Rwarakabije yavuze uburyo yingingiye Mudacumura na Bazeye bayoboraga FDLR gutaha bakamwiyama

Yanditswe na Twarabanye Venuste
Kuya 13 Ukwakira 2019 saa 09:56
Yasuwe :
0 0

Gen. Maj. Paul Rwarakabije wayoboye umutwe wa FDLR akaza kwitandukanya na wo, agakorera igihugu, ubu kaba ari mu kiruhuko cy’izabukuru, yavuze ko uwo mutwe wacitse intege, ko igisigaye ari ukurinda ko abo bake bakiwurimo bakwirakwiza ingengabitekerezo ibarimo.

Mu kiganiro Imbonankubone cyatambutse kuri TV1 kuri uyu wa Gatandatu, Rwarakabije yasobanuye byinshi byerekeye FDLR n’uburyo itagifite imbaraga zagira icyo ziyigezaho, uko yingingiye abayiyoboraga ngo batahe bakamwima amatwi n’ibindi.

Kubona ibiribwa imiti n’imyambaro

Kugira ngo umutwe w’inyeshyamba ubeho umare igihe, nuko uba ufite uko ubona ibyangombwa nkenerwa nk’ibyo kurya, imiti n’imyambaro.

Gen. Rwarakabije avuga ko igihe bari bakiri mu ishyamba babonaga ibiryo, imiti n’ibikoresho mu buryo butandukanye.

Yavuze ko ibiryo babanje kujya babihabwa n’abaturage ku neza, nyuma haza kubaho ikibazo cyatumye batagemura, ingabo za FDLR zitangira kubisahura aricyo baje gupfa n’abaturage.

Ati “Ibyinshi nk’ibayo byaturukaga mu baturage, hari ikibazo cyabayeho batakigemura habaye kubifata aho biri. Kubifata ku ngufu aho biri ni nacyo cyatumye abaturage batangira kwijundika abantu bavuga bati ‘aba bantu bari kudutwarira imyaka.”

Ibyerekeye imiti ngo habanzaga kubaho kumenya aho icururizwa ubundi bakazahagaba igitero cyo kuyisahura.

Ati “Hanyuma ibyerekeranye n’imiti kwari ukujya kuyishakisha, habaga za operasiyo zo kujya kuyireba, bati ese farumasi ishobora kuba iri hehe, kure kungana iki? Hakabaho operasiyo yo kujya kuyishaka ku ngufu.”

Ibyerekeye ibikoresho bya gisirikare, amasasu imbunda, ngo “habanje kuba ibyo kurwana n’abanye-Congo hari aba mayi mayi badashyigikiye uwo mutwe, hari ingabo z’u Rwanda zari zarinjiye muri Congo, icyo gihe twageragezaga kugira ngo abo turwanye tugire ibyo tubakuraho.”

Uretse izo mbunda bamburaga indi mitwe, hari n’izo bari barasigaranye kuko igihe binjiraga muri Congo nk’impunzi bazibambuye ariko ntibazibamaramo.

Rwarakabije avuga ko nyuma na Perezida Joseph Kabila yatangiye kujya abagezaho intwaro aho bari bakambitse mu mashyamba ya za Walikale

Ati “Byageze aho rero noneho Kabila, uriya uherutse kuva ku butegetsi vuba, yakoze ku buryo afasha FDLR yafataga mu ngabo ze amasasu n’imbunda agakora ku buryo abizana n’indege, icyo gihe nibuka ko babimanuraga mu mitaka, mu ishamba aho twabaga turi, ari i Masisi ari, i Walikale, aho twabaga turi niho babijugunyaga.”

Gusenyuka kwa FDLR

Rwarakabije yabajijwe ku mutwe wa FDLR azi neza n’uburyo wagiye ucika intege, asubiza ko icyo uwo mutwe usigaranye ari ingengabitekerezo ukwirakwiza aho ugeze hose.

Gucikamo ibice, gufatwa kwa bamwe mu bayobozi no gupfa kwa Mudacumura nabyo ngo ni bimwe mu byawushegeshe.

Ati “Umutwe wa FDLR ingabo zawo ziragenda zicika intege kuko zagiye zicikamo kabiri, si kabiri nako ni kenshi. Hari aho havuyemo RUD [Urunana] havamo CNRD, icyo gihe aba ari ugutakaza ingufu.”

Yakomeje agira ati “Burya icyo tugomba kurwanya gikomeye, ni iyo ingengabitekerezo baba bashaka ngo ikwire hose. Kugira ngo urwanye umutwe nk’uwo cyangwa n’indi mitwe, abanyarwanda bagomba kuba umwe. Kurwanya uriya mutwe ni iyo ngengabitekerezo cyane cyane niyo tugomba kwibandaho. Naho ibindi ari abo bavuyeyo bakaza mu gihugu cyacu, noneho n’uriya wapfuye [Mudacumura] biriya byose bigabanya imbaraga z’uwo mutwe.”

Yavuze ko ashingiye ku mibare y’ingabo z’umuryango w’abibumbye hasigaye bakeya ariko badakwiye kwemererwa gukomeza ingengabitekerezo bagenda bigisha.

Ati “Ubundi wacitse intege ntabwo ugomba kugira ngo uratera ubwoba birenze urugero, wacitse umutwe ni uko ubona ibikorwa bimwe baza gukora, kurasagura nk’ahantu, ukabona abantu barapfuye . Uri gucika intege, kugira ngo ugaragaze ko ugihari, ukora ibikorwa bibi nka biriya. Ibyo rero nabyo ni ugukomeza kubirwanya.”

Hari abo yahamagariye gutaha bamwima amatwi

Gen Rwarakabije yakomoje ku buryo bamwe mu bayobozi ba FDLR yabagiriye inama yo gutahuka bakinangira.

Ubwo yageraga mu gihugu akabona nta kibazo gihari, ngo yifuje ko na bagenzi be yari asize mu buyobozi baza mu guhugu cyababyaye ariko banga kumwumva.

Ati “Mpereye kuri uyu La Forge uri hano, akiriyo n’ubundi yari umuvugizi wa FDLR , ni jye wamushyizeho akomeza kuba we kugeza n’ejo bundi. Nkimara kugera ino twavuganaga kuri terefone, muhamagara nkuko navuganaga n’abandi. Muhamagara nti ‘bite? ndi ino mu Rwanda dore uko meze, nawe waza.’ Hashize imyaka nk’ibiri yarambwiye rwose aranyerurira, ati ‘sinzigera nza. Wahisemo nanjye nahisemo nzagwa mu iri shyamba’. Yari yarandahiye aranavuga ati ntuzongere no kumpamagara rwose.”

Bazeye aherutse gufatirwa muri Congo ari kumwe na Lt Col Abega wari ushinzwe ubutasi muri FDLR, bombo boherezwa mu Rwanda ari naho bari kuburanira.

Mudacumura uherutse kwicirwa muri Congo, ngo na we yari yaranze kongera kuvugisha Rwarakabije, iyo yamuhamagaraga yamuhaga umunyamabanga we ngo bavugane.

Ati “Mudacumura ntiyigeza ashaka kunyakira kuri terefone, no kuvuga kuri nimero ye nakirwaga na Gaspard wari umunyamabanga we n’iyo Mudacumura yabaga afite terefone nzi ko uwo babanaga yajyaga ataha nyuma, bambwiye ko yayimuherezaga akaba ari we tuvugana.”

Yahamagariye abagize uwo mutwe kuva mubyo barimo bakaza gufatanya n’abanyarwanda kubaka igihugu kuko ingengabitekerezo bafite itakijyanye n’igihe.

Rwarakabije avuga ko FDLR kuri ubu ikura abarwanyi mu mpunzi nke zisigaye muri Congo, uretse ko nazo biba ari ku ngufu, bitandukanye na mbere aho bajyagamo ku bushake. Ahandi bakura abarwanyi ngo ni mu nshuti zabo z’abanye-Congo.

Gen. Rwarakabije yatahutse mu Rwanda ava muri FDLR muri Nyakanga mu 2004. Yayoboye urwego rw’igihugu rushinzwe imfungwa n’abagororwa, umwanya yavuyeho mu 2016, ubu akaba ari mu kiruhuko cy’izabukuru.

Rwarakabije yavuze uburyo yingingiye Mudacumura na Bazeye bayoboraga FDLR gutaha bakamwiyama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza