Ibirori byo kwizihiza uyu munsi byabereye mu murwa mukuru, Abuja, ku nsanganyamatsiko y’uyu mwaka igira iti “Ubutwari mu Banyarwanda, Agaciro Kacu”.

Ambasaderi w’u Rwanda muri Nigeria, Bazivamo Christophe, yibukije abahuriye muri uyu munsi impamvu nyamukuru yo kwizihiza uyu munsi.

Ati "Tariki ya 1 Gashyantare ni umunsi udasanzwe ku Banyarwanda. Ni umunsi wo kuzirikana no gushima Intwari zaharaniye ubwema bw’u Rwanda, ubumwe bw’Abanyarwanda n’iterambere. Muri make, Intwari z’Igihugu zose zaranzwe n’indagagaciro zihanitse zo gukunda igihugu. Turabashimira byimazeyo ko mwigomwe imirimo yanyu, mukaza kwifatanya natwe mu kwizihiza uyu munsi. Ni icyubahiro n’agaciro mwahaye Intwari zacu ndetse n’Igihugu.’

Yakomeje agira ati "Ubutwari bw’Abanyarwanda si ubwa none, bwaremanwe n’u Rwanda. Amateka y’u Rwanda yubakiye ku ndangagaciro z’ubutwari. Ni nawo murongo Abanyarwanda twihaye: kwiha agaciro, gushimangira Ubumwe bwacu, ubudaheranwa no kwigira. Izi ndangagaciro nizo zatumye u Rwanda rwiyubaka ruvuye hasi kure aho rwari rwagejejwe ku muyonga, aho rwasizwe n’abategeguye bakanakora genocide yakorewe Abatutsi mu 1994."

Ambasaderi Bazivamo yaboneyeho umwanya wo gusaba urubyiruko kugera ikirenge mu cy’Intwari zarubanjirije, rugira uruhare mu kubaka u Rwanda rubereye Abanyarwanda.

Uhagarariye Abanyarwanda baba muri Nigeria, David Gatare, yagarutse ku butwari bwaranze amateka y’u Rwanda mu bihe binyuranye: mbere y’ubukoloni, mu gihe cy’ubukoloni, kuri Repubulika ya mbere n’iya kabiri, na nyuma ya genoside yakorewe Abatutsi mu 1994.

Gatare yibukije Abanyarwanda n’inshuti zabo, inzego z’Intwari z’Igihugu; Imanzi, Imena n’Ingenzi, hamwe n’ibiziranga, ari byo: kugira umutima ukomeye kandi ukeye, gukunda igihugu, kwitanga, kugira ubushishozi, kugira ubwamamare mu butwari, kuba intangarugero, kuba umunyakuri, kugira ubupfura, kugira ubumuntu.

Umunsi wasojwe n’ubusabane bw’Abanyarwanda n’inshuti zabo, bishimira aho u Rwanda rugeze rwiyubaka, rubikesheje ubutwari bw’abo rwibarutse.

Urugwiro n'akanyamuneza ni byo byaranze Umunsi w'Intwari muri Nigeria

Uhagarariye Abanyarwanda baba muri Nigeria atanga ikiganiro ku butwari bw'Abanyarwanda

Chargé d'Affaires wa Niger akurikiye ikiganiro

Ambasaderi wa Sudani y'Epfo aganira na mugenzi we w'u Rwanda ku mateka y'Intwari z'igihugu

Amb. Bazivamo na Dr Jerry Uchenna Nwohu

Amb. Bazivamo asuhuza abitabiriye ikiganiro

Amb. Bazivamo aha ikaze inshuti y'u Rwanda Rear Admiral (Rtd) Sanmi Alade

Ambasaderi Bazivamo ageza ijambo ku bitabiriye Umunsi w'Intwari z'Igihugu

Abanyarwanda n'inshuti zabo mu kiganiro

Abanyarwanda n'inshuti zabo mu ifoto y'Umunsi w'Intwari