri benshi. Itangazamakuru rikwiriye kubona ayo mahirwe nk’uburyo bwo kwiteza imbere akabyazwa umusaruro, tukanahindura imikorere.

IGIHE: Ibinyuzwa ku mbuga nkoranyambaga bireba nde, ko hari abafata iryo tangazamakuru nk’iridafite urishinzwe?

Mbungiramihigo: Ingamba dufite dufatanyije n’inzego za Leta, ni izo kuvugurura amategeko agenga itangazamakuru, agenga imbuga nkoranyambaga n’ajyana n’imigenzurire y’ikoranabuhanga.

Uko ikoranabuhanga riduha amahirwe yo kubyaza umusaruro, riranaduha na bimwe mu bibazo bikwiriye gushakirwa ingamba mu kubungabunga ubusugire bw’igihugu, imibereho y’abanyarwanda no kubungabunga uburezi bw’abana bacu kuko tutabungabunze ikoranabuhanga ryatumira ugasanga iterambere duharanira ntiturigezeho.

IGIHE: U Rwanda mubona hari ubwo ruzagira itangazamakuru rikomeye ku rwego mpuzamahanga?

Mbungiramihigo: Twatangiye kubiganiraho.Turifuza ko iterambere ry’itangazamakuru ritagarukira ku rwego rw’igihugu gusa ahubwo byagera no ku rwego rwa Afurika no mu karere, tukagira itangazamakuru ritera imbere.

Mbungiramihigo yavuze ko intego ari uguhura abanyamakuru ku buryo mu Rwanda haboneka abanyamakuru b'inzobere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza