Mu kiganiro yagiranye na RBA, yavuze ko abanga kwikingiza baba bahemukira abantu benshi nabo batiretse bityo ko Minaloc itazahwema kubigisha no kubahwitura ku kwikingiza iki cyorezo.

Yagize ati “Abinangira kubera imyumvire, kubera ibyo babwirwa, ibyo batekereza cyangwa se kubera ubwoba icyo tubasaba kandi tubababwira buri munsi ni uko urukingo ari umuti, urukingo ni ukurinda, urukingo ni ubuzima, urukingo rurakurinda kurembya na Covid-19.”

“Turabasaba rwose ngo baboneke kuko kubyanga cyangwa kubyangira ntaho bazabihungira […] ntabwo tuzadohoka mu kubafasha no kubereka yuko kwikingiza ari ku neza yabo ndetse no ku buzima bwa benshi.”

Ingabire yavuze ko kugeza ubu mu Rwanda hari inkingo zihagije igisigaye ari uko abantu bitabira kwikingiza kugira ngo iki cyorezo gicike burundu.

Mu mujyi wa Kigali habarwa abagera kuri 91,7% bahawe inkingo zombi aho ubu hari gutangwa urukingo ku bana bari hagati y’imyaka 12 na 17 ndetse n’urukingo rwa gatatu rushimangira ku bamaze amezi atandatu bahawe urwa kabiri.

Mu Rwanda hose hafi miliyoni eshanu nibo bamaze guhabwa doze ebyiri z’inkingo mu gihe abarenga miliyoni 7 bahawe doze imwe n’abandi 55.161 bahawe urukingo rushimangira.