Aba bagabo bamaze imyaka irenga 10 bakorana, ni bamwe mu bagezweho muri iyi minsi cyane muri iki kiganiro kiri mu bikunzwe mu Rwanda.

Ubwo yari abajijwe niba ajya yibona atari kumwe na KNC cyangwa niba hari ibindi bitangazamakuru byamwifuje, Mutabaruka yavuze ko byabayeho byinshi ariko atakwemera kuva kuri Radio TV1.

Yagize ati “Ibitangazamakuru byaraje ariko sinagiye. Buriya gukorana na KNC ni umunyenga. Icya mbere agendera ku murongo mu kazi kandi abantu benshi ntibabikunda. Nta mikino agira mu kazi kandi nanjye numva ntayo nshaka.”

Yakomeje atanga ubuhamya bw’uko KNC yamuvuje amaso ubwo yari arwaye ishaza.

Ati “Njye narwaye ishaza kandi bataribaze burya wanahuma. Narwaye amaso ku rwego rukomeye, kureba ikintu kiri muri metero sinakibonaga. KNC rero yaramvuje.”

“Umuntu nk’uwo wamuta ukajya he? Ni abakoresha bangahe bafata umukozi muri ubwo buryo? Hari undi mukozi twahakoranye arwaye impyiko ku rwego rukomeye, umuhungu yari agiye gupfa ariko aho abivugiye KNC yaramuvuje.”

Benshi mu bakurikira ikiganiro cy’aba bagabo, bakunze kugaruka ku mpaka zikirangwamo, aho bamwe bagaragaza ko Mutarabaruka ashobora kuba adatinya umukoresha we.

Icyakora uyu mugabo avuga ko impaka zabo zirangirira mu kiganiro kandi ko adasuzugura umukoresha we nk’uko benshi babitekereza.

Ati “Birangirira muri studio kandi akenshi birangira neza. Hanze y’ikiganiro KNC aba umukoresha nanjye nkaba umukozi. No mu kiganiro burya byashoboka ariko we ntabwo ariko abikora, ahubwo icyo nabwira abantu ni uguca bugufi imbere y’umukoresha we.”

Mutabaruka kandi yagaragaje ko abavuga ko impaka bajya ari ibintu biba byateguwe, atari byo kuko bitaramba ngo bagere mu myaka irenga 10 bamaze bakorana.

Mutabaruka Angelbert yagaragaje ko gukorana na KNC ari umunyenga

Mutabaruka yashimiye KNC wamuvuje amaso ubwo yari arwaye ishaza

IGIHE Sports Club ni kimwe mu biganiro bigezweho muri iki gihe