Iri rushanwa ryegukanywe na Singida Black Stars yatsinze Al Hilal ibitego 2-1.

Memel Raouf ni umukinnyi ukiri muto, ushobora gufasha byinshi ikipe y’Ingabo z’Igihugu by’umwihariko mu mikino Nyafurika ya CAF Champions League izitabira mu minsi mike iri imbere.

Muri iri rushanwa ryabereye i Dar es Salaam, Dao yatsinze ibitego bibiri, anatanga imipira ibiri yavuyemo ibitego byatsinzwe na William Togui.

Yatowe kandi nk'umukinnyi w'umukino inshuro ebyiri; ku mukino APR FC yatsinze Bumamuru FC yo mu Burundi n'uw'umwanya wa gatatu wakinwe ku wa 15 Nzeri 2025.

Uyu mukinnyi w’imyaka 21 wakiniraga AS Sonabel Ouagadougou, yageze muri APR FC mu mpeshyi ya 2025, nyuma y'uko yari yabaye umukinnyi mwiza w'umwaka muri Burkina Faso.

Ikipe y'Ingabo z'Igihugu yegukanye umwanya wa gatatu muri CECAFA Kagame Cup 2025 nyuma yo gutsinda Kinondoni Municipal Council (KMC) FC yo muri Tanzania 1-0 cyinjijwe na Memel Dao ku munota wa 45.

Ni ku nshuro ya kabiri yikurikiranya umukinnyi wa APR FC aba umukinnyi mwiza w’irushanwa kuko umwaka ushize icyo gihembo cyari cyegukanywe na Niyigena Clément.

Iri rushanwa rihuza amakipe yo muri Afurika y'Iburasirazuba n'iyo Hagati, riterwa inkunga na Perezida Paul Kagame kuva mu 2002.