Kuri uyu wa 25 Mata 2021, aherekejwe na Minisitiri ushinzwe Ibikorwa by’Ubutabazi, Kayisire Solange, yasuye inkambi icumbikiwemo impunzi zaturutse muri Libya iherereye mu Karere ka Bugesera izwi nka Gashora ETM Center.

Iyi nkambi icumbikiye abashaka ubuhungiro 261. Aba mbere 66 bageze mu Rwanda muri Nzeri 2019, mu gihe abaheruka bahageze mu Ukuboza 2020.

Yashimye imikorere y’iyi nkambi avuga ko ishimangira ubumwe bwa Afurika kuko ibikorwa nk’ibi byo kwakira impunzi mpuzamahanga bisanzwe bikorwa n’ibihugu byo ku yindi migabane.

Grandi yavuze ko ku Isi hari inkambi ebyiri zakira impunzi zavuye muri Libya.

Abashinzwe inkambi icumbikiwemo impunzi zaturutse muri Libya, babwiye Filippo Grandi ko bimwe mu bibazo by’ubuzima byugarije impunzi birimo nk’uburwayi bw’amenyo, amaso ndetse n’uburwayi bwo mu nda buturuka ku buzima bubi babayeho muri Libya.

Uretse gusura Inkambi ya Gashora, biteganyijwe ko Grandi ari buhe ikaze irindi tsinda ry’impunzi 122 ziturutse muri Libya u Rwanda rwakira ku mugoroba wo kuri iki Cyumweru, tariki 25 Mata 2021.

Mu gusoza urugendo rwe, azakomereza i Burundi aho azajyana n’impunzi z’Abarundi zizaba zitashye.

Filippo Grandi yaherukaga mu Rwanda muri Mata 2018.

Ubwo Grandi yari akigera i Gashora yasobanuriwe imikorere y'icyo kigo

Umuyobozi Mukuru wa HCR yasobanuriwe ibibazo impunzi ziri i Gashora zifite

Grandi yatemberejwe mu bice bitandukanye bigize ikigo cya Gashora ahacumbikiwe impunzi zaturutse muri Libya

Umuyobozi Mukuru wa UNCHR, Grandi yaganiriye n'impunzi zicumbikiwe i Gashora

Minisitiri ushinzwe Ibikorwa by'Ubutabazi Kayisire Solange aganira n'abanyamakuru nyuma y'uruzinduko rwa Grandi i Gashora

Amafoto: Hakizimana Alain