Mu nama nyunguranabitekerezo yabaye kuwa Kane tariki 23 Kanama 2018, abatuye i Rubavu bagaragarijwe ko EBOLA ikomeje gusatira uduce twegereye u Rwanda, bityo bakwiye gukaza ingamba zo kwirinda no kwitwararika.

Ni ku nshuro ya 10 Ebola igaragaye muri RDC mu myaka ishize, aho yahereye mu Ntara ya Equateur ubu ikaba igeze mu ya Kivu y’Amajyaruguru, ndetse mu bantu 96 bayanduye, abarenga 50 bamaze gupfa barimo n’abaganga.

Dr Kanyankole yagize ati “Uyu munsi hari abantu bamaze gutoroka bagana Beni n’ahandi kandi ni ubwa mbere icyorezo cya Ebola cyegereye u Rwanda ku nshuro zose cyagiye kigaragara muri Congo, kuko kiri mu birometero 370 uvuye i Gisenyi ukagera aho cyatangiriye i Mangina hafi ya Beni.”

“Kukirwanya birakomeye kurusha izindi nshuro zabaye kubera imitwe y’inyeshyamba zikorera muri Kivu y’Amajyaruguru, ubu umuganga kujya gufata umurwayi bisaba kwitwaza abasirikare. Ikibazo gihari ni uko abaganga badashoboye kugikumira cyagera Butembo, kikagera i Goma.”

Gusa Dr Kanyankole yahamije ko ingamba zafashwe mu gupima abinjira mu Rwanda kugira ngo hatagira ucyinjiza mu gihugu.

Yakomeje agira ati “Ubu twatangiye gupima abantu bafite imiriro, iyo umunye-Congo aje tumusubizayo naho iyo umunyarwanda aje turamwakira kandi twashyize ibikoresho bikomeye ku mupaka n’ahandi hose, kuko uretse n’inzira ya hano ku mupaka hari indi nzira y’abantu bava Beni bakajya Uganda bakinjirira Cyanika, bakaza kurara hano i Rubavu baje mu bucuruzi.”

Umuyobozi w’Akarere ka Rubavu, Habyarimana Gilbert yavuze ko inzego zose zirimo gukorera hamwe mu rwego rwo gukumira icyi cyorezo.

Yakomeje agira ati “Abaturage bakanguriwe kugira isuku no kwirinda, ikindi ibigo nderabuzima hari uburyo byahuguwemo ariko by’umwihariko ku mipaka yacu na Congo hashyizweho abaganga bapima uwinjira n’usohoka, ku buryo ugaragayeho ikimenyetso gito ntibatuma yinjira mu gihugu cyacu.”

“Nabwira abaturage ko ari ngombwa ko bagira amakenga bagatanga n’amakuru igihe habonetse umuntu ufite umuriro udasanzwe, ikindi hari ikipe ihuriweho n’inzego zose kugirango hatazagira umurwayi ugaragara mu Rwanda’’

Ebola yandurira mu matembabuzi cyangwa mu gukoranaho k’umuntu uyirwaye n’utayirwaye.

Kuva virusi yayo yavumburwa mu 1976, iyi ndwara yagaritse ingogo muri Afurika y’Iburengerazuba hagati ya 2014–2016 kuko yahitanye abantu basaga ibihumbi 11 muri Liberia, Guinea na Sierra Leone abandi ibihumbi barayivurwa.

Inkuru wasoma: Abinjira mu Rwanda batangiye gupimwa Ebola

Umuyobozi w’Ibitaro bya Gisenyi, Lt Col Dr Kanyankole William, yaburiye abaturage bo mu Karere ka Rubavu ko bakwiye kurushaho kwitwararika kubera icyorezo cya Ebola

Abaturage bo mu Karere ka Rubavu basabwe kwitwararika

Uyu muganga yapimaga umuturage uvuye i Goma

Abaturage binjira mu Rwanda bavuye muri RDC barapimwa ngo harebwe ko nta muriro udasanzwe bafite