Lusaka aherekejwe na mugenzi we w’u Rwanda, Bernard Makuza, kuri iki Cyumweru basuye ibikorwa bitandukanye i Rubavu birimo umupaka munini uhuza u Rwanda na RDC na gasutamo, bareba na serivisi zihatangirwa.

Ni ibintu bemeje ko nibigerwaho n’ibihugu byo mu karere ka Afurika y’Iburasirazuba bizazamura ubukungu mu buryo bukomeye.

Lusaka yagize ati "Turi kwigiranaho kuko dushaka uko kwambukiranya imipaka byakorwa neza nk’uko bikorwa hagati ya Congo n’u Rwanda, dufatanyije tuzashishikariza buri gihugu mu bigize Umuryango wa Afurika y’Iburasirazuba koroshya ubucuruzi kuko bituma akarere gatera imbere. Nka Kenya dushaka gukomeza gushyira imbaraga mu byo twabonye ku Rwanda twashimye."

Perezida wa Sena y’ u Rwanda, Makuza Bernard, yashimye mugenzi we n’itsinda ryamuherekeje ndetse ashimangira ko bigiye kugira icyo byungura ibihugu byombi ndetse n’urwego rwa Sena muri ibyo bihugu.

Ati “Baje mu rwego rwo gusinya amaseserano ku butwererane no kureba uko hanze ya Kigali ubuzima bumeze kugirango barebe uko ibintu bikorwa mu Rwanda by’umwihariko ku mupaka uhuza u Rwanda na Congo. Nubwo Congo itaba mu Muryango w’ibihugu bya Afurika y’Iburasirazuba, imipaka yacu ni urugero rwiza rwo kwigirwaho mu bucuruzi."

Akomeza avuga ko umubano hagati ya Sena ku mpande zombi wabayeho kubera uw’abakuru b’ibihugu byombi bubatse imikoranire mu nzego zitandukanye.

Hanasuwe isoko mpuzamahanga ku mupaka ryubatswe kuri miliyoni 3 z’amadolari, rizafasha abaturage bakoresha umupaka muto unyuraho abasaga ibihumbi 55 ku munsi naho umupaka munini wa La Corniche unyuraho abasaga ibihumbi umunani ku munsi.

Kuri uyu wa Mbere nibwo Kenneth Lusaka yasoje uruzinduko rwe rw’iminsi itanu mu Rwanda, aho mu gitondo yaherekejwe na mugenzi we Bernard Makuza.

Perezida wa Sena ya Kenya,Ken Lusaka na mugenzi we w'u Rwanda, Bernard Makuza bagera ku isoko bari bagiye gusura

Aba bayobozi basuhuza abandi basanze ku isoko rihuza u Rwanda na RDC

Bapimwe na Ebola, bashima ingamba zafashwe mu gukumira icyo cyorezo

Bernard Makuza bamupima Ebola

Batunguwe no kuba bahagaze mu nyubako y'isoko ku mupaka, bakabasha kwitegereza Umujyi wa Goma muri RDC

Basuye umupaka muto uzwi nka Petite Barrière

Batambagijwe isoko ryo ku mupaka ryuzuye ritwaye miliyoni eshatu z'amadolari

Bafatiye ifoto y'urwibutso ku mupaka muto

Iri soko mpuzamipaka ryitezweho umusanzu ukomeye mu bucuruzi

Lusaka yanashimye uburyo bwo kuboneza urubyaro butangirwa ku mupaka

Nyuma y'uru ruzinduko, Kenneth Lusaka yasinye mu gitabo cy'abashyitsi

Bafatiye ifoto ku mupaka munini wa La Corniche