00:00:00 IGIHE NETWORK KN KINYARWANDA EN ENGLISH FR FRANCAIS

Niger yasabwe gusubiza ibyangombwa yambuye Abanyarwanda umunani yakiriye

Yanditswe na Kanamugire Emmanuel
Kuya 17 January 2022 saa 12:21
Yasuwe :

Umucamanza w’Urwego rwasigaranye imirimo y’Inkiko Mpuzamahanga (International Residual Mechanism for Criminal Tribunals: IRMCT), Joseph E. Chiondo Masanche, yasabye Niger gusubiza Abanyarwanda ibyangombwa yari yabahaye bakigera ku butaka bwayo ariko ikaza kubibambura no kubafungira aho bacumbikiwe.

Uyu mucamanza ni we ukurikirana dosiye y’aba Banyarwanda umunani barimo abahoze ari abanyepolitiki n’abasirikare bakuru mu Rwanda mbere ya Jenoside yakorewe Abatutsi mu 1994. Bamwe bagizwe abere, abandi barangije ibihano bakatiwe n’urwahoze ari Urukiko Mpuzamahanga Mpanabyaha Rwashyiriweho u Rwanda i Arusha muri Tanzania (TPIR).

Aba ni Protais Zigiranyirazo, Mugiraneza Prosper, Lt. Col Muvunyi Tharcisse, Maj. Nzuwonemeye François Xavier, Col. Alphonse Nteziryayo, Col. Nsengiyumva Anatole, Cap. Sagahutu Innocent na Ntagerura André.

Amasezerano yo koherezwa muri Niger yashyizweho umukono hagati y’ubuyobozi bw’iki gihugu na IRMCT, atangira gushyirwa mu bikorwa ku wa 15 Ugushyingo 2021 ariko Niger iza kwisubiraho nyuma y’igihe gito imaze kubakira.

Ku ikubitiro yabahaye iminsi irindwi yo kuba bavuye ku butaka bwayo, icyemezo cyagombaga gushyirwa mu bikorwa uhereye ku wa 27 Ukuboza 2021.

Nta bisobanuro Niger yatanze uretse kuvuga ko icyo cyemezo cyafashwe hashingiwe ku mpamvu za dipolomasi biza kurangira IRMCT isohoye umwanzuro usaba Niger kureka kubirukana.

Mu mwanzuro w’Umucamanza Joseph E. Chiondo Masanche wo ku wa 14 Muatarama 2022, yasabye Niger gusubiza ibyangombwa abo Banyarwanda kandi ikaba uburenganzira bwo kwisanzura mu gihugu bakiriwemo nk’uko babimugejejeho, abandi bakaba barasabaga gushakirwa ibindi bihugu byabakira.

Nka Protais Zigiranyirazo yavuze ko uburenganzira bwe bw’ibanze butubahirizwa asaba ko ibikubiye mu masezerano yo kubohereza muri Niger byashyirwa mu bikorwa uko byakabaye kugeza igihe hazafatirwa umwanzuro ku kibazo cyabo.

Yasabaga ko kandi Leta ya Niger yahagarika kumufunga ahubwo agasubizwa ibyangombwa, akabona uko yisanzura nta nkomyi.

Uretse Zigiranyirazo, Alphonse Nteziryayo na we yandikiye umucamanza ku wa 10 Mutarama 2022 agaragaza ko umwanzuro wo kwirukanwa muri Niger mu minsi 30 unyuranye n’uw’umucamanza wo ku wa 31 Ukuboza 2021 wategekaga ko bagomba kuba bahagumye kugeza hafashwe icyemezo cya nyuma.

Ni mu gihe Innocent Sagahutu na Tharcisse Muvunyi basabaga kuvanwa muri Niger bakajyanwa mu kindi gihugu gitekanye naho Anathole Nsengiyumva ku wa 4 Mutarama 2022 akaba yarasabaga ko ibihugu biri mu kanama k’umutekano ka Loni byafata umwanzuro ku gihugu cyamwakira.

Chiondo yavuze ko ingingo ya 28 ishyiraho urwego rwa IRMCT iteganya ko ibihugu byose bigomba gukorana na rwo kandi bigashyira mu bikorwa imyanzuro rwafashe ikindi bikaba biri mu nshingano zarwo gukurikirana ko abarekuwe babayeho neza aho bimuriwe.

Yavuze ko kuba aba Banyarwanda bakiriwe na Niger bari barahawe ibyangombwa bakimara kuhagera ariko bakaza kubyamburwa, bagafungirwa mu nzu bacumbikiwemo ndetse bashyirirwaho abarinzi bitwaje intwaro kuva ku wa 27 Ukuboza 2021, binyuranyije n’ibikubiye mu masezerano abimura.

Yasabye ko ibyo byangombwa babisubizwa kandi bagahabwa ubwisanzure nk’uko bikubiye mu ngingo ya 5 y’amasezerano Niger yari yagiranye na IRMCT.

Ku basabaga ko bashakirwa ibindi bihugu bibakira, umucamanza yavuze ko bagomba kuguma muri Niger kugeza ku ifirimbi ya nyuma y’iki kibazo.

Yijeje ko umwanditsi w’uru rwego azakomeza gukorana n’abategetsi ba Niger, hagenzurwa ko uburenganzira bw’ibanze bw’abahimuriwe bwubahirizwa burimo ubwo gutembera nta nkomyi no gusubizwa ibyangombwa bambuwe.

Hagati aho ngo IRMCT itegereje ibisobanuro bya Niger ku mpamvu yisubiyeho ku masezerano byari byagiranye.

U Rwanda rwo rwavuze ko rwatunguwe n’iyoherezwa ry’abenegihugu barwo muri Niger ari na cyo cyatumye rubaza iki gihugu impamvu hafashwe umwanzuro nk’uwo rutamenyeshejwe.

Mu kiganiro Umuvugizi wungirije wa Guverinoma y’u Rwanda, Mukuralinda Alain aherutse kugirana na IGIHE, yavuze ko bitigeze bibaho ko u Rwanda rusaba Niger kutakira aba Banyarwanda.

Protais Zigiranyirazo (Ibumoso hejuru), Mugiraneza Prosper, Lt. Col Muvunyi Tharcisse na Maj. Nzuwonemeye François Xavier. Ku murongo wo hasi ibumoso hari Col. Alphonse Nteziryayo, Col. Nsengiyumva Anatole, Cap. Sagahutu Innocent na Ntagerura André

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .