Ikigo cy’Igihugu cy’Imiyoborere (RGB), abanyeshuri, abayobozi nabandi bantu baturuka mu nzego z’uburezi zitandukanye kuri uyu wa Gatandatu tariki 01 Kamena 2013 bakoze urugendo mu rwego rwo kwibuka abakunzi ba siporo bazize Jenoside yakorewe Abatutsi mu w’1994.

Mu mpanuro zatanzwe n’abayobozi bafashe ijambo, basabye uru rubyiruko kudapfusha ubusa amahirwe ba bonye yo kwiga, babasaba kwiga neza kugirango bazabashe kwigirira akamaro ubwabo bataretse n’igihugu cyababyaye, aho bibukijwe kandi ko bagomba kwiga mateka y’igihugu yaba amabi ndetse n’ameza.

Dr. Usengumukiza Félicien Umuyobozi Wungirije w’Ikigo cy’Igihugu cy’Imiyoborere yasabye urubyiruko kwimakaza umuco wo kwibuka, abasaba kandi kubishishikariza bagenzi babo haba mu mashuri ndetse naho batuye.

Dr Usengumukiza yavuze ko siporo ari imwe mu ntwaro izabafasha gukumira ingengabitekerezo ya jenoside, avuga kandi ko imiyoborere myiza ari yo izifashishwa mu kubaka igihugu, akaba ashingira ku kizere cy’uko urubyiruko rubyiyumvamo kandi ari rwo Rwanda rw’ejo hazaza.

Aho yagize ati “Imiyoborere mibi niyo yashenye iki gihugu ikigeza kuri Jenoside yakorewe Abatutsi, ubu turikwifashisha imiyoborere myiza mu kubaka igihugu, kuko iyo nta vangura rikorewe umuturage ahobwo akagira uruhare mu bimukorerwa nta kuntu tutagera ku nshingano, ndetse n’iterambere rirambye, bikaba rero bihuye n’iyi gahunda yo kwibuka ndetse no guhangana n’ingengabitekerezo ya jenoside kenshi tubicishije muri siporo.”