00:00:00 IGIHE NETWORK KN KINYARWANDA EN ENGLISH FR FRANCAIS

Inyungu u Rwanda ruzakura ku bimukira bavuye mu Bwongereza

Yanditswe na Ndahayo Emmanuel
Kuya 26 May 2022 saa 11:22
Yasuwe :

Ubwo Mahmoud (amazina yarahinduwe) yafataga inzira akerekeza mu Burayi, yari yizeye kuzagira ubuzima bwiza buruta ubwo yari abayemo iwabo muri Afghanistan. Kuva i Kabul kugera mu Bugereki, urugendo rw’uyu musore w’imyaka 23 (ubwo yarukoraga) rwari inzitane, ariko kimwe n’ibindi bihumbi by’abimukira, yari afite inzozi zo kuzagira igihugu kimwe aturamo iyo mu Burayi kikamuhindurira ubuzima, amahitamo ye akaba u Bwongereza.

Icyakora ibintu ntibyagenze uko yabitekerezaga, kuko ageze mu Bugereki amafaranga yamushiranye, agasiragana amahitamo make yo kuba umujura, gucuruza ibiyobyabwenge cyangwa se kwishyurwa kugira ngo aryamane n’abandi bagabo, ari nawo mwanzuro yaje guhitamo.

Mu kiganiro yagiranye na Al Jazeera, uyu musore yaragize ati “Ntewe isoni n’ibyo nkora kugira ngo mbone amafaranga […] ubu nibwo buryo nsigaranye bwonyine bwo kubona amafaranga […] nakoze amakosa [yo kuva mu gihugu cyanjye nta byangombwa] none ndi muri ibi bibazo.”

Ubuzima nk’ubu nibwo butunze ibihumbi by’impunzi n’abimukira bava mu bihugu byabo nta byangombwa bafite, bakerekeza mu bihugu by’u Burayi n’ibindi biteye imbere, bafite inzozi zo kuzahindura imibereho yabo n’imiryango yabo.

Icyakora kuri aba batagira ibyangombwa, kenshi usanga ibibazo bahura nabyo bitandukanye cyane n’ibyo bari biteze kubona, kuko benshi bisanga mu myuga nk’uburaya, abandi bagacuruzwa, bamwe bagakoreshwa imirimo y’agahato bahembwa intica ntikize mu gihe abandi bagirwa abacakara, ndetse bamwe bakagwa muri ibyo bikorwa.

Ushobora gukeka ko mu bihugu byateye imbere ikiremwamuntu kidashobora gukorerwa ibisa bityo, gusa iyi si inkuru mbarirano kuko nko mu Murwa Mukuru w’u Bwongereza, Londres, habarurwa ko nibura 50% by’indaya zaho ari abimukira, 5% byabo bakaba barinjijwe muri aka kazi batabishaka.

Benshi usanga baba barinjiye muri icyo gihugu mu buryo butemewe n’amategeko, bakabura ibyangombwa bishobora gutuma babona imirimo bikarangira ari ba Mbarubukeye, kandi wenda barahoze ari abantu bihagazeho mu bihugu byabo, na cyane ko kuva mu bihugu byabo biba atari ibintu bihendutse.

Ubuzima nk’ubu budakwiriye ikiremwamuntu nibwo Leta y’u Rwanda iri kugerageza gushyiraho iherezo, binyuze mu masezerano iherutse kugirana na Leta y’u Bwongereza agamije kwakira abimukira binjira muri icyo gihugu badafite ibyangombwa.

Si ubwa mbere u Rwanda rugerageza igikorwa nk’iki kuko no mu 2018, rwagiranye amasezerano n’Ishami ry’Umuryango w’Abibumbye rishinzwe kwita ku Mpunzi (UNHCR) ndetse n’Umuryango w’Ubumwe bwa Afurika (AU), agamije kwakira impunzi zari muri Libya, ziri guhura n’ihohoterwa ry’ubwoko bwose kugeza ku bucakara no gucuruzwa.

Kugeza ubu abarenga 900 bamaze kuzanwa mu Rwanda muri ubu buryo, aho bahabwa ahantu ho gutura mu gihe bategereje ibihugu byo mu Burayi bibakira, hagati aho bagashyirirwaho uburyo bwo kwigishwa no guhabwa ubufasha bwose bukenewe kugira ngo bagire ubuzima bwiza.

Umusaruro watanzwe n’aya masezerano niwo watumye u Bwongereza bwigira inama yo kwegera u Rwanda mu gushaka igisubizo w’ikibazo cy’abimukira, bigaragara ko ari ikibazo gikomeje gufata indi ntera kuko habarurwa abimukira barenga miliyoni 80 ku Isi, ari nayo mpamvu ibisubizo bishya bigomba gushakwa mu rwego rwo kurinda abo bantu.

Muri aya masezerano yaganiriweho mu gihe cy’amezi icyenda, u Rwanda ruzajya rwakira abimukira bagerageje kwinjira mu Bwongereza nta byangombwa, kuva ku itariki ya 1 Mutarama 2022 gukomeza mu bihe biri imbere. Mu mwaka ushize, abimukira 28.526 binjiye mu Bwongereza nta byangombwa bafite, bikaba byari byitezwe ko uyu mwaka ushobora kurangira bageze ku bihumbi 65.

Minisitiri w'Umutekano w'u Bwongereza, Priti Patel na Minisitiri w'Ububanyi n'Amahanga w'u Rwanda, Dr. Vincent Biruta, bashyize umukono ku musezerano yemerera abimukira baturutse mu Bwongereza kuza mu Rwanda

Aya masezerano azasubiza agaciro ku kiremwamuntu

Ubuhunzi ni kimwe mu bintu bibi bishobora kuba ku kiremwamuntu. Uretse guhangana n’agahinda ko gusiga imitungo n’imiryango, impunzi n’abimukira bagira izindi mbogamizi zirimo kwakirwa no kwisanga mu bihugu bagiyemo, kenshi ugasanga uburenganzira bwabo bwirengagizwa kandi uburyo bwo kwirwanaho no kurenganurwa bukaba ari buke.

Ibi byose bivamo ko impunzi n’abimukira bari mu cyiciro cy’abantu bafite ubukene bukabije kurusha ibindi byiciro by’abantu. Nk’ubu muri Syria, igihugu cya mbere gifite impunzi nyinshi ku Isi, zigera kuri miliyoni 5.6 zahungiye mu bihugu birenga 100 hirya no hino ku Isi, hejuru ya 70% by’izo mpunzi zibayeho mu bukene mu bihugu zahungiyemo. Mu gihugu cyabo, byari bigoye kubona umukene mbere y’uko intambara itangira.

Kimwe mu bitiza umurindi ikibazo cy’abimukira ni amatsinda yishyurwa kugira ngo abafashe mu ngendo. Bitewe n’uko izi ngendo zihenda, aho nk’uruva mu Burasirazuba bwo Hagati rugera mu Bwongereza rushobora gutwara ibihumbi 4$, bituma aya matsinda ashyira imbaraga mu gushishikariza abantu kurwitabira, binyuze mu kubizeza ibitangaza n’ibindi bitandukanye.

Ibihugu nka Turukiya n’u Bugereki ni byo aba bimukira baruhukiramo mbere yo gukomeza mu nzira z’inzitane bagana mu Budage n’u Bufaransa, ubundi bakabona kuboneza iyo mu Bwongereza. Muri izi ngendo, ibikorwa by’ihohoterwa ry’uburyo bwose biba bishobora gukorwa, ari nayo mpamvu kimwe mu byo amasezerano y’u Bwongereza n’u Rwanda azamara, ari uguca intege aya matsinda atwara abimukira.

Amateka y’u Rwanda yatumye Abanyarwanda baba impunzi igihe kinini, ari nabyo byavuyemo amasomo akomeye kuri Leta mu kwita kuri iki cyiciro cy’abantu. U Rwanda rusanganywe impunzi zirenga ibihumbi 130, aho zifite uburenganzira bwo gushaka imirimo mu gihugu, zikagira ibyangombwa, zigashobora kwivuza, kwiga no kubona ubundi burenganzira ubundi buhabwa abenegihugu gusa mu bindi bihugu.

Uyu murage wo kwita ku mpunzi n’abimukira uzakomereza no ku bavuye mu Bwongereza, aho bazahabwa ubufasha mu by’amategeko, batuzwe ahantu heza, bigishwe ndetse bakahabwe amahirwe yo kwiteza imbere mu Muryango Nyarwanda.

Abimukira baturutse muri Libya nabo bazanwa mu Rwanda mbere yo koherezwa mu bindi bice by'Isi

Ubukungu bw’u Rwanda buzabyungukiramo

Amasezerano y’u Rwanda n’u Bwongereza azamara imyaka itanu ifatwa nk’igerageza. Ku ikubitiro, u Bwongereza bwahaye u Rwanda miliyoni 120£ yo gukora ibikorwa by’iterambere abo bimukira bazungukiramo cyo kimwe n’abanyarwanda muri rusange.

Bikozwe gutyo buri mwaka, byumvikane neza ko mu myaka itanu u Rwanda ruzahabwa miliyoni 600£. Ni amafaranga yagirira akamaro umuturage wese w’u Rwanda kuko hakubakwa amashuri, hakavugururwa ibitaro mu nyungu z’abo bimukira n’abaturarwanda muri rusange.

Ayo mafaranga kandi ntituvuze andi azajya akoreshwa n’abo bimukira mu buzima bwa buri munsi, bivuze ko nabo bazateza imbere ubukungu bw’igihugu.

Reka tuvuge ko u Rwanda ruzajya rwakira miliyoni 120£ gusa ku mwaka, uretse ko ashobora kurenga. Aya mafaranga yaba akubye hafi gatanu ateganyijwe kwinjira mu bukungu bw’u Rwanda binyuze mu bukerarugendo bushingiye ku nama, byitezwe ko azagera kuri miliyoni 27$ muri uyu mwaka, avuye hafi kuri miliyoni 60$ yari agezweho mbere ya Covid-19. Izi miliyoni 120£ zizarushaho gutuma ubushobozi bw’abaguzi bwiyongera, bityo n’ubushobozi bw’abagurisha bwiyongere, ubukungu bwose bubyungukiremo muri rusange.

Hejuru y’ibyo kandi, ni ingenzi cyane kwibuka ko mu bimukira haba harimo abantu bafite impano n’ubumenyi runaka, nabyo bikaba bishobora kwifashishwa mu guteza imbere ubukungu bw’igihugu. Hari inzego nyinshi bashobora kugiramo uruhare, zirimo iz’ubuzima, uburezi n’izindi, bikaba amahire ko benshi mu ‘bihumbi’ by’abazaza mu Rwanda bazaba bakiri bato, bafite igihe kinini cyo gukora imbere yabo.

Ubumenyi n’ubundi bufasha bazahabwa kandi bashobora kubukoresha mu kwihangira imirimo ikemura ibibazo bisanzwe mu Rwanda, nk’uko byagenze ku mwimukira washinze ‘Simba Supermarket’ iri mu zikomeye mu gihugu.

Ubukungu bw'u Rwanda buzungukira muri iki gikorwa

Amahirwe yo kumurika isura y’u Rwanda mu buryo bwiza

Ntabwo bisanzwe kubona inkuru ivuga neza u Rwanda mu binyamakuru mpuzamahanga, gusa imwe mu ziherutse ni iyanditswe n’umwimukira, Umunya-Afghanistan Shabana Basij-Rasikh. Uyu yanditse muri Washington Post avuga ku buryo we n’Ikigo cya Sola yashinze bakiriwe neza mu Rwanda, kuva bahagera muri Kanama umwaka ushize.

Kuva amasezerano hagati y’u Rwanda n’u Bwongereza yatangazwa, ibinyamakuru bikomeye ku Isi byayagarutseho, byinshi bigaragaza ko adakwiriye ndetse bimwe binaboneraho kugaruka ku murongo byihaye wo kugaragaza ko mu Rwanda nta kigenda, kuva kuri politiki kugera ku bukungu n’uburenganzira bwa muntu.

Abimukira bazaza mu Rwanda bazaba abahamya wo kunyomoza ibi binyamakuru, kuko umunsi batangiye gusoroma ku mbuto z’aya masezerano, bazakoresha iturufu yo kumvwa ku rwego mpuzamahanga maze basobanure neza ibibera mu Rwanda, nk’uko Shabana yabigenje.

Ibi bizarushaho gutuma isura y’igihugu igaragara neza ku rwego mpuzamahanga, abafata u Rwanda nabi kubera kutagira amakuru y’impamo batangire guhindura uko babona ibintu mu Rwanda. Inyungu ziri mu kugira igihugu gifite isura nziza ku rwego mpuzamahanga ni nyinshi, kuko bishobora kongera ishoramari riturutse hanze kimwe n’abakerarugendo, ibintu u Rwanda rukeneye cyane mu rugendo rwo kwiyubaka no gutsinda ingaruka za Covid-19.

U Rwanda rufite byinshi rwateyemo imbere birimo uburezi, ubuzima n'ibindi, ariko usanga bidakunze kugarukwaho ku ruhando mpuzamahanga, abimukira bashobora kugira uruhare mu kubigaragaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .