Abategetsi ba Misiri bafunze televiziyo banata muri yombi umwe mu bayobora ibiganiro byayo bamurega guhamagarira abantu kutubaha amategeko.

Inkuru dukesha BBC ivuga ko Umunyamakuru Tawfik Okasha, yarangije ikiganiro yayoboraga ejo mu ijoro vuba na bwangu, amaze kumenya ko agiye gutabwa muri yombi.

Undi munyamakuru na we yasezeye arimo kuyobora ikiganiro kuri televiziyo y’igihugu, yamagana ibyo yise ukwivanga kwa Leta mu biganiro bakora.

Mu ijambo Perezida Mohammad Morsi yavuze ejobundi ku wa gatatu, yiyamye abanyamakuru ko batagomba gukoresha nabi uburenganzira bwo kuvuga ibyo bashatse.

Hagati aho abantu babarirwa mu bihumbi bashyigikiye n’abadashyigikiye Perezida Mohamed Morsi bakoze imyigaragambyo ihanganye hirya no hino mu gihugu, mu gihe hasigaye iminsi ibiri ngo habe indi myigaragambyo y’abantu benshi yateguwe n’abatavuga rumwe na Leta izaba igamije gusaba ko Perezida Morsi ko yegura ku butegetsi.

Mu mijyi imwe n’imwe biravugwa ko polisi yakozanyijeho n’abigaragambya, muri iyi myigaragambyo nibura abantu bagera kuri 20 bakomeretse.

Ubuyobozi bukuru bw’idini ya Islam, Al Azhar, bwaburiye abanyamisiri ko hashobora kubaho intambara hagati y’abaturage nyuma yaho abantu bane bishwe na ho abandi babarirwa mu magana bagakomereka, mu bikorwa byo gukozanyaho hagati y’igipolisi bisa nk’iby’uyu munsi byabaye mu minsi ibiri ishize.