MINUSCA yatangaje ko umuhango wo kunamira abo bantu wabaye kuri uyu wa 8 Nyakanga 2020 mu buryo bw’ikoranabuhanga, bitewe n’amabwiriza yo kwirinda icyorezo cya COVID-19.

Mu basiririkare bunamiwe harimo u w’u Rwanda, Innocent Nkurunziza, waguye muri Centrafrique.

MINUSCA yatangaje ko yahaye icyubahiro abantu icyenda barimo abakozi b’abasivili n’abasirikare baguye mu bikorwa byo kubungabunga amahoro muri Centrafrique ndetse itangaza ko Loni yanyuzwe n’uko bubahirije inshingano zabo.

Ubutumwa bugira buti “Ishami ry’Umuryango w’Abibumbye ritewe ishema n’ubwitange bwabo.”

Intumwa yihariye y’Umunyamabanga Mukuru w’Umuryango w’Abibumbye muri Minusca, Mankeur Ndiaye, yagize ati “Ni ku nshuro ya mbere twunamiye bagenzi bacu benshi mu birori, uyu ni umwanya w’akababaro kuri twese. Umuto muri bo yari afite imyaka 21 gusa.’’

Mu bahawe icyubahiro harimo umusirikare w’u Burundi wishwe muri Werurwe 2020 n’abarwanyi b’Umutwe wa Anti-Balaka, mu gitero zagabye mu Mujyi wa Grimari, aho yari aherereye.

Intambara muri Centrafrique yatangiye mu 2012, nyuma yuko Perezida François Bozizé yari yananiwe kubahiriza amasezerano y’amahoro yari yarasinyanye n’inyeshyamba mu 2007 ahosha imiryano hagati ya Guverinoma ye n’inyeshyamba.

Inyeshyamba z’Abayisilamu zitwa Séléka zamurwanyije inkundura ndetse zifata imijyi myinshi mu mpera za 2012 naho muri Werurwe zifata umurwa mukuru bituma Bozizé ahunga.

Icyo gihe Michel Djotodia, wari uyoboye izo nyeshyamba yahise atangaza ko abaye Perezida hahita havuka undi mutwe w’Abakirisitu uhanganye na Séléka witwa Anti-Balaka, intambara ivuka ubwo.

Kugeza n’uyu munsi nubwo abayisilamu n’abakirisitu batabura ibyo bapfa bitandukanye, ibyo muri 2012/13 bifatwa nk’intandaro y’intambara zidashira muri Centrafrique. Izi ntambara zatumye abantu miliyoni 1.1 bava mu byabo.

Ingabo ziri mu butumwa bw’Amahoro bw’Umuryango w’Abibumbye muri Repubulika ya Centrafrique (MINUSCA) zunamiye abasirikare baherutse kugwa mu butumwa bw'amahoro barimo n'Umunyarwanda