Abamaze kwandura ku Isi nabo bakomeje kwiyongera mu buryo budasanzwe kuko mu munsi umwe biyongereyeho ibihumbi bigera kuri 40 bagera kuri 2 482 563, bavuye ku 2 407 600 kuwa Mbere.

Leta Zunze Ubumwe za Amerika zikomeje kugira umubare w’abandura n’abapfa benshi, kuko ubu abamaze kwandura bageze 792 938 mu gihe abitabye Imana bavuye ku 40 565 bariho ku wa Mbere, ubu bakaba bageze ku 42 518, nyuma y’aho mu masaha 24 hapfuye abantu 1939.

Bamwe muri ba guverineri muri za leta zigize iki gihugu, batangiye gusaba Perezida Donald Trump kubwira abaturage bari mu mihanda gusubira mu ngo, kuko ibi bidakozwe icyorezo gishobora kwiyongera mu gihugu.

Muri Sierra Leone ku mugabane wa Afurika, umwe mu barinda Perezida Julius Maada Bio yasanganwe icyorezo cya Coronavirus, biteza impungenge ko uyu mukuru w’igihugu nawe ashobora kuba yaranduye.

Uyu mukuru w’igihugu we yatangaje ko ubuzima bwe bumeze neza, ndetse n’abo mu muryango we nta kibazo bafite, ariko atangaza ko agiye kwishyira mu kato k’iminsi 14. Abamaze kwandura muri iki gihugu ni 43.

Ibihugu bifite abanduye ndetse n’abapfuye benshi, ku mwanya wa mbere haracyari Leta Zunze Ubumwe za Amerika, Espagne iri ku mwanya wa kabiri kuko ifite abantu 200 210 bamaze kwandura naho 20 852 bamaze gupfa, u Butaliyani bufite abanduye 181 228 mu gihe 24 114 bamaze gupfa.

Mu Bufaransa abantu 155 383 bamaze kwandura, abandi 20 265 bamaze gupfa.

U Budage bufite abanduye 147 065 mu gihe 4 862 bapfuye, u Bwongereza bufite abanduye 124 743 ariko abamaze gupfa ni 16 509.

Ku Mugabane wa Afurika, abantu 24 209 ubu bamaze kwandura Coronavirus, abamaze gupfa bageze ku 1 164.

Misiri iri imbere n’abamaze kwandura benshi kuko ari 3 333 mu gihe abamaze gupfa ari 250, ikurikirwa na Afurika y’Epfo ifite abanduye 3 300 abapfuye ho bageze kuri 58.

Algeria niho hamaze gupfa abantu benshi muri Afurika kuko ari 384 mu gihe abamaze kwandura ari 2 718.

Muri Afurika y’Iburasirazuba, Kenya niyo ikomeje kugira abanduye benshi kuko ubu bageze kuri 281 mu gihe abamaze gupfa ari 14 , mu Rwanda hamaze kuboneka abantu banduye 147 ariko abamaze gukira bageze kuri 80, Uganda baracyari 56, muri Tanzania hamaze kuboneka abantu 254 hamaze gupfa 10, mu Burundi habonetse batanu, hamaze gupfa umwe mu gihe muri Sudani y’Epfo ari bane banduye.

Mu masaha 24 ashize, muri Leta Zunze Ubumwe za Amerika hapfuye abantu 1939.